اقتوبە قالاسىنداعى دوستىق ءۇيىنىڭ اشىلۋ سالتاناتىنا ەلباسى نۇرسۇلتان نازارباەۆتىڭ ءوزى قاتىسىپ, وسىنداعى ەتنومادەني بىرلەستىكتەر وكىلدەرىمەن كەزدەسىپ, ەمەن-جارقىن اڭگىمەلەسكەن-ءدى. سودان بەرى نەبارى جارتى جىل وتسە دە دوستىق ءۇيى شىن مانىندە ۇلتتار دوستىعى مەن ىنتىماقتاستىعىنىڭ ىستىق ۇياسىنا اينالدى. مۇندا قوعامدىق, ساياسي جانە ءمادەني شارالار ءجيى وتكىزىلىپ تۇرادى.
وبلىس اكىمى ەلەۋسىن ساعىندىقوۆتىڭ باستاماسىمەن سالىنعان دوستىق ۇيىندە وبلىسىمىزدا ءتىركەلگەن 18 ەتنومادەني بىرلەستىك پەن جەكسەنبىلىك مەكتەپتەرگە ارنالعان بولمەلەردەن باسقا ۇلكەن كونتسەرت زالى, 300 ورىندىق سالتانات زالى, حورەوگرافيا زالى, كونفەرەنتس-زال, مۇراجاي, لينگۆيستيكالىق بولمە بار. وسى شاڭىراق استىندا ورىن تەپكەن ورتالىقتار مۇشەلەرى ءوز انا تىلدەرىن, سونداي-اق مەملەكەتتىك ءتىلدى وقىپ-ۇيرەنۋگە, سالت-داستۇرلەرىن, ءمادەنيەتىن جاڭعىرتۋعا مۇمكىندىك الىپ وتىر. ازىرگە 18 ەتنومادەني ءبىرلەستىكتىڭ التاۋىندا اشىلعان جەكسەنبىلىك مەكتەپتەردە 100-دەن استام ادام قازاق ءتىلىن وقيدى. ولاردىڭ ىشىندە ۋكرايندار, تاتارلار جانە كورەيلەر ءوز تىلدەرىن بىرنەشە توپقا ءبولىپ وقىتۋدى قولعا الىپتى. سونداي-اق, ءازىربايجاندار, ارمياندار مەن نەمىستەر دە جەكسەنبىلىك مەكتەپتەرىن اشقان.
بىرلەستىكتەر جانىنان كوركەمونەرپازدار ۇجىمدارى قۇرىلعان. وبلىس ورتالىعىندا وتەتىن ءتۇرلى ساياسي-مادەني شارالارعا ۇدايى قاتىساتىن ۋكراينداردىڭ بىرلەستىگى جانىنداعى “وكسانا” فولكلورلىق ءانسامبلى مەن حور ۇجىمىنىڭ, “يازگى موننار” تاتار بي انسامبلىنىڭ, بولگارلاردىڭ “ۆيارا” فولكلورلىق انسامبلىنىڭ ونەرىمەن اقتوبەلىكتەر جاقسى تانىس. “وكسانا” فولكلورلىق انسامبلىنىڭ, “فايلحەن” ءانسامبلىنىڭ, “چحيسون” جانە “يازگى موڭنار” بي انسامبلدەرىنىڭ حالىقتىق اتاقتارى بار. دوستىق ۇيىندەگى مۇراجايدا قازىردىڭ وزىندە ءار ەتنوس وكىلدەرى تاپسىرعان 100-دەن استام جادىگەر بار. بۇل جادىگەرلەر سول ۇلتتىڭ تاريحىنان, اتا كاسىبىنەن, تۇرمىس-سالتىنان, مادەنيەتىنەن حاباردار ەتەدى.
وسىندا قازاقستان حالقى اسسامبلەياسى جانىنداعى “بىرلىك اقساقالدار كەڭەسى جۇمىس ىستەيدى. وعان ۇزاق جىلدار بويى وبلىستىق گازەتتىڭ رەداكتورى بولعان قارت جۋرناليست نۇرعايىر تەلەۋوۆ جەتەكشىلىك ەتەدى. “بىرلىك” اقساقالدار كەڭەسى ءوز جۇمىسىن مەملەكەتتىك ورگاندارمەن, قوعامدىق جانە ءدىني بىرلەستىكتەرمەن, اۋماقتىق ءوزىن-ءوزى باسقارۋ ورگاندارىمەن, ەتنومادەني بىرلەستىكتەرمەن, باسقا دا ۇيىمدارمەن تىعىز بايلانىستا جۇزەگە اسىرۋعا باعىت ۇستاۋدا. دوستىق ۇيىندەگى سان الۋان جۇمىستاردىڭ وبلىستاعى تۇراقتىلىق پەن بىرلىككە قىزمەت ەتىپ جاتقانى ايقىن اڭعارىلادى.
ساتىبالدى ءساۋىرباي, اقتوبە وبلىسى.