ەلوردا ساۋىعار ەمەس

ەلوردادا تۇرعىندار اراسىندا كورو­ناۆيرۋس ينفەكتسياسىنىڭ ءوسۋىن ماماندار ەڭ اگرەسسيۆتى جانە تەز تارالاتىن ءۇندى شتامىمەن بايلانىس­تىرىپ وتىر. «ساراپشىلار قازىرگى ۋاقىتتا كوروناۆيرۋس الەمدە بەلسەندى تۇردە مۋتاتسياعا ۇشىراپ جاتقانىن ايتادى. مىسالى, «دەلتا» شتامى بۇعان دەيىنگىلەرگە قاراعاندا 60%-عا جۇقپالى بولىپ كەلەدى, بالالار اراسىندا دا «دەلتا» شتامىن جۇقتىرۋ جيىلەپ بارادى», دەپ حابارلايدى ەلوردا اكىمدىگىنىڭ رەسمي سايتى.

دارىگەرلەردىڭ ايتۋىنشا, ينفەك­تسيا­نى ءالى ۆاكتسينا الماعان ادامدار جۇقتىرۋعا بەيىم كەلەدى, سوندىقتان كوۆيدپەن كۇرەسۋدىڭ جالعىز جولى – جاپپاي ەگىلۋ.

نۇر-سۇلتاندا ۆاكتسينا العانداردىڭ سانى وتكەن اپتالارمەن سالىستىرعاندا بەس ەسەدەي ءوسىپ, تاۋلىگىنە 7 مىڭنان اسىپ وتىر. رەسمي مالىمەت بويىنشا بۇگىنگە دەيىن بارلىعى 229 مىڭنان استام ادام ەكپەنىڭ العاشقى كومپو­نەنتىن العان. دەگەنمەن بۇل – ءالى دە از. سوندىقتان قالالىق اكىمدىك جانە مەكەمەلەر, ۇيىمدار جۇرتشىلىقتى ۆاكتسينالاۋعا ىنتالاندىرۋ ءۇشىن كوپتەگەن شارا مەن اكتسيا وتكىزىپ جاتىر. اتاپ ايتقاندا, ۆاكتسينا العان ەلوردالىقتاردىڭ اراسىندا جيىرما iPhone12 ويناتىلادى. اپتاسىنا ەكى رەت جۇرگىزىلەتىن ۇتىس ويىنىنا مەديتسينالىق مەكەمەلەردە, ساۋدا-ويىن-ساۋىق ورتالىقتارىندا ۆاكتسينا العاندار قاتىسا الادى.

باس قالا اكىمدىگى سايتىنداعى ما­لىمەتكە سۇيەنسەك, جەڭىمپاز Birge پلاتفورماسىنداعى كەزدەيسوق قىزمەت ارقىلى انىقتالادى. ۆاكتسينالان­عاندار بويىنشا اقپارات دەنساۋلىق ساقتاۋ مينيسترلىگىنىڭ مالىمەتتەرىمەن بىرىگەدى. سەرۆيستە ەكپە العان ادام­نىڭ id-ءنومىرى عانا كورىنەتىن بولادى. جەڭىمپازدى سەرۆيس كەزدەيسوق انىقتايدى. ول Facebook پەن Instagram ارقىلى تىكەلەي ەفيردە وتكىزىلەدى.

«IPhone12 العاشقى ۇتىس ويىنى 8 شىلدە كۇنى وتەدى. العاشقى ۇتىس ويىنىنا 6 شىلدەگە دەيىن ەكپە ال­عانداردىڭ ءبارى قاتىسا الادى. نۇر-سۇلتان قالاسىندا 7 شىلدە كۇنى ۆاك­تسينالانعانداردىڭ بازاسى دايىندالادى. سونىمەن قاتار 31 تا­مىزعا دەيىن ەگىلگەن ازاماتتار اراسىندا ەكى بولمەلى پاتەردىڭ ۇتىس ويىنى وتكىزىلەدى. سول سياقتى بۇعان دەيىن «MEGA Silk Way» سوو ءوزىنىڭ ەگۋ پۋنكتىندە ۆاك­تسينانىڭ ءبىرىنشى كوم­پونەنتىن ال­عاندار اراسىندا اۆتوموبيل ويناتىلاتىنىن جاريالادى. ال «ازيا پارك», «سارىارقا», «ابۋ-دابي پلازا», «كەرۋەن», «ەۋرازيا» سوو-لارىندا جانە باسقا دا ساۋدا ۇي­لەرىندە كومپيۋتەرلىك, تۇرمىستىق تەح­نيكا, جەڭىلدىك كۋپوندارى تۇرىندەگى ءتۇرلى سىيلىقتار ويناتىلىپ جاتىر», دە­لىنگەن سايتتا جاريالانعان ماتەريالدا.

اكىمدىك ۆاكتسينالانعانداردى ىنتالاندىرۋ ماقساتىندا وسىنداي اكتسيالار وتكىزىپ جاتقاندا قالادا كارانتيندىك شارالار ءۇشىنشى مارتە كۇشەيدى. رەسمي مالىمەت بويىنشا ەندى 4 شىلدەدەن باس­تاپ Ashyq جوباسى بويىنشا جۇمىس ىستەيتىن تاماقتانۋ ورىندارىنىڭ (مەيرامحانالار, ءدامحانالار) ۋاقىتى 02:00-دەن 22:00-گە دەيىن (جابىق جەرلەردە), ال سىرتتا, ياعني ەسىك الدىندا جۇمىس ىستەيتىن تاماقتانۋ ورىندارىنىڭ ۋاقى­تى 02:00-دەن 00:00-گە دەيىن قىس­قارادى. جەكسەنبى كۇندەرى قوعامدىق كولىك­تىڭ جۇمىسى توقتاتىلادى. بۇل كۇنى اۆتوبۋستارعا زارارسىزداندىرۋ جۇ­مىس­تارى جۇرگىزىلەدى. Ashyq جوباسىن قولدانبايتىن فيتنەس-ورتالىقتاردىڭ (يوگا ورتالىقتارى, ت.ب.) جۇمىسى توقتايدى. ال Ashyq جوباسى بويىن­شا ىستەيتىن فيتنەس-ورتالىقتار (يوگا ور­تالىقتارى, ت.ب.) دۇيسەنبى-جۇما كۇندەرى جۇمىس ىستەسە, دەمالىس كۇن­دەرى جۇمىس ىستەمەيدى. «قالادا قاتاڭ كاران­تيندىك شارالاردى ەنگىزبەس ءۇشىن ۇجىمدىق يممۋنيتەتتى دامىتۋ قاجەت. ال ۇجىمدىق يممۋنيتەتتىڭ ۇلەسى 60%-دان اسۋعا ءتيىس. مەديتسينا قىز­مەتكەرلەرىنىڭ 90%-دان استامى, ال كوممۋنالدىق قىزمەتكەرلەردىڭ 70%-دان استامى كوروناۆيرۋسقا قارسى ەگىلدى», دەيدى ەلوردا اكىمدىگىنىڭ رەسمي سايتى.