ساۋدا جانە ينتەگراتسيا ءمينيسترى باقىت سۇلتانوۆ قازاقستاندا كوكونىس باعاسى قاشان ارزاندايتىنىن ايتتى, دەپ حابارلايدى Egemen.kz.
«كارتوپ باعاسىنىڭ ماۋسىمدىق ءوسۋى ءساۋىر مەن ماۋسىم ارالىعىندا تىركەلدى. ودان ءارى وڭتۇستىك وڭىرلەردە ەرتە پىسەتىن كارتوپتىڭ ونىمدىلىگى ارتقان سايىن ءونىم باعاسى تومەندەدى. ماكسيمالدى ءوسۋ ساتىنەن باستاپ باعا 26%-عا نەمەسە 54 تەڭگەگە تومەندەدى. تامىز جانە قىركۇيەك ايلارىندا سولتۇستىك ايماقتاردا جاپپاي ەگىن جينالادى, بۇل كارتوپ باعاسىنىڭ ودان ءارى تومەندەۋىنە ىقپال ەتەدى», دەپ مالىمدەدى ساۋدا مينيسترلىگىنىڭ باسشىسى ۇكىمەت وتىرىسىندا.
سونىمەن قاتار 557 مىڭ توننادان استام ءسابىز جيناۋ جوسپارلانىپ وتىر. بۇل باعانى ايتارلىقتاي تومەندەتۋگە مۇمكىندىك بەرەدى.
«پياز بەن قىرىققابات باعاسى ءالى دە وسۋدە. جىل باسىنان بەرى پياز 29% - 23 تەڭگەگە قىمباتتادى. قىرىققابات باعاسى 22 پايىزعا ءوستى. سايكەسىنشە, باعانىڭ تومەندەۋى تەك تامىزدىڭ اياعىندا كۇتىلەدى», دەپ قورىتىندىلادى سۇلتانوۆ.