بيىلعى جولداۋدىڭ ءبىر ەرەكشەلىگى, كىتاپ ءھام ۇلتتىق كىتاپحانالاردىڭ الەۋمەتتىك جاعدايى تۋرالى تاريحتا ءبىرىنشى رەت ءسوز بولىپ, ول مەملەكەت باسشىسىنىڭ اۋزىمەن ايتىلدى.
ەڭ اۋەلى ەكونوميكا, باسقاسى سونان كەيىن بولا جاتار دەپ ەدىك. ودان نە شىققانىن كوزىمىزبەن كورىپ وتىرمىز... ۇلتتىڭ رۋحى كوتەرىلمەسە, ونىڭ ەڭسەسى دە كوتەرىلمەيتىنىن تاريح باياعىدا-اق ايتىپ قويعان. «ادامدى ادام قىلعان – كىتاپ, ادامزات قىلعان – كىتاپحانا» دەگەندى ايتىپ, ءابىش (كەكىلباي) اعام ءبىزدىڭ اداسىپ بارا جاتقانىمىزدى ەلدەن بۇرىن بايقاعان-دى. ادامزاتتىڭ وسى كۇنگە دەيىن جيىپ-تەرگەن اقىل-ويى وسى كىتاپحانالاردا جاتىر. 90-شى جىلدارى تالاپايعا تۇسكەن دە وسى كىتاپحانالار ەدى... تەلەديدار مەن كومپيۋتەرلەردەن ازداپ بوي سۋىتىپ, كىتاپحانالارعا قايتا بارماساق, تاعىلىققا قاراي تالتاڭداپ جۇرە بەرۋىمىز مۇمكىن؟ ەس جياتىن كەزەڭ كەلدى.
ءبىزدى كىتاپحانالار كۇتىپ تۇر...
ون ادامنىڭ جازۋشى عوي, سەگىزى,
كەرنەگەن كەۋدەسىن وي تەڭىزى.
قۇداي جازعان قۇران دەگەن كىتاپ بار.
... كىتاپ سونداي بولۋ كەرەك نەگىزى.
قاراورمانداي, قاراسى,
قاپتاپ تۇرعان كىتاپتارعا قاراشى:
اسپانمەنەن جەردەي بولدى,
اللا مەن
ادام جازعان كىتاپتاردىڭ اراسى.
كىتاپ تا بار اشىپ قالساڭ, نە ءتۇرلى,
كوكتىڭ نۇرى ايمالايتىن بەتىڭدى:
مىنە, ابايدىڭ ەكى تومى, ىشىنە
ەكى دۇنيە سىيىپ كەتكەن سەكىلدى...
قارسى الدىڭنان قاسىم شىعىپ,
ەگىلسە,
(قارا تومى قالاي ونىڭ, سەنىڭشە؟)
قۇلاعىنا,
(تەلمىرگەندە قاعازعا)
وعان قۇداي سىبىرلاعان, مەنىڭشە.
«اللا-اي!» دەيمىن اقتامبەردى
تولعاسا,
(اقىلىما سىيمايتىن جان ول دا اسا)
ايتا المايدى مۇنداي ءسوزدى الاشقا,
جۇمىر باستى پەندە,
قۇداي بولماسا!
ون ادامنىڭ جازۋشى عوي, سەگىزى,
كەرنەگەن كەۋدەسىن وي تەڭىزى.
قۇداي جازعان قۇران دەگەن كىتاپ بار.
... كىتاپ سونداي بولۋ كەرەك نەگىزى.
سەرىك اقسۇڭقار,
اقىن, مەملەكەتتىك سىيلىقتىڭ لاۋرەاتى