بۇگىن ەلوردادا قازاقستاندىق ديپلومات باقىتبەك شابارباەۆقا پاكىستان پرەزيدەنتىنىڭ اتىنان «سيتارا ي-پاكىستان» («پاكىستان جۇلدىزى») ماراپاتىن تابىستاۋ ءراسىمى ءوتتى, دەپ حابارلايدى Egemen.kz قازاقپاراتقا سىلتەمە جاساپ.
باقىتبەك شابارباەۆ 11 جىل بويى قازاقستاننىڭ پاكىستانداعى ەلشىسى لاۋازىمىن اتقاردى. وسى قىزمەت جولىندا ەكى ەل اراسىنداعى تاۋار اينالىمى بىرنەشە ەسەگە ارتتى.
«ايتا كەتسەك, 1992 جىلى پاكىستاندا قازاقستان ەلشىلىگى اشىلعان كەزدە سول كوماندانىڭ مۇشەسى بولعان. جالپى ول ءبىزدىڭ ەلدە 20 جىلعا جۋىق ۋاقىت قىزمەت ەتتى. وسى ورايدا ودان ۇلگى الارلىق جاعدايلار بارشىلىق. بۇل رەتتە باقىتبەك شابارباەۆ ءبىز ءۇشىن ۇلكەن قۇرمەت پەن ابىرويعا يە», دەدى پاكىستان يسلام رەسپۋبليكاسىنىڭ ەلشىسى سادجاد احمەد سيحار.
سونىمەن قاتار ول ب. شابارباەۆتىڭ قازاقستان مەن پاكىستان اراسىندا قارىم-قاتىناستى نىعايتۋعا قوسقان ۇلەسىن ەسكەرە وتىرىپ, پاكىستان پرەزيدەنتى «سيتارا ي-پاكىستان» ماراپاتىن تابىستايتىنىن ايتتى.
«بۇل ماراپات 2020 جىلى تابىستالۋى ءتيىس ەدى. الايدا ءتيىستى سەبەپتەرگە بايلانىستى باقىتبەك مىرزا پاكىستانعا بارا الماي قالدى. سوندىقتان بۇل ماراپاتتى بۇگىن نۇر-سۇلتان قالاسىندا تابىستاۋ ءراسىمىن ۇيىمداستىردىق. پاكىستان پرەزيدەنتى اتىنان قازاقستاننىڭ بەلگىلى ديپلوماتىن ماراپاتتاۋ ءبىز ءۇشىن زور مارتەبە», دەدى سادجاد احمەد سيحار.
«سيتارا ي-پاكىستان» - اتالعان ەلدىڭ جوعارى ازاماتتىق ماراپاتى. ونى پاكىستان پرەزيدەنتى شەتەل ازاماتتارىنا ەرەن ەڭبەگى ءۇشىن تابىستايدى.
ەسكە سالا كەتەيىك, 2018 جىلى قاڭتاردا مەملەكەت باسشىسىنىڭ جارلىعىمەن «قازاقستان رەسپۋبليكاسىنىڭ مەملەكەتتىك قىزمەتى تۋرالى» قر زاڭىنا سايكەس, زەينەتكەرلىك جاسقا تولۋىنا بايلانىستى باقىتبەك سەيسەباي ۇلى شابارباەۆ قازاقستان رەسپۋبليكاسىنىڭ پاكىستان يسلام رەسپۋبليكاسىنداعى توتەنشە جانە وكىلەتتى ەلشىسى قىزمەتىنەن, قازاقستان رەسپۋبليكاسىنىڭ بانگلادەش حالىق رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋدان بوساتىلدى.