مەملەكەت باسشىسىنىڭ قازاقستان حالقىنا ارناعان «حالىق بىرلىگى مەن جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىندا ايتىلعان مىندەتتەردىڭ شەشىمى قاراعاندى وبلىسى اكىمدىگىندە وتكەن اكتيۆ جيىنىندا تالقىلاندى.
جيىن بارىسىندا بەلگىلى بولعانداي, تاياۋ كۇندەرى جولداۋداعى مىندەتتەردى ورىنداۋ بويىنشا ارنايى جوسپار قابىلدانادى. بۇل قۇجاتتا ءوڭىر تۇرعىندارىنىڭ ءومىر ءسۇرۋ ساپاسىن جاقسارتۋ بويىنشا ناقتى شارالار قاراستىرىلاتىن بولادى.
قازىرگى تاڭدا ەكونوميكانى ءارتاراپتاندىرۋ اسا ماڭىزدى مىندەتتەردىڭ ءبىرى بولىپ تۇر. بۇل قاراعاندى سياقتى يندۋستريالىق وبلىستا ايرىقشا قاجەت قادام. مىسالى, قاراعاندى قالاسىن لوگيستيكالىق ورتالىق رەتىندە دامىتۋ قولعا الىنسا, مونوقالالاردى زاماناۋي ءوندىرىس ورىندارىن ىسكە قوسۋ ستراتەگياسى ارقىلى وركەندەتۋ جوسپارلانعان.
جالپى, قاراعاندى وبلىسى بويىنشا 2025 جىلعا قاراي ءتورتىنشى يندۋستريالىق رەۆوليۋتسيا اياسىندا 10-عا جۋىق كاسىپورىندى جاڭعىرتۋ جانە جاڭارتۋ, سونىمەن بىرگە بىرقاتار يننوۆاتسيالىق جوبالاردى ىسكە قوسۋ جوسپاردا بار. وسى ورايدا تەمىرتاۋ, جەزقازعان, بالقاش جانە ساران قالالارىندا دامۋدىڭ باسىم باعىتتارىن قۇرۋ مۇمكىندىگى ءسوز بولدى. اۋىل شارۋاشىلىعى سالاسىندا دا اتقارىلۋى ءتيىس زور مىندەتتەر كۇتىپ تۇر. اتاپ ايتقاندا, جايىلىمدىق جەرلەردى سۋلاندىرۋ جانە توزعان جەرلەردى قالپىنا كەلتىرۋ جۇمىستارىن كۇشەيتۋ كۇن تارتىبىنەن تۇسپەگەن ماسەلە.
الەۋمەتتىك سالا بويىنشا دا شەشىمىن كۇتكەن ءبىرتالاي ماسەلە بار. 2025 جىلعا قاراي 299 اۋىلدىق مەكتەپتى جاڭارتۋ جوسپارلانعان. ءبىلىم بەرۋدىڭ قولجەتىمدىلىگىن ارتتىرۋ باعىتىندا وبلىستا 10 جاڭا نىساننىڭ قۇرىلىسى جۇرگىزىلۋدە. ونىڭ ىشىندە اۋىلدىق جەردە سالىنىپ جاتقان 3 مەكتەپ بار. مەكتەپتەردەگى ءبىلىم ساپاسىن جاقسارتۋ ماقساتىندا «وقۋعا قۇشتار مەكتەپ» جوباسى جۇزەگە اسىرىلماق. كوللەدجدەردە مامانداردى دايارلاۋ ەڭبەك نارىعىنىڭ تالاپتارىن ەسكەرە وتىرىپ ۇيىمداستىرىلادى. تەك بيىلعى وقۋ جىلىنىڭ وزىندە 10 جاڭا ماماندىق اشىلدى.
سونداي-اق اكتيۆ جيىنىندا وبلىستىڭ قالالارى مەن اۋىلدارىن سۋمەن قامتاماسىز ەتۋ كورسەتكىشىن 2025 جىلعا قاراي قازىرگى 96,3%-دان 100%-عا دەيىن ارتتىرۋ جوسپارلانعانى ايتىلدى. بيىلدىڭ وزىندە سۋمەن جابدىقتاۋ جانە كارىز جەلىلەرىنىڭ قۇرىلىسى بويىنشا 35 جوبا جۇزەگە اسۋى ءتيىس. ال 2021 جىلدىڭ سوڭىنا دەيىن قامتۋ 97%-عا دەيىن ارتادى دەپ كۇتىلۋدە.
جيىندا توراعالىق ەتكەن وبلىس اكىمى جەڭىس قاسىمبەك «بىرىڭعاي گەولوگيالىق قىزمەت قۇرۋ» باستاماسىنىڭ ماڭىزدىلىعىنا ءمان بەردى.
«ينۆەستورلارعا كەشەندى سەرۆيستىك قولداۋ كورسەتەتىن گەولوگيالىق قىزمەت جاڭا ينۆەستيتسيالار تارتۋعا جانە ءوڭىردىڭ تاۋ-كەن ءوندىرۋ مەن وڭدەۋ سەكتورىنىڭ ودان ءارى دامۋىن قامتاماسىز ەتۋگە مۇمكىندىك بەرەتىن جەر قويناۋى تۋرالى تسيفرلى دەرەكتەر بانكىن قۇرۋعا ىقپال ەتەدى», دەپ اتاپ ءوتتى ءوڭىر باسشىسى.
مۇنىڭ ءوزى قويناۋىندا مەندەلەەۆ كەستەسىندەگى ەلەمەنتتەردىڭ تۇگەلگە دەرلىگى بار وبلىستىڭ ينۆەستيتسيالىق تارتىمدى ايماق بولىپ قالا بەرۋىنە يگى ىقپال ەتەتىنى اكتيۆ جيىنىندا باسا ايتىلدى.
قاراعاندى وبلىسى