ءبىزدىڭ كوبىمىز – ءومىر بويى ەڭ عاجاپ, ەڭ ۇلى ارماندارىمىزدى كۇندەلىكتى كۇيبەڭ تىرشىلىكتىڭ شاڭىنا كومىپ, تۇنشىقتىرىپ, اقىر سوڭىندا سول بوسقا وتەر بەكەرشىلىكتىڭ قولىنا بەرىپ ولتىرۋشىلەرمىز. ەڭ قورقىنىشتىسى – سول اۋرەشىلىك بارا-بارا ادامزاتتىڭ نەگىزگى ءومىر مانىنە اينالىپ بارا جاتقان. ءبىز ءتىپتى ءوزىمىزدىڭ ومىرگە كەلگەندەگى ۇلى مۇراتتارىمىزدى ءبىرجولا ۇمىتىپ, سول بەكەرگە وتەر بوس عۇمىردىڭ تۇتاستاي قۇربانىنا اينالامىز. ارينە, ءار ادام – ينديۆيد. بىرەۋدىڭ ءومىرىن قۇر بەكەرشىلىك دەپ قۇردىمعا ىسىرا سالۋدان, جالپى جەر بەتىندەگى بارلىق ادام بەس كۇن جالعاندى بەكەر ءسۇرىپ جاتىر دەۋدەن اۋلاقپىز. ءوزىنىڭ سانالى عۇمىرىن عيبراتتى كەشىپ وتكەن عۇلامالار, دانىشپاندار كوپ. دەگەنمەن ءبىز ايتىپ وتىرعان كۇيرەۋىك كۇيدىڭ تۇزاعىنا تۇتقىندالعاندار ۇلەسى ءبارىبىر كوپ.
كەيدە ءتىپتى ادام قاراپايىم ءوزىنىڭ سۇلۋلىعىنىڭ دا تۇتقىنىنا اينالىپ, جالعاندى اقىر سوڭىندا جالعىز ءوزى ءتامامدايتىن كەزدەر بولادى. اسقان سۇلۋ, كەرەمەت كورىكتى مىنا ءبىر پەريزاتتىڭ اينا الدىندا جالعىز وتىرۋى ءبىزدى وسى ويلارعا جەتەلەپ كەتتى...
1892 جىلى نەبارى 18 جاستاعى قىلقالام شەبەرى چارلز الان گيلبەرت وسىناۋ ەڭ ايگىلى وپتيكالىق يلليۋزيانى جارىققا شىعارادى. ء«بارى – بەكەرشىلىك» دەپ اتاعان كارتينا ءوز كورەرمەندەرىن ءالى كۇنگە دەيىن تاڭعالدىرۋدان تالماي كەلەدى. ءتىپتى وسىناۋ وپتيكالىق يلليۋزيامەن بەدەرلەنگەن بەينە ءالى كۇنگە دەيىن كوپتەگەن سۋرەتشى مەن فوتوگرافتى وزىنە ەلىكتىرىپ, جاڭا سۇرلەۋ سالىپ كەلەدى.
ءبىز كەيدە ەرىكسىز شىندىقتا جوق نارسەنى كورەمىز. سۋرەتشى گيلبەرتتىڭ بۇل كارتيناسىنا قاراپ تۇرعان ادام ەڭ اۋەلى قۋارعان باسسۇيەكتى كورەدى. ال شىن مانىندە ول – جاي عانا اينا الدىندا ءوزىنىڭ ءومىر جولىنا ايناداعى ارۋ ارقىلى ۇڭىلگەن سۇلۋ پەريزات بەينەسى.
بۇل جەردە دە ايتارىمىز, البەتتە كەي ادام بىردەن كەربەز كەلىنشەكتىڭ كەسكىنىن اڭعارۋى مۇمكىن. الەمدە قانشا ادام بولسا سونشا ماحاببات, سونشا جالعىزدىق, سونشا كوزقاراس بارى بەلگىلى. دەگەنمەن قىلقالام قيالىنىڭ, قۇندىلىق قۇپياسىنىڭ, سۋرەت سيقىرىنىڭ كۇشى ءبىزدى وسىناۋ كارتينا الدىندا ۇلكەن سۇراقتارعا جاۋاپ ىزدەتەدى.
شىنىمەن, بۇل سۋرەتتە بەس كۇن جالعاننىڭ بەكەرشىلىگىن بەينەلەگەن باس سۇيەك پە, جوق ءومىردىڭ قىزىلدى-جاسىلدى سۇلۋ ساتتەرىنە الدانىپ, ءوز سۇلۋلىعىنىڭ قۇردىمىنا جۇتىلىپ, ۇزاقتى كۇنگە اينا الدىندا وتىرعان كەربەز كەلىنشەك پە؟