ءماجىلىس دەپۋتاتتارى وڭىرلەرگە ساپار بارىسىندا تۇرعىندارمەن كەزدەسىپ, قابىلداۋ وتكىزىپ, قوسىمشا پىسىقتاۋدى تالاپ ەتەتىن ماسەلەلەردى باقىلاۋعا الۋدا, دەپ حابارلادى تومەنگى پالاتانىڭ ءباسپاسوز قىزمەتى.
پاۆلودار وبلىسىندا دەپۋتاتتار ايگۇل نۇركينا, ۆەرا كيم جانە اناتولي بويچين جەرگىلىكتى تۇرعىنداردى قابىلداۋ بارىسىندا پاۆلودارلىقتار زياندى ەڭبەك جاعدايلارى بار وندىرىستە جۇمىس ىستەگەن زەينەتكەرلەر بويىنشا نورماتيۆتىك-قۇقىقتىق اكتىلەرگە وزگەرىستەر ەنگىزۋگە قاتىستى ماسەلەلەردى كوتەردى. سونىمەن قاتار قالا تۇرعىندارىن «ەكىنشى پاۆلودار» شاعىن اۋدانىندا جەراستى سۋلارىمەن ءجيى سۋ باسۋ ماسەلەسى تولعاندىراتىنىن دا اتاپ ءوتتى.
ال جەلەزين اۋدانىنىڭ تۇرعىندارى تەز ارادا شەشۋدى تالاپ ەتەتىن نەگىزگى پروبلەمالاردى كوتەردى. بۇلار: جىلۋ جەلىلەرى مەن قازاندىق جابدىقتارىنىڭ توزۋى, 500 ادامنان از حالقى بار اۋىلداردا ساپالى اۋىزسۋدىڭ بولماۋى, اقتاۋ, وزەرنوە, جاڭابىرلىك, كرۋپسكوە, رازدەلنوە, بەرەگوۆوە, ورلىتوبە, زاحاروۆكا, اققايىڭ, دۇيسەكە, پەتروپاۆلوۆكا اۋىلدارىندا ساپالى ۇيالى جانە ينتەرنەت بايلانىسىنىڭ بولماۋى. ءماجىلىس دەپۋتاتتارى اتالعان ماسەلەلەردىڭ شەشىمىن تابۋىن جەكە باقىلاۋعا الدى.
اتىراۋ وبلىسىندا ماجىلىسمەن دۇيسەنباي تۇرعانوۆتىڭ قابىلداۋىندا بولعان تۇرعىندار ەڭ الدىمەن جاعىمسىز ءيىس كوزى بولىپ تابىلاتىن بۋلانۋ القاپتارىنا قاتىستى ماسەلەلەردى كوتەردى. دەپۋتات اتىراۋ مۇناي وڭدەۋ زاۋىتىندا بولىپ, وندا بۋلانۋ القاپتارىن قالپىنا كەلتىرۋ كىرەتىن TAZALYQ جوباسىنىڭ ىسكە اسىرىلۋ بارىسىمەن تانىستى. زاۋىت باسشىلىعى ماسەلەنى جوسپارلانعان مەرزىمدە شەشۋگە ۋادە بەردى. سونىمەن قاتار اتىراۋلىقتار ازىق-ت ۇلىك باعاسىن كوتەرۋ, الەۋمەتتىك كومەك كورسەتۋ, زەينەتاقى مولشەرىن ارتتىرۋ ماسەلەلەرىن دە كوتەردى.
الماتى قالاسىندا ءماجىلىس دەپۋتاتى قانات نۇروۆ قالانىڭ بىرنەشە اۋدانىندا ازاماتتاردى قابىلدادى. قابىلاۋ بارىسىندا الەۋمەتتىك تۇرعىن ءۇيدى جەكەشەلەندىرۋ, تەمىر جول جولاۋشىلار بيلەتتەرىن الىپ-ساتۋشىلىق, مۇمكىندىگى شەكتەۋلى ادامداردى الەۋمەتتىك قامتاماسىز ەتۋ, وڭالتۋ ورتالىقتارىن سالۋ جانە تاعى باسقا دا بىرقاتار وزەكتى ماسەلە ورتاعا سالىندى.
ءماجىلىس دەپۋتاتتارى, Nur Otan پارتياسى فراكتسياسىنىڭ مۇشەلەرى مۇحتار ەرمان, بەرىك بەكجانوۆ جانە عاني تاشقاراەۆ شىمكەنت قالاسىنىڭ «قۇرساي» شاعىن اۋدانىندا سالىنىپ جاتقان مەكتەپ قۇرىلىسىنىڭ بارىسىمەن تانىستى. سونداي-اق شاعىن اۋدان تۇرعىندارىمەن كەزدەستى. كەزدەسۋدە بيىل ساپالى ءبىلىم بەرۋ ءۇشىن جاعداي جاساۋ ماقساتىندا 2021-2025 جىلدارعا ارنالعان كەشەندى جوسپار ءتۇزىلىپ, وسى ۋاقىت ىشىندە شىمكەنتتە 72 مەكتەپ قۇرىلىسى جۇرگىزىلەتىنى ايتىلدى. ونىڭ ىشىندە 2021 جىلى 18 732 ورىنعا ارنالعان 32 مەكتەپ قۇرىلىسى جۇرگىزىلىپ, جىل سوڭىندا 10 222 ورىنعا ارنالعان 20 مەكتەپ پايدالانۋعا بەرىلمەك. ناتيجەسىندە, اپاتتى مەكتەپ ماسەلەسى تولىعىمەن شەشىلىپ, ءۇش اۋىسىمدى مەكتەپتەر سانى 14-تەن 9-عا دەيىن ازاياتىنى, ال 2023 جىلعا دەيىن تۇپكىلىكتى شەشىلەتىنى مالىمدەلدى.
بۇدان بولەك, دەپۋتاتتار تۇرعىنداردىڭ ءوتىنىش-تىلەكتەرىن تىڭدادى.