تۇڭعىش پرەزيدەنتىمىز تاۋەلسىزدىك العان كۇننەن باستاپ, ۇنەمى حالىقتىڭ نامىسىن قايراپ, جىگەرىن جانىپ, ارقاشاندا وركەنيەتكە ۇمتىلعان ۇزاق مەرزىمدى ماقساتتار مەن مىندەتتەر قويىپ كەلەدى. سونىڭ ناتيجەسىندە ەلىمىز كەيبىر دامىعان مەملەكەتتەردىڭ وزدەرىن سۇرىندىرگەن اۋىر كەزەڭدەردەن قينالماي ءوتىپ, بارشانى تاڭعالدىرعان ايتۋلى تابىستارعا قول جەتكىزدى. دامۋدىڭ قازاقستاندىق ۇلگىسىن قالىپتاستىرا وتىرىپ, بەدەلى بيىك, ابىرويى جوعارى, قۋاتتى مەملەكەتكە اينالدى.
تۇڭعىش پرەزيدەنتىمىز تاۋەلسىزدىك العان كۇننەن باستاپ, ۇنەمى حالىقتىڭ نامىسىن قايراپ, جىگەرىن جانىپ, ارقاشاندا وركەنيەتكە ۇمتىلعان ۇزاق مەرزىمدى ماقساتتار مەن مىندەتتەر قويىپ كەلەدى. سونىڭ ناتيجەسىندە ەلىمىز كەيبىر دامىعان مەملەكەتتەردىڭ وزدەرىن سۇرىندىرگەن اۋىر كەزەڭدەردەن قينالماي ءوتىپ, بارشانى تاڭعالدىرعان ايتۋلى تابىستارعا قول جەتكىزدى. دامۋدىڭ قازاقستاندىق ۇلگىسىن قالىپتاستىرا وتىرىپ, بەدەلى بيىك, ابىرويى جوعارى, قۋاتتى مەملەكەتكە اينالدى.
ارينە, بۇگىنگىدەي عارىشتىق جىلدامدىقپەن العا باسقان ۋاقىتتا ءبىر ساتكە دە كىدىرىپ قالۋعا بولمايدى. سول ءۇشىن ەلباسىمىز «قازاقستان-2050» ستراتەگياسىن جۇزەگە اسىرۋدىڭ جولدارى مەن تاكتيكاسىن ناقتى بەلگىلەنگەن تىڭ يدەيالارىن جاريا ەتىپ وتىر. بۇل – ەلدىڭ الىس بولاشاعىن بولجاي بىلەتىن, ءوز حالقىنا شىنايى قامقورلىق, جاناشىرلىق جاساي الاتىن كەمەڭگەر ساياساتكەردىڭ, دارا تۇلعانىڭ عانا قولىنان كەلەتىن تاريحي ءىس. ەلباسى ءوز جولداۋىندا: «باستى ماقسات – قازاقستاننىڭ ەڭ دامىعان 30 مەملەكەتتىڭ قاتارىنا قوسىلۋى. ول – «ماڭگىلىك قازاقستان» جوباسى, ەل تاريحىنداعى ءبىز اياق باساتىن جاڭا ءداۋىردىڭ كەمەل كەلبەتى», دەپ اتاپ كورسەتتى. ەلباسى ءوز جولداۋىندا قازاقستاننىڭ الەمدەگى ەڭ دامىعان 30 ەلدىڭ قاتارىنا كىرۋ تۇجىرىمداماسىنداعى جەتى باسىم باعىتتى سارالاپ بەردى. جانە دامۋدىڭ بۇل جولىن ەكى كەزەڭگە بولە وتىرىپ, ۇكىمەت پەن ۇلتتىق بانككە بيىلعى جىلى اتقارۋعا ءتيىستى تاعى دا جەتى ناقتى تاپسىرما بەردى. سوندىقتان, تاۋەلسىز قازاقستاننىڭ تاريحىندا تاعى ءبىر جاڭا كەزەڭ باستالدى دەۋگە بولادى.
مەملەكەتىمىزدىڭ ىشكى جانە سىرتقى ساياساتىن ناقتى ايقىنداپ, الەۋمەتتىك-ەكونوميكالىق دامۋىمىزدى تەرەڭ دە جان-جاقتى قامتىعان بۇل جولداۋ – ەلىمىزدىڭ الداعى دامۋ پەرسپەكتيۆالارىن كەزەڭ-كەزەڭمەن بەلگىلەپ, وتكەن جىلدىڭ سوڭىندا «نۇر وتان» پارتياسىنىڭ حV سەزىندە قابىلدانعان دوكترينامەن تىعىز ۇندەسىپ جاتقان جاڭا ساياسي باعدارلاما. ەلباسىنىڭ جولداۋىنداعى: «قازاقستان-2050» ستراتەگياسىنىڭ ءتۇپ قازىعى – ماڭگىلىك ەل. ماڭگىلىك ەل – اتا-بابالارىمىزدىڭ سان مىڭ جىلداردان بەرگى اسىل ارمانى. ول ارمان – تۇرمىسى باقۋاتتى, ءتۇتىنى ءتۇزۋ ۇشقان, ۇرپاعى ەرتەڭىنە سەنىممەن قارايتىن باقىتتى ەل بولۋ ەدى», دەپ اتاپ ءوتۋى ەلدىڭ تۇرمىسىن جاقسارتۋعا, الەۋمەتتىك سالالاردى دامىتۋعا باعىتتالعان پارتيانىڭ دوكتريناسىمەن تىكەلەي ساباقتاسىپ جاتىر. وسىنى ەسكەرە وتىرىپ, ەلباسى: «جولداۋدىڭ ماقساتتارى مەن مىندەتتەرىن ءجۇزەگە اسىرۋ جونىندەگى ناقتى شارالاردان ءاربىر قازاقستاندىق حاباردار بولۋى قاجەت. بۇل «نۇر وتان» پارتياسى قىزمەتىنىڭ نەگىزگى ماسەلەلەرىنىڭ بىرىنە اينالدى دەپ سەنەمىن», دەپ اتاپ كورسەتتى. دەمەك, بۇل ءاربىر نۇروتاندىققا جۇكتەلگەن زور جاۋاپكەرشىلىك. وعان الماتىلىقتار بەلسەندى اتسالىساتىن بولادى. نۇروتاندىقتار قازىردىڭ وزىندە جاڭا جولداۋدى ەرەكشە ىقىلاسپەن قابىلداپ, ءبىراۋىزدان قولداۋ بىلدىرۋدە.
وسىعان دەيىن «ەڭ باستى ستراتەگيا – حالىقتىڭ ءال-اۋقاتىن ارتتىرۋ» دەگەن ايقىن فورمۋلامەن ىلگەرىلەپ كەلە جاتقان جاس مەملەكەتىمىزدىڭ ساياسي رەفورمالارى ەكونوميكالىق دامۋ باعدارلامالارىمەن تىعىز ۇشتاسىپ وتىرعانىن وزگە جۇرتتار دا كورىپ, ءبىلىپ وتىر. سول سەبەپتى, قازاقستاندىق دامۋ جولىنا حالىقارالىق دارەجەدەگى قوعامداستىق لايىقتى باعاسىن بەرىپ, الەمدىك باعدارلامالارعا جەتەكشىلىك جاساۋ ورايىندا ەلىمىزگە ۇلكەن سەنىم كورسەتتى. سونىڭ ايقىن ءبىر كورىنىسى – الداعى ۋاقىتتا وتەتىن ەكسپو-2017 كورمەسى.
الەمدەگى 50 دامىعان مەملەكەت قاتارىنا قوسىلعان ەلىمىزدە بايىپتى ءوسۋ بار, حالىقتىڭ الەۋمەتتىك تۇرمىسىندا تۇراقتى ىلگەرىلەۋ بار. ونى الىسقا بارماي-اق, الماتىلىقتاردىڭ بۇگىنگى تۇرمىسىنىڭ وسكەنىنەن دە بايقاۋعا بولادى. قالا اكىمى, پارتيامىزدىڭ قالالىق فيليالىنىڭ توراعاسى احمەتجان ەسىموۆتىڭ قولداۋىمەن پارتيا وكىلدەرى تۇراقتى تۇردە يندۋستريالاندىرۋ كارتاسىنا قاتىسۋشى وندiرiستiك نىسانداردى ارالاپ, ونداعى جۇمىس بارىسىن ۇنەمى نازاردا ۇستاپ وتىرادى. مىسالى, جىل قورىتىندىسىندا جۇرگىزىلگەن مونيتورينگ بويىنشا يندۋستريالاندىرۋ كارتاسىنا ەنگەن 29 جوبا اياسىندا: قالا مەتروپوليتەنى, راديوبايلانىس قۇرالدار زاۋىتى, ءدارى-دارمەك شىعارۋ سياقتى, ت.ب. نىسانداردا جاڭا جۇمىس ورىندارى كوپتەپ اشىلىپ جاتقانىن ماقتانىشپەن اتاپ وتۋگە بولادى. بۇل كۇندە شاعىن جانە ورتا بيزنەس سالاسىندا قىزمەت جاسايتىن قالالىقتاردىڭ سانى 370 مىڭنان استى. الماتىداعى جان باسىنا شاققانداعى ىشكى جالپى ءونىم ەۋروپالىق دامىعان مەملەكەتتەردىڭ كورسەتكىشىنە تەڭ بولىپ وتىر. تۇراقتى ەڭبەك پەن تابىستىڭ ناتيجەسىندە ورتاشا جالاقى رەسپۋبليكا بويىنشا الدىڭعى ورىنعا شىقتى. ءاربىر ءۇشىنشى الماتىلىق اۆتوكولىك ءمىنىپ ءجۇر. نارەستەلەردىڭ دۇنيەگە كەلۋى سوڭعى ءۇش جىلدا ەكى ەسەگە كوبەيدى. ەل تۇرمىسىنىڭ ءوسۋى دەگەنىمىز وسى بولار.
سونداي-اق, قالانىڭ ءوز كەلبەتى دە اجارلانىپ, ينفراقۇرىلىمى جەتىلىپ, مادەنيەتى وركەندەۋ جولىنا ءتۇستى. ەلىمىزدەگى ءبىلىم مەن ءىلىمىنىڭ رۋحاني كوش باسشىسى سانالاتىن شاھارىمىزدا تەاتر, سپورت سارايى, مەكتەپ, بالاباقشالار اشىلىپ, باسقا دا الەۋمەتتىك نىسانداردىڭ قۇرىلىستارى قىزۋ ءجۇرىپ جاتىر. مىسالى, حالىقارالىق شاڭعى كەشەنى كوپشىلىكتىڭ ءجيى باس قوساتىن سپورت-دەمالىس ورنىنا اينالدى. الداعى ۋاقىتتا ستۋدەنت جاستاردىڭ قىسقى ۋنيۆەرسياداسى وتپەك. وعان دايىندىق جۇمىستارى جان-جاقتى جۇرگىزىلۋدە. مىنە, وسى جەتىستىكتەردىڭ بارلىعىن ءبىز حالقىمىزدىڭ يگىلىگى رەتىندە قاستەرلەپ, دامىتا ءبىلۋىمىز كەرەك. مۇنىڭ ءبارىن ەلباسى جيناقتاپ: «بۇل قۇندىلىقتار – ۋاقىت سىنىنان وتكەن قازاقستاندىق جول تاجىريبەسى», دەپ ايقىندادى. جانە ونى تاعى دا جەتى سالاعا ءبولىپ, «جاڭا قازاقستاندىق پاتريوتيزمنىڭ يدەيالىق نەگىزى وسى مەملەكەت قۇراۋشى, جالپىۇلتتىق قۇندىلىقتاردا جاتىر», دەپ اتاپ كورسەتتى. بۇل جەردە قازاق ءۇشىن كيەلى بولىپ تابىلاتىن 7 سانىنىڭ دا قايتالانىپ كەلۋى تەگىن بولماسا كەرەك. ونى ءبىز ماڭگىلىك ەلدىڭ ءساتتى جەتى قادامى دەپ ءتۇسىنسەك تە بولعانداي. سونىڭ ءبارىندە نۇروتاندىقتاردىڭ قوسقان قوماقتى ۇلەسى بار.
بۇگىندە 70 مىڭنان استام ءمۇشەسى بار الماتى قالالىق فيليالى رەسپۋبليكامىزداعى ەڭ ۇلكەن ساياسي ۇيىمنىڭ بىرىنە اينالىپ وتىر. جوعارىدا ايتقانىمداي, ولار بارلىق الەۋمەتتىك-ەكونوميكالىق, رۋحاني سالاداعى دامۋعا بارىنشا اتسالىسىپ, وزدەرىنىڭ كۇش-جىگەرىن العاۋسىز ارناۋدا. بۇل ۇيىمشىلدىق ءوز جەمىسىن بەرۋدە. ونىڭ ءبىر عانا ايقىن مىسالى – الماتى قالالىق پارتيا ۇيىمى «نۇر وتان» پارتياسىنىڭ سايلاۋالدى تۇعىرناماسىندا بەلگىلەنگەن «ۇلتتىق ءىس-قيمىل جوسپارىن» جىل سايىن اسىرا ورىنداپ كەلەدى. جاڭاشا جۇمىس كەزەڭىنە شىققان پارتيامىزداعى ۇلكەن وزگەرىستەر مەن جاڭارۋلاردى قالىڭ جۇرتشىلىق كورىپ وتىر. پارتيا بەلگىلەگەن مىندەتتەرگە وراي, قالالىق فيليالدىڭ ۇيىمداستىرۋ قىزمەتى ودان ءارى جاڭارتىلىپ, باستاۋىش پارتيا ۇيىمدارىنىڭ ءرولىن ارتتىرۋ جولىنداعى ناقتى شارالار جۇزەگە اسىرىلۋدا. ەلباسىمىز باستاعان, تۋعان ەلى قوستاعان جاڭعىرتۋلار مەن ءوزگەرىستەر پارتيامىزعا دا وڭ ىقپالىن تيگىزدى. كەمەل كەلەشەككە كەڭ جول اشاتىن وسىناۋ تاريحي جولداۋ ەلىمىزدەگى جارقىن ىستەردى جاڭا بەلەستەرگە جەتەلەيتىنىنە كۇمان جوق.
كەنجەحان ماتىجانوۆ,
«نۇر وتان» پارتياسى الماتى قالالىق
فيليالى توراعاسىنىڭ ءبىرىنشى ورىنباسارى,
قازاقستاننىڭ ەڭبەك سىڭىرگەن قايراتكەرى.