جامبىل وبلىسىندا اسكەري بولىمدەگى جارىلىستاردان كەيىن بىرنەشە اداممەن بايلانىس بولماي تۇر. بۇل تۋرالى قر قورعانىس ءمينيسترى نۇرلان ەرمەكباەۆ ءمالىم ەتتى, دەپ حابارلايدى Egemen.kz.
«بارلىق زارداپ شەككەندەرگە مەديتسينالىق كومەك كورسەتىلىپ جاتىر. وكىنىشكە وراي ءورت سالدارىن جويۋ بارىسىندا 4 اسكەري قىزمەتشى قازا تاپتى.
وڭتۇستىك ءوڭىر اسكەري پروكۋرورى پولكوۆنيك قاپەزوۆ, اسكەري ءبولىمنىڭ كەلىسىمشارت سەرجانتى مەشىنباي, كەلىسىمشارت ەفرەيتورى جانبولاتوۆ جانە اسكەريلەندىرىلگەن كۇزەت قىزمەتشىسى دانباەۆ. وسى ءساتتى پايدالانا وتىرىپ, بارلىق ارىپتەستەرىمنىڭ اتىنان قازا تاپقانداردىڭ جاقىندارىنا كوڭىل ايتامىن», دەدى مينيستر جامبىل وڭىرلىك كوممۋنيكاتسيالار قىزمەتىندەگى ءباسپاسوز ءماسليحاتى بارىسىندا.
ونىڭ اتاپ وتۋىنشە, قازىرگى ۋاقىتتا بىرنەشە اداممەن بايلانىس بولماي وتىر. دەگەنمەن, ولار ءتىرى دەگەن ءۇمىت بار. ىزدەۋ جۇمىستارى جالعاسىپ جاتىر.
«قازىرگى ۋاقىتتا قۇرىلعان جەدەل تەرگەۋ توبى وقيعانىڭ شىعۋ سەبەبىن انىقتاپ جاتىر. الدىن الا نۇسقا قاۋىپسىزدىك تالاپتارىن بۇزۋ بولۋى مۇمكىن. وزدىگىنەن لاتەرالدى حيميالىق رەاكتسيا بولۋى دا ىقتيمال. ءتۇرلى سەبەپتى جوققا شىعارمايمىز. قازا تاپقانداردىڭ اراسىندا ازاماتتىق تۇلعالار جوق», دەدى نۇرلان ەرمەكباەۆ.