بيىل تورعاي دالاسىنداعى «التى ساي» ەكوساياباعىنا قوقيقاز قوندى. قازاقستان بيوالۋانتۇرلىلىكتى ساقتاۋ قاۋىمداستىعىنىڭ مالىمەتىنشە, ەلىمىزدە بۇل قۇستىڭ جالعىز-اق ءتۇرى بار, ول – قىزعىلت قوقيقاز. ماماندار بۇل كەربەز قاناتتىلاردىڭ تورعايدان ءتورت ءجۇز شاقىرىم قاشىقتىقتا جاتقان قورعالجىن مەملەكەتتىك قورىعىنداعى تەڭىز كولىنەن ۇشىپ كەلۋى مۇمكىن دەپ بولجايدى.
قوقيقاز ءوزىنىڭ كەربەز قيمىل-قوزعالىسى مەن ماڭعاز تۇرىسىمەن عانا يسپان حالقىنىڭ الەمگە ايگىلى «فلامينگو» بيىنە نەگىز بولعانى بارشاعا ايان. بۇل قۇستار وتە ساق ءارى ۇركەك كەلەدى, كوبىنە ادام اياعى باسا بەرمەيتىن سۋلى جەرلەردى مەكەندەيدى. ءبىر ۇرىككەن كولىنە 4-5 جىلعا دەيىن قايتىپ قونباي قويادى ەكەن. قوقيقاز – بويشاڭ, ۇزىن سيراقتى قۇس ءارى كوزى قياداعىنى شالاتىن قىراعى كەلەدى.
«التى ساي» ەكوساياباعىنا قونعان قىزعىلت قوقيقازدار جازداي وسى ماڭدى مەكەندەيدى. قاۋىرسىندارىن تۇلەتىپ, بالاپان باسىپ شىعارادى. ءبىر قوقيقاز ەكى جۇمىرتقاعا دەيىن باسىپ شىعارۋى مۇمكىن. قورەك تابۋ ءۇشىن ۇشىپ كەتكەن انا قوقيقاز قاپتاعان قۇستىڭ ىشىندە جۇرگەن ءوز بالاپانىن داۋسىنان تانيدى ەكەن. قوقيقاز بالاپاندارىنىڭ قاناتى قاتايىپ, ابدەن ءال جيناپ العان سوڭ, كۇزگە سالىم ازەربايجان, تۇرىكمەنستان جانە يران ەلدەرىندەگى قىستاۋلارىنا ۇشىپ كەتەدى.
قوستاناي وبلىسى