ماساڭ كۇيدە رولگە وتىرۋعا رۇقسات جوق. زاڭ سولاي. ال وسكەمەن قالالىق اكىمدىگىنىڭ قىزمەتكەرى الكوگولدى ىشىمدىك ءىشىپ الىپ, كولىك باسقارعان.
ءبىزدىڭ بىلۋىمىزشە, اكىمدىك قىزمەتكەرى ينديرا قالجاباەۆا 11 شىلدە كۇنى حالىقتى ۆاكتسينالاۋعا ارنالعان اۆتوبۋستى تەكسەرۋگە كەلگەن كورىنەدى. بەلگىلى بولعانداي, ىشىمدىك ىشكەن كۇيى كولىكتى باسقارعان.
وبلىستىق پوليتسيا دەپارتامەنتىنىڭ حابارلاۋىنشا, 11 شىلدەدە پوليتسيا قىزمەتكەرلەرى ماس كۇيىندە «حيۋنداي اكتسەنت» ماركالى كولىگىن باسقارعان 54 جاستاعى جۇرگىزۋشىنى توقتاتقان. اتالعان فاكتى بويىنشا جۇرگىزۋشىگە قاتىستى قر اقبتك-ءنىڭ 608-بابىنىڭ 1-بولىگى بويىنشا اكىمشىلىك حاتتاما تولتىرىلدى. ياعني, بۇل زاڭ جەتى جىل مەرزىمگە كولىك قۇرالىن باسقارۋ قۇقىعىنان ايىرادى. ازىرشە, جۇرگىزۋشىگە قاتىستى اكىمشىلىك ءىس سوتقا جىبەرىلدى.
وسكەمەن قالاسى اكىمدىگىنىڭ ءباسپاسوز قىزمەتىنىڭ مالىمەتىنشە, پوليتسيا باسقارماسىنان ماتەريالدار كەلىپ تۇسكەننەن كەيىن قالا اكىمدىگى بولعان وقيعا بويىنشا جانە مەملەكەتتىك قىزمەتكەردىڭ ادەپ نورمالارىن ساقتاۋىنا قاتىستى قىزمەتتىك تەكسەرۋ جۇمىستارى باستالادى. بارلىق ءىس-شارالار اياقتالعانعا دەيىن ي.قالجاباەۆا جۇمىستان شەتتەتىلەدى.