...جاقىندا وتكەن ءبىر ادەمى ادەبي كەشتە قىرعىز حالقىنىڭ ءانى شىرقالدى. “ماحابباتىم ساعان ارنالادى” دەپ تۇيىندەلەتىن سول ءان “بەگىمايدىڭ جىرى” دەپ اتالادى ەكەن. قازاق دالاسىندا قىرعىز باۋىرىمنىڭ ەلگە, جەرگە دەگەن ساعىنىشى ءجۇرەكتەردە جىر بولىپ تۇنىپ جاتىر. ال قىرعىزدىڭ ءوز جەرىندە قانتوگىس. جۇرەگىم ءدىر ەتە قالدى. بەرەكە, بىرلىك بولماعان جەردى شايتان جايلايدى دەۋشى ەدى. سول راس بولىپ شىقتى. بىراق ايىرقالپاقتى اعايىندارىمدى جاماندىققا قيمادىم.
قازاقستاننىڭ تۇڭعىش پرەزيدەنتى نۇرسۇلتان نازارباەۆ ەل تاۋەلسىزدىگىن جاريالاعاننان بەرى قاي جەردە, قاي جيىندا بولسا دا بەرەكە, بىرلىكتىڭ ءمانىن ۇعىندىرىپ كەلەدى. ىنتىماعى جوق حالىقتىڭ قانداي كۇيگە ۇشىراعانىن كورىپ ءجۇرمىز عوي.
قازاقستاندا تىرشىلىككە تىنىس بەرىپ, جۇرەككە نۇر سەبەتىن مامىر ايى حالقىمىزدىڭ بىرلىگى مەرەكەسىمەن باستالادى. بۇل – باسىمىزعا قونعان باقتى ىنتىماققا جەتەلەيتىن مەيرام. ەلباسىمىزدىڭ اڭساعان ارمانى دا وسى. پرەزيدەنتىمىز ۇيىتقى بولعان ىنتىماق وسى مەرەكەنىڭ نەگىزگى وزەگىنە اينالىپ, اينالانى التىن نۇرعا بولەپ تۇر.
جاقىندا عانا ۆاشينگتوندا وتكەن يادرولىق قاۋىپسىزدىك ءجونىندەگى جاھاندىق سامميتكە جينالعان الپاۋىت ەلدەردىڭ باسشىلارى قازاقستان پرەزيدەنتىنە ەرەكشە قۇرمەت كورسەتتى. بۇل نە قۇدىرەت!؟ اقش پرەزيدەنتى باراك وبامانىڭ ءوزى قازاقستاندى يادرولىق قارۋسىزدانۋ جونىندەگى الەمدەگى كوشباسشى ەل دەپ اتاپ, ەلباسىنىڭ وسى سالاداعى ەڭبەگىن ەرلىك دەپ باعالادى. ويتكەنى, قازاقستان يادرولىق قارۋدان ءوز ەركىمەن باس تارتقان الەمدەگى ءبىرىنشى ەل بولىپ تانىلعانىن 90-شى جىلداردىڭ جىلناماسى كەزىندە تالاي رەت جازعان. ارادا جيىرما جىل ۋاقىت وتكەنىمەن, قازاقستاننىڭ بۇل باستاماسىن بەيبىتشىلىكتى قولدايتىن الەم حالقى ۇنەمى ايتىپ كەلەدى. كەشەگى جاھاندىق سامميت سونىڭ ءبىر دالەلى رەتىندە ەستە قالدى. قازاقستان تاعى دا حالىقارالىق قوعامداستىق تاراپىنان جوعارى باعالاندى.
بيىل قازاقستان بارىسى سەرپىندى سەكىرىس جاسادى. ەۋروپاداعى قاۋىپسىزدىك پەن ىنتىماقتاستىق ۇيىمىنا مۇشە 56 مەملەكەت قازاقستانعا ەۋروپا ءتورىن ۇسىندى. ەقىۇ تاريحىندا تۇڭعىش رەت ازيا ەلدەرى ىشىندە قازاقستان بيىك تۇعىرعا كوتەرىلدى. رەۆوليۋتسيا جاساعىش ۋكراينا مەن قىرعىزستان دا قينالعاندا جانىنا جۇبانىش ىزدەيتىن ەل وسى ءبىزدىڭ قازاقستان بولىپ تۇر. كەشە ەلىمىزگە كەلگەن بۇۇ باس حاتشىسى بارلىق ەلدەردى قازاقستاننان ۇلگى الۋعا شاقىردى. مۇنىڭ ءبارى ەلباسىمىزدىڭ ەرەن ەڭبەگى ناتيجەسىندە بولىپ جاتقانىن ۇمىتپايىق, اعايىن!
ءيا, “تورتەۋ تۇگەل بولسا توبەدەگى كەلەدى, التاۋ الا بولسا اۋىزداعى كەتەدى”. بۇل – ەلباسىمىزدىڭ قايتالاۋدان جالىقپايتىن ماقالى. كەشەگى ارقا ءتورىندەگى باتپاقتان باس قالا – استانانى كوتەرگەن ۇلى تىرلىك وسى ءبىرلىكتىڭ ارقاسىندا بولدى دەسەك, قاتەلەسپەيمىز. الەمدىك جانە ءداستۇرلى ءدىندەر جەتەكشىلەرىن ءبىر شاڭىراقتىڭ استىنا جيناپ, ادامزاتتى ءتۇرلى قاتەردەن ساقتاۋ ءجونىندەگى مامىلەنى كوتەرگەن دە ەلباسىمىز. جەر-جەردەگى تارىداي شاشىلىپ كەتكەن قازاقتاردى اتاجۇرتقا كەلىڭدەر دەپ ءۇندەگەن دە – ەلباسىمىز. مەككە مەن مەدينەدە, پايعامبارىمىزدىڭ قاعباسىندا تۇرىپ, حالقىنا ساۋلىق, ەلىنە تىنىشتىق تىلەگەن دە وسى ەلباسىمىز بولاتىن. حالىقتىڭ بىلىمىنە دەنساۋلىعى ساي بولسىن دەپ “100 مەكتەپ, 100 اۋرۋحانا” سالىپ بەرىپ جاتىر. مىنە, ەندى “بالاپان” باعدارلاماسى دا قاناتىن قومداپ تۇر.
ارينە, ەلباسىمىزدىڭ تۋعان ەلى ءۇشىن جاساپ جاتقان ۇشان-تەڭىز ەڭبەگىن تۇگەلدەي ءتىزىپ شىعۋ ءمۇمكىن ەمەس. كوزىقاراقتى وقىرمان ونى كۇندەلىكتى گازەت-جۋرنالداردان وقىپ, تەلەديدار مەن راديودان كورىپ-تىڭداپ جاتقانى انىق. وزدەرىنىڭ ەلباسىنا دەگەن قۇرمەتىن, ىستىق ىقىلاسىن, العىسىن “پرەزيدەنت پوشتاسىنا” جولداپ جاتقاندار تىپتەن كوپ.
ءبىز حالىق قالاۋلىسى رەتىندە سايلاۋشىلارمەن ءجيى جۇزدەسەمىز. كونەكوز قاريالارمەن كەڭەسىپ, ارداگەرلەردىڭ اماناتتارىن ەستىپ, ارقالانىپ قالامىز. البەتتە, اڭگىمە ەلدىڭ تۇتقاسى بولىپ وتىرعان ەلباسىنان باستالادى. “پرەزيدەنتكە بالاما جوق!” – دەيدى ولار. نە ءۇشىن ايتتى ەكەن دەپ ويلانىپ قالامىز. سودان كەيىن سۋىرتپاقتاپ سىر تارتامىز عوي ەندى. ولاردىڭ ءۋاجى سالماقتى شىعادى. تارازىلاپ كورەيىك.
قازاقتا “كەدەي باي بولسام, باي قۇداي بولسام” دەيدى دەگەن ءسوز بار. كەدەيدىكى دۇرىس, ال بايدىڭ قۇداي بولعىسى كەلەتىنى اسىلىق ەندى. قاي ءبىر جىلى پرەزيدەنتتىك تاققا 4-5 ادام تالاستى. دۇرىس, دەموكراتيا بولسىن دەگەن شىعار. بىراق, حالىق ءوزىنىڭ تۇڭعىش پرەزيدەنتى, تاۋەلسىزدىك العاننان بەرى ەلدىڭ ىستىعىنا كۇيىپ, سۋىعىنا توڭىپ كەلە جاتقان نۇرسۇلتان نازارباەۆقا داۋىس بەردى. حالىق بۇل جولى دا قاتەلەسپەدى. ەل ەكونوميكاسى ىلگەرى جىلجىپ, ءال-اۋقات دەڭگەيى كوتەرىلدى. ءتىپتى كەشەگى الەمدى دۇرلىكتەرگەن داعدارىسقا دا دامۋمەن جاۋاپ بەردى. وسىندايدا “تاق تالاسى” كەزىندە “قازاقستاندى بايلىققا بەلشەسىنەن باتىرامىز” دەپ ءۇيىپ-توگىپ ۋادە بەرگەن الگى ازاماتتارىمىز قايدا ءجۇر دەگەن سۇراق تۋادى. پرەزيدەنتتىككە وتپەي قالعانىمەن, ەل ازاماتى رەتىندە ەلباسىمەن قاتارلاسىپ, قاناتتاسىپ نەگە ءجۇرمەيدى ولار. كەيبىر تاۋەلسىز باسىلىمدار ەلدەگى تاتۋ تىرلىككە قارا كۇيە جاعىپ جاتقاندا نەگە “قويىڭدار” دەمەيدى. بارىمىزگە ەل ورتاق, جەر ورتاق, پرەزيدەنت ورتاق. ەندەشە, ەلدىڭ بىرلىگى مەن تاتۋ-ءتاتتى ءتىرلىگى ءۇشىن ىنتىماقتاسىپ جۇمىس ىستەگەن ءجون-اۋ, ءوزى. ال سەندەر, حالىق قالاۋلىسى رەتىندە وسىعان ۇيىتقى بولىڭدار, دەيدى زيالى قاۋىم.
جالپى, ءوز باسىم ەلباسىمىز قولعا العان ءىستىڭ قاشان دا جەڭىسپەن اياقتالاتىنىنا سەنىمدىمىن. قابىرعالى حالقى, ەڭسەلى ەلى تۇرعاندا قازاقستاننىڭ بيىگى الاسارمايدى.
پەرنەبەك رايىمبەكوۆ, وبلىستىق ءماسليحاتتىڭ دەپۋتاتى. وڭتۇستىك قازاقستان وبلىسى.