بۇگىندە سىر ايماعىندا باستالعان “باتىس ەۋروپا-باتىس قىتاي” كۇرەجول قۇرىلىسى قارقىن الا باستادى. وبلىس اۋماعىندا 817 شاقىرىم جولدى قامتيتىن قۇرىلىسقا قاجەتتى ماتەريالدار – قيىرشىقتاس جانە شاعىرتاس ءوندىرۋ شۇعىل قولعا الىنۋدا. كۇنى كەشە شيەلى اۋدانىنا قاراستى قاراتاۋ بوكتەرىندە ايماقتىڭ باستى قازىناسىنىڭ ءبىرى – قيىرشىقتاس وندىرەتىن زاۋىت ىسكە قوسىلدى.
“كازۆەرنال” جشس نەگىزىندە جۇمىس ىستەيتىن تۇركيالىق ماماندار جاڭا تەحنيكالاردى ءوندىرىس الاڭىنا اكەلىپ تە ۇلگىرىپتى. قاراتاۋ بوكتەرىندە قۇلشىنا ىسكە قوسىلعان ەكسكاۆاتورلار جاپونيادان, ال جۇك كوتەرگىشتەر اقش-تان اكەلىنگەن. سونداي-اق, گوللانديادان الىنعان الىپ تەحنيكالار دا تاس ءوندىرۋ جۇمىستارىنا جۇمىلا كىرىسىپ كەتكەن. زاۋىت جۇمىسى بۇگىنگى كۇن تالابىنا ساي كومپيۋتەر ارقىلى باسقارىلىپ, تاۋلىگىنە 5 مىڭ توننا كولەمىندە قيىرشىقتاس ءوندىرىلىپ, وڭدەلۋدە ەكەن.
زاۋىتتا جۇمىس ىستەيتىن جۇمىسشى-مەحانيزاتورلارعا بارلىق جاعداي جاسالعان. ولارعا جاتاقحانا, اسحانا, سپورت الاڭى, تاعى باسقا مادەني ورىندار قالتقىسىز قىزمەت كورسەتۋدە.
زاۋىتتىڭ اشىلۋ سالتاناتىنا نىساننىڭ باس قۇرىلتايشىسى, ەسىمى ەلىمىزگە تانىمال سپورتشى داۋلەت تۇرلىحانوۆ سوناۋ استانادان اتباسىن بۇرىپ كەلدى.
– الداعى ۋاقىتتا, بۇل زاۋىتتا 150 ادام جۇمىس ىستەيتىن بولادى. دەمەك, جەرگىلىكتى تۇرعىنداردى جۇمىسقا تارتۋعا ۇمتىلىس جاسالماق. تەك ايتارىم, ولار زاماناۋي جاڭا تەحنيكالاردىڭ ءتىلىن مەڭگەرۋلەرى, ياعني وقىپ, ۇيرەنۋگە بەل شەشە كىرىسۋلەرى قاجەت, – دەيدى د.تۇرلىحانوۆ.
قيىرشىقتاس زاۋىتىنىڭ اشىلۋ راسىمىنە كولىك جانە كوممۋنيكاتسيا مينيسترلىگى اۆتوموبيل جولدارى كوميتەتىنىڭ توراعاسى زامير ساعىنوۆ, وبلىس اكىمىنىڭ ورىنباسارى ماديار الدوڭعاروۆ قاتىستى.
ەركىن ءابىل, قىزىلوردا.