توكيودا ءوتىپ جاتقان تورتجىلدىقتىڭ باستى دوداسىندا ەرتەڭ كاراتەشىلەرىمىز ونەر كورسەتەدى. وليمپيا ويىندارىنىڭ باعدارلاماسىنا العاش رەت قوسىلعان سپورت تۇرىنەن جالپى سانى سەگىز مەدال جيىنتىعى ساراپقا سالىنادى.
جاپوننىڭ ءتول سپورتى سانالاتىن كاراتە قازاققا دا جات ەمەس. ونى سپورتشىلارىمىزدىڭ سوڭعى جىلدارى حالىقارالىق جارىستاردا كورسەتىپ جۇرگەن ناتيجەلەرىنەن-اق بايقاۋعا بولادى. دارحان ءاسادىلوۆ, دانيار يۋلداشەۆ, قايسار الپىسباي, ديدار ءامىرالى, سوفيا بەرۋلتسەۆا, سابينا زاحاروۆا سىندى قىز-جىگىتتەرىمىز الەم نەمەسە ازيا دەڭگەيىندەگى تالاي بايراقتى باسەكەلەردە توپ جارىپ, الاش جۇرتىنىڭ ابىرويىن اسقاقتاتىپ ءجۇر. ەندىگى كەزەكتە – وليمپيا ويىندارى. توكيو تورىندە وتەتىن كاراتە جارىستارىندا ەل نامىسىن قورعايتىن سپورتشىلارىمىز ءوز مۇمكىندىكتەرىن ءمۇلت جىبەرمەۋى ءتيىس.
توكيو وليمپياداسىنا ەلىمىزدەن بەس كاراتەشى جولداما العانى بارشامىزعا بەلگىلى. ولاردىڭ اراسىندا دارحان اسادىلوۆكە ارتىلار سەنىم زور. دارحان – الەم چەمپيوناتىنىڭ ەكى دۇركىن جۇلدەگەرى, ازيا ويىندارىنىڭ چەمپيونى جانە پرەمەر-ليگا جارىسىنىڭ بىرنەشە دۇركىن جەڭىمپازى. وليمپيا ويىندارىنا الەمدىك رەيتينگ ارقىلى جولداما العان وتانداسىمىز سوڭعى ەكى جىلدا ۇزدىك كورسەتكىشتەرگە قول جەتكىزدى. ماسەلەن, 2019 جىلى ول التى (!) بىردەي جارىستا توپ جارسا, ەكى جارىستا قولا جۇلدەگەر اتاندى. بىلتىر پاندەمياعا بايلانىستى ءۇش جارىسقا عانا قاتىسىپ, سونىڭ ۇشەۋىندە دە جۇلدە الدى. ال بيىل تەك ليسسابونداعى پرەمەر-ليگاعا قاتىسىپ, ۇزدىك ۇشتىكتى تۇيىندەدى.
دارحاننىڭ وليمپيا ويىندارىنداعى قارسىلاستارى دا وسال ەمەس. ونىڭ ۇستىنە وتانداسىمىز توكيو تورىندە ءوزىنىڭ ۇيرەنشىكتى سالماعىندا (60 كيلو) ەمەس, 67 كيلودا ونەر كورسەتەدى. ياعني وليمپيادا باعدارلاماسىنداعى سالماق – 67 كيلو.
وليمپيا ويىندارىنا ءار سالماقتا ون ادامنان قاتىسادى. تەك 67 كيلودا ۇيىمداستىرۋشىلار 11 سپورتشى قوسىپ وتىر. ياعني ىرىكتەۋ كەزەڭىنەن وتكەن 10 مىقتىدان بولەك, حامۋن دەرافشيپۋر اتتى يراندىق سپورتشى بوسقىندار كومانداسىنىڭ اتىنان شىعادى. حامۋن قازىرگى تاڭدا كانادادا تۇرىپ جاتىر. 2018 جىلى مادريدتە وتكەن الەم چەمپيوناتىندا يران ەلىنە قولا مەدال سىيلاعان ول ءبىر جىل وتكەننەن كەيىن فەدەراتسيا باسشىلارىمەن كەلىسپەي, اقىرى كاناداعا قونىس اۋداردى.
دارحاننىڭ باستى قارسىلاسى رەتىندە, ارينە الەم چەمپيونى فرانتسۋز ستيۆەن دا كوستانى ايتۋعا بولادى. ول 2015 جىلدان بەرى ءوتىپ كەلە جاتقان ءىرى جارىستاردىڭ بارلىعىندا جۇلدە الىپ ءجۇر. نەگىزگى سالماعى دا – 67 كيلو. ياعني دارحانعا قاراعاندا بۇل سالماقتا ابدەن بوي ۇيرەتكەن سپورتشى.
ءاسادىلوۆتىڭ تاعى ءبىر باستى قارسىلاسى – جاپونيالىق ناوتو ساگو. كاراتەنى ءتول سپورتىمىز دەپ تانيتىن كۇنشىعىس ەلىنىڭ وكىلدەرى ساگوعا زور سەنىم ارتىپ وتىر. ونىڭ ۇستىنە كاراتە وليمپيادا باعدارلاماسىنا تۇڭعىش رەت قوسىلدى. تاريحتاعى العاش چەمپيون دا وسى 67 كيلودا انىقتالادى.
2018 جىلعى الەم چەمپيوناتىنىڭ جەڭىمپازى يتاليالىق اندجەلو كرەششەنتسو دا – باس جۇلدەدەن ۇمىتكەر سپورتشىلاردىڭ ءبىرى. يتاليا سپورتشىسىمەن دارحاننىڭ تالاي جارىستا جولى تۇيىسكەنىن بىلەمىز. سوڭعى رەت ەكەۋى بىلتىر دۋبايدا وتكەن پرەمەر-ليگانىڭ فينالىندا جولىعىپ, كرەششەنتسو 2:0 ەسەبىمەن جەڭىسكە جەتتى. سونداي-اق مىقتىلاردىڭ قاتارىنا تۇرىك ەراي سامداندى, لاتىش كالۆيس كالنينشتى دا قوسۋعا بولادى. قالاي بولعاندا دا دارحانعا ۇلكەن سەنىم ارتىلىپ وتىر. الاش القالاعان ءاسادىلوۆتىڭ اسىعى الشىسىنان تۇسە مە, جوق پا ونى الداعى سايىستاردا كورەتىن بولامىز.