ريددەردە ەلەكتر كابەلىن ۇرلاعاندار ۇستالدى

27 ماۋسىمدا پاترۋلدىك پوليتسيا ۆزۆودىنىڭ قىزمەتكەرلەرى ريددەر قالاسىنىڭ ل. تولستوي كوشەسى بويىنشا تۇنگى پاترۋلدەۋ باعىتىندا ۆاز اۆتوكولىگىن بايقاعان. كولىك جۇرگىزۋشىسى پوليتسيا قىزمەتكەرلەرىنەن جاسىرىنۋعا تىرىسقان.

قۇقىق قورعاۋ ورگاندارىنىڭ قىزمەتكەرلەرى دەرەۋ كولىكتى توقتاتقان. كولىك ىشىندە ريددەر قالاسىنىڭ 25 جانە 27 جاستاعى تۇرعىندارى بولعان.

اۆتوكولىكتى تەكسەرۋ بارىسىندا كولىكتىڭ جۇكسالعىشىندا قالاداعى جشس-ءنىڭ بىرىنە تيەسىلى ۇزىندىعى شامامەن 35 مەتردى قۇرايتىن ۆۆگ-4*16 قۋاتتى كابەلى تابىلدى.

تەرگەۋ بارىسىندا انىقتالعانداي, قىلمىسكەرلەر ريددەردەگى ورمان ءورتى بولعان اۋداندا ەلەكتر جەلىلەرى جوندەلىپ جاتقانى مەن كەرنەۋسىز تۇرعان ەلەكتر بەرۋ كابەلدەرى تارتىلىپ جاتقانىن ءبىلىپ, بوتەننىڭ مۇلكىن يەمدەنبەك بولعان. جالپى شىعىن سوماسى 107 000 تەڭگەنى قۇرادى. كۇدىكتىلەر بۇل ارەكەتىن تولىقتاي مويىندادى.

اتالعان فاكتى بويىنشا قر قك 188-بابى 2-بولىگى «ۇرلىق» بويىنشا سوتقا دەيىنگى تەرگەۋ جۇرگىزىلۋدە.