تسيفرلاندىرۋ كولەڭكەلى ەكونوميكانى اشكەرەلەيدى

ەلدەگى «كولەڭكەلى ەكونو­ميكانىڭ» ۇلەسى 23,5 پايىز دەڭ­گەيىندە ەكەنى بەلگىلى. ءبىزدىڭ ەل بۇل كورسەتكىشتى ەكونوميكالىق ىنتىماقتاستىق پەن دامۋ ۇيىمى ەلدەرىنىڭ دەڭگەيىنە دەيىن – 15-17 پايىزعا دەيىن تومەندەتۋگە نيەتتى. اينالىمدى اشىق ەتە وتىرىپ, كەدەرگىسىز ساۋدانى قامتاماسىز ەتۋ ماڭىزدى. كونترافاكت ەلدەن ەلگە ءوتىپ كەتپەۋى كەرەك.

بۇگىنگى تاڭدا جاھاندىق تسيفر­لاندىرۋ پروتسەسىندە تاۋارلاردى تسيفرلى تاڭبالاۋ جانە قاداعالاۋ قويىلعان مىندەتتەرگە قول جەتكىزۋ تريگگەرلەرىنىڭ ءبىرى بولىپ سانالادى. سەبەبى تاڭبالاۋ – ءتيىمدى باسقارۋدىڭ ماڭىزدى فاكتورى. ول ونلاين رەجىمدە الىنعان ناقتى جانە وبەك­تيۆتى دەرەكتەرگە نەگىزدەلگەن باس­قارۋ­شىلىق شەشىمدەر قابىل­داۋعا مۇمكىندىك بەرەدى. بۇدان بولەك, تاۋارلار قوزعالىسىنىڭ بارىنشا اشىقتى­عىنا بايلانىس­تى تسيفر­لى تاڭبالاۋ كاسىپكەرلەر ءۇشىن تاۋە­كەلدەردى ازايتىپ, بيزنەستى جوس­­پار­­لاۋدىڭ دامۋىنا ەداۋىر اسەر ەتەدى.

قازاقستاندا الدىمەن تەمەكى ونىم­دەرىن تسيفرلى تاڭبالاۋ باستالدى. سالانىڭ ءوزى دايىن بولعاندىقتان, وسى جوبا قولداندى. ءارى قاراي اياق كيىمدى, ودان كەيىن فارماتسەۆتيكالىق پرەپاراتتاردى تسيفرلى تاڭبالاۋ جوسپارلانىپ وتىر. ەۋروپا ەلدەرى ءدارى-دارمەكتەردى تاڭبالاپ جاتىر. سونىمەن قاتار پاندەميا جاع­دايى بۇل پروتسەستىڭ قاجەتتىلىگى مەن ماڭىزدىلىعىن تاعى ءبىر مارتە كورسەتتى. دارىلەرگە سۇرانىس ارتىپ, كوپتەگەن جالعان پرەپاراتتار نارىقتى جاۋلاپ الدى. ال ولاردا تسيفرلى Data Matrix كودى بولۋى كەرەك. سوندا ءدارى-دارمەكتىڭ كونترافاكت ەمەس ەكەندىگىنە بىردەن كوز جەتكىزۋگە بولادى.

جالپى, نارىققا جۇرگىزىلگەن تالداۋ كونترافاكتىلىك كولەم بويىنشا جەڭىل ونەركاسىپ پەن اياق كيىمنىڭ الدا ەكەنىن كورسەتتى. اياق كيىم نارىعىنىڭ 48 پايىزى «كولەڭكەدە» جاتىر. ال جەڭىل ونەركاسىپتىڭ 63 پايىزى «كولەڭكەلى اينالىمدا». سوندىقتان تسيفرلاندىرۋ پروتسەستەرىن بەلسەندى ەنگىزۋ قازىرگى ۋاقىتتا «كولەڭكەلى ەكونوميكامەن» كۇرەسۋدىڭ ءتيىمدى جولداردىڭ ءبىرى بولاتىنى داۋسىز.

بيكەش قۇرمانعاليەۆا,

تسيفرلىق ەكونوميكانى دامىتۋ ورتالىعىنىڭ باس ديرەكتورى