ەۋرازيالىق ەكونوميكالىق وداققا مۇشە مەملەكەتتەر اراسىندا ەلەكتر ەنەرگياسىن ءوزارا جەتكىزۋ ادىستەمەسى انىقتالادى. بۇل تۋرالى بۇگىن سەنات وتىرىسىندا ايتىلدى, دەپ جازادى Egemen.kz.
سەنات دەپۋتاتتارى «قىرعىز رەسپۋبليكاسىنىڭ ەۋرازيالىق ەكونوميكالىق وداققا قوسىلۋىنا بايلانىستى وزگەرىستەر ەنگىزۋگە باعىتتالعان حاتتامانى» راتيفيكاتسيالادى. ەنەرگەتيكا ءمينيسترىنىڭ ورىنباسارى قايرات راحيموۆ وداققا مۇشە مەملەكەتتەردىڭ ەلەكتر ەنەرگيا جۇيەلەرىنىڭ ءتيىمدى جۇمىس ىستەۋ مۇمكىندىگى ارتاتىنىن ايتتى. قىرعىزستان ەلەكتر ەنەرگياسىنىڭ 80 پروتسەنتتەن استامى سۋ ەلەكتر ستانتسيالارىندا وندىرىلەدى. سۋ از بولعاندىقتان, ەل ەلەكتر قۋاتىنىڭ تاپشىلىعىنا تاپ بولدى. وسى ورايدا, «ايىرقالپاقتى» اعايىن ەلەكتر ەنەرگياسىن جەتكىزۋ ماسەلەسى بويىنشا قازاقستانعا جۇگىنگەن. وتكەن جىلى ەلىمىز نارىقتىق تومەن باعامەن 52 ميلليون كيلوۆاتت قۋات كوزىن جەتكىزدى. بيىل قىرعىزستان قازاقستان ۇسىنعان باعاعا قاناعاتتانباي وتىر. وسىعان وراي تاراپتار تاۋار الماسۋ پروتسەسىن وزگەرتۋگە كەلىستى.«وداققا مۇشە مەملەكەتتەر اۋماعى بويىنشا قىرعىزستان تاراپىنان ەلەكتر ەنەرگياسىن مەملەكەتارالىق بەرۋ ءوزارا قارىم-قاتىناستارىن رەتتەۋ شەڭبەرىندە حاتتاما ازىرلەندى. ونىڭ ماقساتى قىرعىز رەسپۋبليكاسىن شارتقا قوسىلۋىنا بايلانىستى وداق ەلدەرى اراسىندا ەلەكتر ەنەرگياسىن مەملەكەتارالىق بەرىلۋىن جۇزەگە اسىرۋ ءادىسناماسىن ايقىنداۋ بولىپ تابىلادى. حاتتاما جوباسى 2017 جىلعى 13 قاڭتاردا ەاەو كەڭەسىنىڭ وكىمىمەن ماقۇلدانعان», دەدى قر ەنەرگەتيكا ءمينيسترىنىڭ ورىنباسارى.