«تۋر دە فرانس» كوپكۇندىگىنىڭ 17-كەزەڭى «UAE-Team Emirates» كلۋبىنىڭ سەركەسى تادەي پوگاچاردىڭ تاماشا جەڭىسىمەن اياقتالدى, دەپ حابارلايدى Egemen.kz.
10 تۋر بويى شاشاسىنا شاڭ جۇقتىرماي, جالپى ەسەپتە جەكە-دارا كوش باستاپ تۇرعان سلوۆەنيانىڭ جاس جۇلدىزى ميۋرە مەن سەن-لاري-سۋلان ارالىعىنداعى سايىستا الدىنا جان سالمادى. 178,4 شاقىرىمدىق قاشىقتىقتى پوگاچار 5 ساعات 03 مينۋت 31 سەكۋندتا ءجۇرىپ ءوتتى. ەكىنشى جانە ءۇشىنشى ورىنداردى دانيالىق يوناس ۆينگەگور («Team Jumbo-Visma») مەن ەكۆادورلىق ريچارد كاراپاس («INEOS Grenadiers») يەلەندى. كەزەڭ جەڭىمپازىنان ءۇش مينۋتقا جۋىق ۋاقىت قالىپ قويعان «استانانىڭ» سەركەسى الەكسەي لۋتسەنكو 12 ساتىعا تابان تىرەدى.
تاۋلى ايماقتاعى جەڭىسىنەن كەيىن تادەي پوگاچار وزگە قارسىلاستارىنىڭ بارلىعىنان قارا ءۇزىپ كەتتى. ونىڭ كورسەتكىشى – 71:26:27. سلوۆەنيالىق ۆەلوشاباندوزدى وكشەلەپ كەلە جاتقان يوناس ۆينگەگور ودان باقانداي 5 مينۋت 39 سەكۋند قالىپ كەلەدى. ال قازاقستاندىق سپورتشى الەكسەي لۋتسەنكو جالپى ەسەپتە سەگىزىنشى ساتىعا سىرعىپ ءتۇستى.