فرانتسيادا رەسپۋبليكا تۇرعىندارىن بەلگىلى ءبىر جەرلەردە ۆاكتسينا پاسپورتىن كورسەتۋگە مىندەتتەيتىن ەرەجەلەر كۇشىنە ەندى, دەپ حابارلايدى Egemen.kz.
ەندى فرانتسيا تۇرعىندارى كافەگە, مەيرامحاناعا كىرۋ ءۇشىن جانە الىس ساپارعا شىعار الدىندا ۆاكتسينا پاسپورتىن نەمەسە پتر تەست, انتيدەنەگە تەكسەرىلۋ انىقتاماسىن ۇسىنۋى ءتيىس.
فرانتسۋز بيلىگى بۇل ەرەجە ۆاكتسيناتسيانى تەزدەتۋگە جانە كوروناۆيرۋستىڭ ء«تورتىنشى تولقىنىنىڭ» الدىن الۋعا كومەكتەسەدى دەپ ۇمىتتەنەدى.
دەنساۋلىق ساقتاۋ ءمينيسترى وليۆە ۆەران فرانتسۋز باسپاسوزىنە بەرگەن سۇحباتىندا: «جاسىل پاسپورت بىزگە جاڭا كومەندانتتىق ساعاتتار مەن لوگداۋننىڭ الدىن الۋعا كومەكتەسۋى كەرەك», دەدى.
و.ۆەران وسىعان بايلانىستى ەرەجەلەردەگى كىشىگىرىم وزگەرىستەردى مالىمدەدى, اتاپ ايتقاندا, پتر تەستى بۇرىن جوسپارلانعانداي 48 ەمەس, 72 ساعاتقا جارامدى.
ەلدە بۇرىن ۆاكتسينا پاسپورتى مادەني ورىندارعا, تەاتر جانە مۋزەيگە بارعان كەزدە عانا سۇرالاتىن.
5 تامىزداعى جاعداي بويىنشا فرانتسۋز حالقىنىڭ 49,7 پايىزى COVID-19 ۆاكتسيناسىنىڭ ەكى دوزاسىن الدى. الايدا كورسيكا مەن جەرورتا تەڭىزى جاعالاۋىندا ينفەكتسيا جيىلىگى ارتىپ كەلەدى. سەبەبى قازىر بۇل ايماقتا دەمالۋشىلار كوپ.
فرانتسيانىڭ ءۇندى مۇحيتى مەن كاريب تەڭىزىندە جاقىن اۋماقتارىندا ۆاكتسيناتسيا باياۋ ءجۇرىپ جاتىر. سول سەبەپتى اتالعان وڭىردە جاڭا شەكتەۋلەر ەنگىزىلگەن.
جاقىندا جۇرگىزىلگەن الەۋمەتتىك ساۋالنامالار فرانتسۋزداردىڭ باسىم كوپشىلىگى ۆاكتسينا پاسپورتىن قولدايتىنىن كورسەتتى.
سوڭعى كۇندەرى پرەزيدەنت ە.ماكرون جاستار اراسىندا تانىمال TikTok الەۋمەتتىك جەلىسىندە ەل ازاماتتارىن ۆاكتسينا الۋعا شاقىردى.
«بۇل ۇلگىلى ازامات بولۋ ماسەلەسى. ەگەر ءبىز دوستارىمىزعا, كورشىلەرىمىزگە نەمەسە اتا-اجەلەرىمىزگە جۇقتىرساق, ەركىندىگىمىزدىڭ قۇنى جوق. ەركىن بولۋ - جاۋاپتى بولۋ دەگەن ءسوز», دەدى فرانتسيا پرەزيدەنتى.