كەشە قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ اۆستريا رەسپۋبليكاسىنىڭ سىرتقى ىستەر ءمينيسترى ميحاەل شپيندەلەگگەرمەن تەلەفون ارقىلى سويلەستى, دەپ حابارلادى ءسىم-ءنىڭ ءباسپاسوز قىزمەتى.
اڭگىمەلەسۋشىلەر ەقىۇ شەڭبەرىندە جانە ەكىجاقتى نەگىزدەگى قارىم-قاتىناستاردىڭ كەڭ اۋقىمدى ماسەلەلەرىن تالقىلادى.
م.شپيندەلەگگەر قىرعىزستاندا ورىن العان ساياسي داعدارىسقا قاتىستى حالىقارالىق قوعامداستىقتىڭ ارەكەتىن ۇيلەسىمدى اتقارۋعا قازاقستاننىڭ ۇلەسى زور بولعانىن ەرەكشە اتاپ ءوتتى جانە ەلىمىزدىڭ ەقىۇ-عا توراعا مەملەكەت رەتىندەگى قىزمەتىنە جوعارى باعا بەردى.
اۆستريانىڭ سىرتقى ساياسات ۆەدومستۆوسىنىڭ باسشىسى بيىل 16-17 شىلدە كۇندەرى الماتىدا وتەتىن ۇيىمعا مۇشە مەملەكەتتەر سىرتقى ىستەر مينيسترلەرىنىڭ بەيرەسمي كەڭەسىنە قاتىساتىنىن راستادى. ول سونداي-اق بيىل پرەزيدەنت نۇرسۇلتان نازارباەۆتىڭ باستاماسىمەن وتكىزىلەتىن ەقىۇ ءسامميتىن ۇيىمداستىرۋدا قازاقستان جاعى اتقاراتىن جۇمىستارعا ءوز قولداۋىن ءبىلدىردى.
اۆستريا رەسپۋبليكاسىنىڭ پرەزيدەنتى ح.فيشەر لاۋازىمىنا قايتا سايلانۋىنا بايلانىستى قازاقستان تاراپىنىڭ قۇتتىقتاۋىن جولداي وتىرىپ, ق.ساۋداباەۆ ەلباسىنىڭ اۆستريا باسشىسىنا قازاقستاندى وزىنە ىڭعايلى مەرزىمدە كەلۋىنە شاقىرۋىن جەتكىزدى, ءارى مۇنداي ساپار ەكىجاقتى ىنتىماقتاستىققا جاڭا سەرپىن بەرە الاتىنىنا سەنىمدى ەكەنىن ايتتى.
قازاقستان اۆستريانىڭ تمد ەلدەرىمەن ەكىجاقتى ساۋدا كولەمى جاعىنان ءۇشىنشى ورىندى يەلەنەدى. قازاقستان مەن اۆستريانىڭ ەكىجاقتى ساۋدا اينالىمى 2010 جىلدىڭ قاڭتار-اقپان ايلارىندا 481,8 ميلليون اقش دوللارىن قۇرادى, ال بۇل داعدارىستىڭ ىقپالى اسا كۇشتى بولعان 2009 جىلدىڭ سايكەس مەرزىمىمەن سالىستىرعاندا 15,5 ەسە ارتىق بولىپ تابىلادى. جالپى العاندا, سوڭعى 15 جىلدىڭ ىشىندە ەكىجاقتى ساۋدا اينالىمىنىڭ كولەمى 12 ەسە ءوستى. اۆسترياعا قازاقستاندىق ەكسپورت – 17 ەسە, ال اۆستريادان قازاقستانعا كەلەتىن يمپورت 6 ەسە ءوستى.