قوستاناي وبلىستىق تاريحي-ولكەتانۋ مۋزەيىنىڭ بەينەلەۋ ونەرى بولىمىندە وڭىرگە بەلگىلى سۋرەتشى الەكساندر زاحارچەنكوۆتىڭ «اكۆارەل بوياۋىنىڭ بولمىسى» اتتى كورمەسى اشىلدى. كورمە جۇمىسى بارىسىندا سۋرەتشى ا.ي.نيكيفوروۆ اتىنداعى كوركەمسۋرەت مەكتەبىنىڭ شاكىرتتەرى مەن بەينەلەۋ ونەرىنە قىزىعۋشىلىعى بار بىرنەشە ەرەسەك ادامعا ارناپ شەبەرلىك سىنىبىن وتكىزدى.
شەبەر اق قاعازدىڭ بەتىنە العاش جاي عانا جاعا سالعان بولىپ كورىنگەن الۋان ءتۇستى بوياۋ بىرتە-بىرتە ءتىرىلىپ, تىلسىم تابيعاتتىڭ تاماشا كورىنىسىنە اينالادى. ناعىز ونەر تۋىندىسىنىڭ قالاي تۋاتىنىن كورگەن جان ءتىپتى قولىنا ءومىرى قىلقالام ۇستاپ كورمەسە دە, ءدال سول ساتتە سۋرەت سالعىسى كەلىپ, ارقاسى قوزىپ كەتەتىنى انىق.
سۋرەتشى بەينەلەۋ ونەرىنىڭ الىپپەسىن ەندى عانا تانىپ كەلە جاتقان جاس شاكىرتتەرگە سۋرەت سالۋدىڭ تەحنيكالىق ءادىس-تاسىلدەرى جونىندە اڭگىمەلەي وتىرىپ, كوپتەگەن پايدالى كەڭەس بەردى.
– اكۆارەل – بەينەلەۋ ونەرىنىڭ ەڭ كۇردەلى ءتۇرى, ويتكەنى مۇندا قاتەلەسۋگە بولمايدى. مىسالى, سۋرەتكە مايلى بوياۋ مەن گۋاش پايدالانساڭ, ءساتسىز شىققان تۇستارىن ۇستىنەن تاعى بوياۋ جاعىپ, تۇزەۋگە بولادى, ال اكۆارەلمەن بۇلاي جاساي المايسىڭ, – دەيدى الەكساندر ۆاسيلەۆيچ.
الەكساندر زاحارچەنكوۆ ءوز ونەرىن تاماشالاۋعا جينالعان كوپشىلىككە قانداي ماتەريالعا اكۆارەلمەن سۋرەت سالۋعا بولاتىنى جايىندا بايانداپ بەردى. ايتۋىنشا, اكۆارەل باسقا ماتەريالداردان گورى قاعازدى جاقسى كورەدى ەكەن. بۇل جەردە بوياۋ تۇسەتىن قاعازدىڭ ساپاسىنا ەرەكشە ءمان بەرۋ ماڭىزدى. قاعازدىڭ تىعىزدىعى, قۇرامى مەن فاكتۋراسى بوياۋدىڭ تەگىس جايىلۋىنا, كەپكەننەن كەيىن قالاي كورىنەتىنىنە دەيىن اسەر ەتەدى.
شەبەرلىك سىنىبى بارىسىندا كورەرمەندەر سۋرەتشىلىك ونەردىڭ كەيبىر قۇپيا قىرلارىنا قانىققانداي بولدى. مىسالى, اكۆارەلمەن سالىنعان وزەن-كولدىڭ كورىنىسى مەيلىنشە شىنايى بولۋ ءۇشىن تۇز ۇنتاقتارى پايدالانىلادى ەكەن.
– ءبىز قالا تۇرعىندارىنا ارناپ مۇنداي شەبەرلىك ساعاتتارىن ءجيى ۇيىمداستىرىپ تۇرامىز. بۇل, اسىرەسە, اۋەس- قوي سۋرەتشىلەر ءۇشىن ۇلكەن مەرەكە. بۇگىن دە, مىنە, وڭىرگە بەلگىلى سۋرەتشىنى ارنايى شاقىرىپ, كوپشىلىككە كوركەمبەينەلەۋ ونەرىنىڭ پەيزاج جانرى جايىندا كەڭ ماعلۇمات بەرۋدى ءجون كوردىك, – دەدى وبلىستىق تاريحي-ولكەتانۋ مۋزەيىنىڭ قىزمەتكەرى باقىتگۇل مۇراتبەكوۆا.
قوستاناي وبلىسى