ەل تاريحىنداعى اۋىل اكىمدەرىن تۇڭعىش رەت تىكەلەي سايلاۋ الماتى وبلىسىندا جوعارى بەلسەندىلىكپەن ءوتتى. ال وسى ساياسي باسەكە بارىسىنداعى ناتيجەگە سايكەس جەتىسۋ ولكەسىنىڭ 71 اۋىلدىق وكرۋگىنە سۋ جاڭا اكىم سايلانىپ وتىر.
ايتپاقشى, وڭىردە اۋىل اكىمى بولۋعا ىنتالىلار قاتارى كوپ بولدى. اۋەلدە ساياسي دودادا باق سىناۋشىلاردىڭ سانى 279 ۇمىتكەر بولسا, سايلاۋعا ناقتى 235 كانديدات قاتىستى. 44 ۇمىتكەر ءتۇرلى سەبەپتەرمەن كانديداتتار قاتارىنان الىنىپ قالدى. سايلاۋعا تۇسۋشىلەردىڭ 82-ءسى ساياسي پارتيا وكىلدەرى بولسا, 153 ۇمىتكەر – ءوزىن ءوزى ۇسىنعاندار.
– بۇعان دەيىن ىلە اۋدانى چاپاەۆ اۋىلىندا اكىمدىككە 9 كانديدات تىركەلدى دەپ ايتىلعان بولاتىن. بۇگىندە رەسمي دەرەك اتالعان وڭىردە 5 ۇمىتكەر قالعانىن راستاۋدا. اكىمدىككە ۇمىتكەرلەر ەڭ كوپ تىركەلگەن ايماق رەتىندە تالعار اۋدانى تانىلىپ وتىر. مۇندا ءبىر ورىنعا 6 ادامنان اينالدى, – دەيدى الماتى وبلىسى سايلاۋ كوميسسياسىنىڭ مۇشەسى قاھارمان جاقسىلىق.
ال قاراتال اۋدانىندا 6 كانديدات سايلاۋعا تۇسۋدە. سايلاۋ ناتيجەسىندە باستوبە جانە جولبارىس باتىر اۋىلدىق وكرۋگتەرىنە اكىم سايلانادى. ءار وكرۋگتە 3 كانديدات بار, ونىڭ بەسەۋى ەر ادام بولسا, بىرەۋى – ايەل. ولاردىڭ 4-ەۋى ءوزىن-ءوزى ۇسىنعان, 2-ەۋى – Nur Otan پارتياسىنىڭ وكىلدەرى.
شاعىن عانا باستوبە اۋىلدىق وكرۋگىنە قاراستى جىلىبۇلاق اۋىلىنداعى №5551 سايلاۋ ۋچاسكەسىندە 418 سايلاۋشى تىركەلگەن. تۇرعىنداردىڭ جارتىسىنان استامى تۇسكە دەيىن داۋىس بەرىپ, ءوز تاڭداۋىن جاساپتى.
– بۇگىنگى سايلاۋ ناۋقانىندا تۇرعىنداردىڭ بەلسەندىلىگىن اتاپ وتكەن ءجون. بارلىعى ازاماتتىق-قۇقىقتىق جاۋاپكەرشىلىگىن نەگىزگە الا وتىرىپ, ءوز ۇمىتكەرىنە داۋىس بەرۋدە. ءبىز تۇرعان ۋچاسكەدەگى سايلاۋ ءادىل, اشىق, ايقىن نەگىزدە وتۋدە. سايلاۋ بارىسىندا ەشقانداي زاڭعا قايشى ارەكەتتەر انىقتالعان جوق, – دەيدى Nur Otan پارتياسىنىڭ اتىنان كەلگەن بايقاۋشى راۋزا دوسماعۇلوۆا.
الماتى وبلىسىنىڭ سارقان اۋدانىنا قاراستى ەكىاشا اۋىلىندا تۇراتىن نۇرشات پەن حانشايىم اجەلەردىڭ قيمىلى شيراق, اينالاداعى وقيعاعا قۇلاعى تۇرىك ەكەن. اۋىلدا سايلاۋ وتەدى دەگەلى قاريالار ءوز تاڭداۋىن جاساۋدى ۇيعارىپتى. ەرتەمەن اشىلعان داۋىس بەرۋ ۋچاسكەسىنە كەلگەن قوس قاريا ەرتەڭ ەل تىزگىنىن ۇستايتىن اۋىلداسىن تاڭداعان كورىنەدى.
– بۇگىنگى سايلاۋ بىزدەر ءۇشىن ماڭىزدى. اۋىلىمىزدىڭ اكىمىن ءبىر اۋىزدان سايلاپ, اۋىلدىڭ كەمەل كەلەشەگىن جاڭا باسشىعا سەنىپ تاپسىرماقپىز. سوندىقتان دا سايلاۋدان تىسقارى قالماي ءوز داۋىسىمدى بەرۋگە كەلدىم. ءار تۇرعىن وتكىزىلىپ جاتقان سايلاۋدىڭ ماڭىزدىلىعىن ءتۇسىنىپ, تاڭداۋدى دۇرىس جاسايدى دەگەن سەنىمدەمىن, – دەيدى قارت انا حانشايىم.
الماتى وبلىسى