باتىس قازاقستان وبلىسى كوروناۆيرۋس تارالۋى جاعىنان قاۋىپتى «قىزىل ايماق» ساناتىندا تۇر. وڭىردە ماۋسىمنىڭ 28-ىنەن باستاپ كارانتيندىك شەكتەۋ شارالارى كۇشەيدى.
كوروناۆيرۋستىڭ الدىن الۋ ءۇشىن ەڭ قاجەتتى شارانىڭ ءبىرى ۆاكتسينا ەكەنىن الەمدىك تاجىريبەدەن انىق كورىپ وتىرمىز. سوندىقتان باتىس قازاقستان وبلىسىندا دا ەكپە الۋ ءىسى جۇيەلى جولعا قويىلدى. بۇگىندە وڭىردە وبلىس بويىنشا 66 ەكپە پۋنكتى جۇمىس ىستەيدى. ال مۇگەدەكتەر قاتارىنداعى مۇمكىندىگى شەكتەۋلى ادامداردى ۆاكتسينالاۋ ءۇشىن ارنايى توپ ولاردىڭ ۇيىنە بارىپ, ەكپە جاساپ ءجۇر.– باتىس قازاقستان وبلىسىندا حالىقتى كوروناۆيرۋس ينفەكتسياسىنا قارسى كەزەڭ-كەزەڭىمەن ۆاكتسينالاۋ شاراسى 2021 جىلدىڭ 1 اقپانىنان باستالدى. ۆاكتسينا اۋماقتىق مەديتسينالىق ۇيىمداردىڭ ەگۋ پۋنكتتەرىندە, ال ارنايى كونتينگەنتتى ۆاكتسينالاۋ ءتيىستى ۆەدومستۆونىڭ قىزمەت ورنى بويىنشا جۇرگىزىلەدى. حالىق ءۇشىن ۆاكتسينانى قولجەتىمدى ەتۋ جانە ەگۋ پروتسەسىن جەڭىلدەتۋ ماقساتىندا جىلجىمالى ەگۋ پۋنكتتەرىن, كوشپەلى ەگۋ بريگادالارىن ۇيىمداستىردىق. بۇگىندە ەكپە پۋنكتتەرى بارلىق اۋداندا بار, – دەيدى سانيتارلىق-ەپيدەميالىق باسقارمانىڭ ءباسپاسوز حاتشىسى ادەمى عيبراتقىزى.وڭىردە سوڭعى كۇندەرى ەكپە الۋ ءىسى قارقىن الا تۇسكەن. ماسەلەن, 27 ماۋسىمداعى مالىمەتتە ۆاكتسينانىڭ 1-كومپونەنتىن 90 658 ادام, 2-كومپونەنتىن 59 961 ادام العانى حابارلاندى. ال 29 ماۋسىمدا وبلىستا ۆاكتسينانىڭ 1-كومپونەنتىن العانداردىڭ سانى 92 896 ادامعا, 2-كومپونەنتىن العاندار 61 459 ادامعا جەتكەن. ياعني ەكى كۇن ىشىندە 2 238 ادام ەكپەنىڭ العاشقى دوزاسىن السا, 1 498 ادام ەكىنشى مارتە ەگىلىپ, ۆاكتسينا تولقۇجاتىنا يە بولعان.
باتىس قازاقستان وبلىسى