قوستاناي وبلىسىندا Ashyq جۇيەسىنىڭ كومەگىمەن قوعامدىق ورىنداردا, كوپشىلىك ورتادا ەركىن قىدىرىپ جۇرگەن «قىزىل» مارتەبەلى – 175, «سارى» مارتەبەلى 146 ادام انىقتالدى. ولاردىڭ ىشىندە ليساكوۆ, رۋدنىي, قوستاناي قالالارىنىڭ, سونداي-اق قوستاناي جانە التىنسارين اۋداندارىنىڭ تۇرعىندارى بار ەكەنى انىقتالىپ وتىر.
– ول ازاماتتار اينالاسىنداعى ادامدارعا قاۋىپ توندىرەتىنىن جاقسى بىلەدى. بىراق, وكىنىشكە قاراي, ءۇي كارانتينىندە جاتقانداردىڭ كەيبىرى دارىگەرلەر قويعان تالاپقا جاۋاپكەرشىلىك تانىتپاي, كوپشىلىك ورىندارعا شىعۋىن توقتاتار ەمەس. ولاردى ءبىز Ashyq قوسىمشاسى ارقىلى انىقتايمىز. وڭ ناتيجە كورسەتكەندەردىڭ ءبارى وسى قوسىمشاعا ەنگىزىلەدى, – دەدى وبلىستىڭ باس سانيتارلىق دارىگەرى ەرمۇحانبەت داۋلەتباەۆ.
رەسمي مالىمەتتەر بويىنشا, وتكەن اپتادا وبلىستا ءۇي كارانتينى ءتارتىبىن بۇزعان 10 ادامعا حاتتاما تولتىرىلىپ, ولاردىڭ ءبارى 30 اەك كولەمىندە ايىپپۇل سالۋ تۇرىندەگى اكىمشىلىك جاۋاپكەرشىلىككە تارتىلعان. باس سانيتاردىڭ سوزىنشە, ءدال قازىر قالعان ءتارتىپ بۇزۋشىلاردى جاۋاپكەرشىلىككە تارتۋ مۇمكىن بولماي تۇر, ويتكەنى ولار ءالى كارانتيندە جاتىر.
– ءتارتىپ بۇزۋشىلاردىڭ كوبى قازىر ءۇي كارانتينىندە جاتىر. ولاردى جاۋاپكەرشىلىككە تارتۋ ءۇشىن ءبىز شاقىرتۋ جىبەرۋىمىز كەرەك. بۇل كارانتين مەرزىمى اياقتالعان سوڭ عانا مۇمكىن بولادى. ءۇي كارانتينىن بۇزعانداردىڭ بارىنە اكىمشىلىك ءىس قوزعالدى. جاۋاپكەرشىلىككە تارتىلعانداردىڭ ءبىرازى ءوز مارتەبەلەرىن تەكسەرىپ كورۋ ءۇشىن سمارتفوندارىن بىرەۋلەر ارقىلى بەرىپ جىبەرگەنىن ايتىپ جاتىر. مۇنداي جاعدايلاردىڭ ءبارى تەكسەرىلەدى, – دەدى باس سانيتارلىق دارىگەر.
Ashyq ارقىلى انىقتالعان جالپى سانى 321 «قىزىلدىڭ» 55-ءى وزگە وڭىرلەردىڭ تۇرعىندارى ەكەن. سانيتارلىق-ەپيدەميالىق باقىلاۋ دەپارتامەنتىنىڭ ماماندارى ولاردىڭ ءىسىن وزدەرى تۇراتىن مەكەندەردەگى قۇزىرلى مەكەمەلەرگە جىبەرگەن. ال سىرقاتتارمەن بايلانىستا بولعانى ءۇشىن «سارى» مارتەبەسىنە يە بولعاندارعا, قازىرشە, ايىپپۇل سالىنبايدى, قۇزىرلى ورگاندار ولارعا ەسكەرتۋ بەرۋمەن عانا شەكتەلىپ وتىر.
ءۇي كارانتينىن بۇزعانداردىڭ اتى-ءجونى جالپىعا قولجەتىمدى سانيتارلىق-ەپيدەميالىق باقىلاۋ دەپارتامەنتىنىڭ رەسمي سايتىنا ەنگىزىلدى.
قوستاناي وبلىسى