قوسالقى قۇرامدى شىعارعانى نەسى ەكەن؟

تاريحقا كوز جۇگىرتەر بولساق, ەكى ەلدىڭ قۇرامالارى بۇعان دەيىن جاسىل الاڭدا ءۇش رەت كەزدەسكەن ەكەن. ونىڭ ەكەۋىندە فينليانديا قۇراماسى جەڭىسكە جەتكەن بولسا, بىرەۋىندە جەرلەستەرىمىز باسىم تۇسكەن. قازاقستان مەن فينليانديا قۇرامالارىنىڭ ەڭ العاشقى تانىستىعى 2006 جىلى باستالعان بولاتىن. سول جىلدىڭ اقپان ايىندا وتكەن جولداستىق كەزدەسۋدە قازاقستان فۋتبولشىلارى قارسىلاستارىمەن نەگىزگى ۋاقىتتا تەڭ ءتۇسىپ, ماتچ سوڭىنداعى پەنالتي سەرياسىندا جەڭىسكە جەتكەن ەدى. كەيىنگى ەكى كەزدەسۋ 2008 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا ءوتىپ, توپتىق باسەكەدەگى ەكى ويىندا دا فينليانديالىقتار باسىم ءتۇستى. 2006 جىلدىڭ قازانىندا الماتىدا وتكەن ءبىرىنشى ويىندا قوناقتار 2:0 ەسەبىمەن جەڭىسكە جەتكەن بولسا, 2007 جىلدىڭ تامىزىندا تامپەرەدە ۇيىمداستىرىلعان قارىمتا كەزدەسۋدە دە الاڭ يەلەرى 2:1 ناتيجەسىمەن جەرلەستەرىمىزدەن ايلاسىن اسىرىپ كەتتى. ەندى, مىنە, اراعا 15 جىل سالىپ الەم چەمپيوناتىنىڭ ىرىكتەۋ كەزەڭى اياسىندا ەكى ەلدىڭ فۋتبولشىلارى جاسىل الاڭدا قايتا جولىقتى. وكىنىشكە قاراي, حەلسينكيدەگى وليمپيادالىق ستاديوندا وتكەن بۇل ويىندا دا سكانديناۆيالىقتار 1:0 ەسەبىمەن جەڭىسكە جەتتى. 

قازاقستان ۇلتتىق قۇرا­ما­سىنىڭ باس باپكەرى تالعات باي­سۋفينوۆ ۋكراينامەن بولعان ماتچتان (1:1) كەيىنگى ءباسپاسوز ءماس­ليحاتىندا فينليانديامەن وتەتىن ويىندا قۇراما فۋتبولشىلارى 80 پايىزعا جاڭارادى دەپ مالىمدەگەن ەدى. الايدا ماتچتان ءبىر ساعات بۇرىن ءبىرىنشى مينۋتتان باستاپ الاڭعا شىعاتىن نەگىزگى قۇرام فۋتبولشىلارىنىڭ ءتىزىمى 100 پايىزعا جۋىق جاڭارعانىن بايقادىق. ۋكرايناعا قارسى شىق­قان ويىنشىلاردان تەك الەكساندر ماروچكين عانا ءوز ورنىن ساقتاپ قالىپتى. ەلوردادا وتكەن ويىن­نىڭ قاھارمانىنا اينالعان رۋس­لان ۆاليۋللين الاڭعا شىعۋى مۇمكىن ويىنشىلاردىڭ تىزىمىنە دە ىلىنبەي قالسا, قاقپاشى ستاس پو­كاتيلوۆ سارى قاعازىنىڭ كوپتى­گىنە بايلانىستى, ال شابۋىل­دا ويناعان ازات نۇرعاليەۆ پەن باقتيەر زاينۋتدينوۆ ۆيزا ماسە­لەسى بويىنشا فينلياندياعا بارا المادى.

وسىلايشا, باس باپكەر حەل­سين­كيدە الاڭعا ەكىنشى قۇرام فۋت­بولشىلارىن شىعارۋعا ءماج­بۇر بولدى. سونداي-اق وسى ماتچ­تا ءۇش بىردەي ويىنشىمىز ۇلتتىق قۇراما ساپىنداعى دەبيۋت ويىنىن وتكىزدى. اتاپ ايتار بولساق, «كاسپي» كلۋبىنىڭ جار­تىلاي قورعاۋشىسى ماقسات تايكەنوۆ, «شاحتەر» كلۋبىنىڭ شابۋىلشىسى ايدوس تاتتىباەۆ جانە «توبىلدىڭ» جارتىلاي قورعاۋشىسى سامات جارىمبەتوۆ ۇلتتىق قۇراما جەيدەسىن كيدى.

فينليانديا – قازاقستان ماتچىنا توقتالار بولساق, ءبىرىنشى تايمدا ەكى ەلدىڭ ويىنشىلارىندا گول سوعاتىن مۇمكىندىكتەر بولعانىمەن, ەسەپ اشىلمادى. العاشقى 45 مينۋتتا ءبىزدىڭ قۇرامادان ابات ايىمبەتوۆتىڭ گول سالاتىن تاماشا مۇمكىندىگى بولعان-دى. بىراق ونى شابۋىلشىمىز ءوز پايداسىنا جاراتا المادى.

ال ەكىنشى تايم باستالا سالىسىمەن يان ۆوروگوۆسكي ايىپ الاڭىنىڭ سىرتىنان كەرەمەت سوققى جاساپ ەدى. بىراق قاقپاشى لۋكاش گرادەتسكي ءوز ورنىنان تابىلىپ, قاۋىپتى سوققىنىڭ بەتىن قايتاردى. 60-مينۋتتا يەرە ۋرونەننىڭ قاپتالدان اسىرعان پاسىن يوەل پوحيانپالو باسپەن قاقپاعا ءدال باعىتتادى. وكىنىشكە قاراي, ي.شاتسكي بۇل دوپتى قايتارۋعا تىرىسقانىمەن, دوپقا جەتە المادى. ماتچ سوڭىنا دەيىن ەكى قۇراما ويىنشىلارى اتاپ ايتارلىقتاي قاۋىپتى شابۋىل ۇيىمداستىرعان جوق. قورىتىندى ەسەپ – 1:0.

الاڭ يەلەرى بۇل جەڭىسىنەن كەيىن 5 ۇپايمەن د توبىندا ەكىنشى ورىنعا كوتەرىلدى. ال تالعات بايسۋفينوۆ شاكىرتتەرى 2 ۇپايمەن سوڭعى ورىندا تۇر.

سونىمەن قاتار كەشە ءبىزدىڭ توپتىڭ كوشباسشىسى سانالاتىن فرانتسيا قۇراماسى ۋكرايناعا قوناققا بارىپ, قاتارىنان ەكىنشى ويىن تەڭ ءتۇستى. وتكەن تۋردا بوسنيا جانە گەرتسەگوۆينا فۋتبولشىلارىمەن (1:1) ويناعان ء«ۇش جولاقتى» ەلدىڭ ويىنشىلارى ۋكراينادان ءدال وسىنداي ەسەپپەن ەلىنە ورالدى. كەزەكتى ءبىر ۇپايىنا قول جەتكىزگەن فرانتسيا 5-تۋردان كەيىن 9 ۇپايمەن ءبىرىنشى ورىندا تۇرسا, توپتىق كەزەڭدەگى بەس ماتچتىڭ بەسەۋىندە دە تەڭ ويناعان ۋكراينالىقتار 5 ۇپايمەن ءۇشىنشى ساتىدا تۇر. ال ءۇش ويىن وتكىزگەن بوسنيالىقتار 2 ۇپايمەن ءتورتىنشى ورىندا كەلەدى. 

ەندى جەرلەستەرىمىز كەلەسى ويىنىن ەرتەڭ ءدال وسى بوسنيا جانە گەرتسە­گو­ۆينا قۇراماسىمەن وتكىزەدى. بۇل – ەكى قۇرامانىڭ ءوز تاريحىنداعى ءبىرىنشى كەزدەسۋى بولماق. ماتچ ەلوردا ۋاقىتىمەن 00:45-تە باستالادى.