قوستاناي وبلىسىنىڭ تۇرعىندارى كارانتين تارتىبىنە بايلانىستى ەنگىزىلگەن شەكتەۋ تالاپتارىن بۇزۋىن توقتاتار ەمەس. مۇنى وتكەن اپتانىڭ سوڭىندا ۇيىمداستىرىلعان رەيد شارالارى بارىسىندا وبلىس ورتالىعى مەن قوستاناي, امانگەلدى, ناۋىرزىم اۋداندارىندا ءوتىپ جاتقان 5 توي مەن ەكى استىڭ ۇستىنەن تۇسكەن مونيتورينگتىك توپ رەۆيزورلارى ايتىپ وتىر.
مىسالى, قوستانايداعى «ۆەست» ءدامحاناسىنىڭ تىيىم سالىنعان ۋاقىتتا جۇمىس ىستەپ تۇرعانى انىقتالدى. سونداي-اق سەنبى كۇنى وبلىس ورتالىعىنداعى مەيرامحانالاردىڭ بىرىندە 50 ادامنىڭ قاتىسۋىمەن ءوتىپ جاتقان ۇيلەنۋ تويى توقتاتىلدى. ال ناۋىرزىم اۋدانىنداعى «دارحان» كافەسىندە 60-تان استامعا داستارقان جايىلىپ, اس بەرىلگەن.
«بارلىق دەرەكتەر بويىنشا ماتەريال جينالدى. قازىر قۇجاتتاردى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنە جىبەردىك. اتالعان مەكەمەلەردىڭ يەلەرى قر اق كودەكسىنىڭ 425-بابى بويىنشا اكىمشىلىك جاۋاپكەرشىلىككە تارتىلادى», دەپ مالىمدەدى پوليتسيا دەپارتامەنتى باستىعىنىڭ كەڭەسشىسى ەلەنا كاشارينا.
بۇگىندە توي-تومالاقتىڭ ناۋقانى مەيرامحانالاردا عانا ەمەس, جالعا بەرىلەتىن جەكە ۇيلەردە دە قىزىپ تۇر. مىسالى, الەۋمەتتىك جەلىدەگى حابارلامالاردان قۇدالىق, مەرەيتوي سياقتى وتباسىلىق مەرەكەلەردى وتكىزەتىن كەڭ كوتتەدجدەردىڭ نەشە ءتۇرىن تابۋعا بولادى. مۇنداي ۇيلەرگە سىيىپ كەتەتىن مەيماندار كەمى 50-دەن باستالىپ 60-70-كە دەيىن بارادى. ءبىر-ەكەۋىنە قوڭىراۋ شالىپ حابارلاسىپ كورىپ ەدىك, الداعى سەنبى-جەكسەنبىدە بوس بولمايتىن بولىپ شىقتى. ودان ۋريتسك كوشەسىندەگى №19/2 كوتتەدجگە قوڭىراۋ شالدىق. الداعى دەمالىس كۇندەرى بۇل ءۇي دە بوس ەمەس. باعاسىن سۇراپ ەدىك, «جۇمىس كۇندەرى تاۋلىگىنە 50 مىڭ, سەنبى جەكسەنبى كۇندەرى – 70 مىڭ تەڭگە. ءبىزدىڭ كوتتەدج قالانىڭ ورتالىعىندا, ىڭعايلى جەردە ورنالاسقان. 50 ادام سىيادى. قورشاۋ بيىك, ەشكىم كورمەيدى. اۋلاعا 8 ماشينا سىيىپ كەتەدى. مۋزىكانى دا ايعايلاتىپ قوسىپ قويۋعا بولادى, بولەك كاراوكە زالى بار. قالاساڭىز اۋلادا مونشا بار, بىراق ول ءۇشىن بولەك ەسەپ ايىرىساسىز» دەپ زۋىلداپ قويا بەردى.
جالپى, مونيتورينگ توبى تامىز ايىنىڭ باسىنان بەرى قاراي جۇرگىزگەن رەيد شارالارى بارىسىندا كارانتين تالاپتارىن بۇزۋدىڭ 121 دەرەگى انىقتالعان. بۇل ماسەلە وبلىس اكىمدىگىندە وتكەن جەدەل شتاب وتىرىسىندا دا تالقىلاندى. شتاب وتىرىسى بارىسىندا قوستاناي جانە ارقالىق قالالارىنىڭ, سونىمەن قاتار جىتىقارا جانە قامىستى اۋداندارىنىڭ اكىمدەرى وزدەرى باسقارىپ وتىرعان وڭىردەگى ەپيدەميالىق جاعداي تۋرالى ەسەپ بەردى.
«ازاماتتاردىڭ كارانتين رەجىمىن بۇزۋ فاكتىلەرى جۇيەلى تۇردە تىركەلە باستادى. وبلىستا 28 ءساۋىر مەن 20 تامىز ارالىعىندا كوپشىلىك ورىندارعا بارعان «قىزىل» جانە «سارى» مارتەبەسى بار 1 323-تەن استام ادام Ashyq قوسىمشاسى ارقىلى انىقتالدى. قۇرمەتتى وبلىس تۇرعىندارى, وزدەرىڭىز بەن جاقىندارىڭىزدىڭ دەنساۋلىعى ءۇشىن جاۋاپكەرشىلىك كورسەتىپ, COVID-19-عا قارسى ۋاقتىلى ۆاكتسينالاۋدان ءوتۋدى سۇرايمىن», دەدى وبلىس اكىمى ارحيمەد مۇحامبەتوۆ.
وبلىستىق دەنساۋلىق ساقتاۋ باسقارماسىنىڭ مالىمەتى بويىنشا, بۇگىنگە دەيىن وبلىستىڭ 286 095 تۇرعىنى ۆاكتسينانىڭ ءبىرىنشى كومپونەنتىن ەككىزگەن. ال ەكىنشى كومپونەنتتى 225 385 ادام قابىلداعان.