قوستاناي وبلىسىندا جەرگىلىكتى اكىمدىكتىڭ اتىن جامىلىپ بيزنەس نىسانداردى ارالاپ جۇرگەن جالعان تەكسەرۋشىلەر پايدا بولا باستادى. ولار كارانتين تالاپتارىن بۇزدىڭ دەگەن جەلەۋمەن كاسىپكەرلەردى قورقىتىپ, وزدەرىنىڭ بۇل زاڭسىزدىققا كوز جۇما قاراعانى ءۇشىن ولاردان اقشالاي سىياقى تالاپ ەتەدى ەكەن.
كاسىپكەرلەر كۇماندى «تەكسەرۋشىلەردىڭ» ءىس-ارەكەتى تۋرالى الەۋمەتتىك جەلىلەرگە جازىپ, وبلىستىق كاسىپكەرلەر پالاتاسىنان اراشا سۇراۋدا.
الايدا جالعان تەكسەرۋشىنى اشكەرەلەۋدىڭ جولى وپ-وڭاي بولىپ شىقتى.
– بارلىق رەيدتتەر مىندەتتى تۇردە infokazakhstan.kz سايتىندا تىركەلەدى. مونيتورينگتىك توپتىڭ قۇرامى مەن تەكسەرىلەتىن نىسان دا وسى سايتتا كورسەتىلۋگە ءتيىس. تەكسەرۋدىڭ زاڭدى, نە زاڭسىز ەكەنىن بىلاي تەكسەرۋگە بولادى. ول ءۇشىن اكتىدە كورسەتىلگەن QR-كودتى سكانەرلەۋ قاجەت. بار بولعانى وسى, كاسىپكەر وسىلايشا وزىنە كەلىپ تۇرعانداردىڭ ناعىز تەكسەرۋشىلەر نەمەسە الاياقتار ەكەنىنە وپ-وڭاي كوز جەتكىزە الادى, – دەدى قوستاناي وبلىستىق كاسىپكەرلەر پالاتاسىنىڭ ءبولىم باستىعى روبەرت يۋسۋپوۆ.
ەستەرىڭىزگە سالا كەتسەك, مونيتورينگتىك توپتاردىڭ جۇمىس الگوريتمىندەگى مۇنداي تالاپتار شىلدەنىڭ بىرىنەن باستاپ پايدا بولعان. ەندى infokazakhstan.kz پلاتفورماسىنىڭ كومەگىمەن بيزنەس نىسانداردى تەكسەرۋگە شىققان ءار توپتىڭ قىزمەتىن, ولاردىڭ قۇرامىندا نەشە ادام بارىن, جوسپار بويىنشا قانداي نىساندار تەكسەرىلەتىنىن, ولاردىڭ ناتيجەسىنە دەيىن باقىلاپ وتىرۋعا بولادى.
قوستاناي وبلىسى