قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى “قازتسينك” جشس-ءنىڭ ەڭبەك قاۋىپسىزدىگى سالاسىنداعى قىزمەتىن جاقسى قىرىنان باعالادى.
“قازتسينك” جشس پرەزيدەنتى نيكولا پوپوۆيچ “ازاماتتاردىڭ ەڭبەك قۇقىقتارىن قورعاۋ جانە كاۋىپسىز ەڭبەك جاعدايلارىن قامتاماسىز ەتۋ جونىندەگى جەمىستى جۇمىسى ءۇشىن” ەڭبەك جانە حالىقتى الەۋمەتتىك قورعاۋ مينيسترلىگىنىڭ كۇرمەت گراموتاسىمەن ماراپاتتالدى.
گراموتانى شىعىس قازاقستانداعى ەڭ ءىرى كومپانيا پرەزيدەنتىنە ءبۇكىلالەمدىك ەڭبەك قورعاۋ كۇنى – 28 ساۋىردە شقو بويىنشا باقىلاۋ جانە حالىقتى الەۋمەتتىك قورعاۋ دەپارتامەنتىنىڭ ديرەكتورى باقىتبەك قيزاتوۆ تاپسىردى. “قازتسينك” جشس – ەڭبەك قاۋىپسىزدىگى سالاسىنداعى جۇمىسى مينيسترلىك تاراپىنان جاقسى قىرىنان باعالانعان وڭىردەگى جالعىز كاسىپورىن. ول زاڭدى دا. نيكولا پوپوۆيچ كومپانيا ساياساتىندا ءتۇبىرلى كۇندىلىقتاردى بىلاي دەپ ايقىن بەلگىلەپ بەردى: “ادام جانە تابيعي رەسۋرستار. كومپانيا اعزاسىندا ادامي تۇلعا مەن تابيعاتقا دەگەن سىيلى كوزقاراس سەزىمىن قالىپتاستىرۋدى ءبىز ءوزىمىزدىڭ باستى باسىمدىلىعىمىز دەپ جاريالايمىز!” بىراق ەڭ باستىسى – قىزمەتكەرلەردىڭ بارىنشا قاۋىپسىز بولۋىنا باعىتتالعان بۇل قاعيداتتار كۇندەلىكتى تىنىمسىز جۇمىستىڭ ارقاسىندا جۇزەگە اسىرىلۋدا. ول كومپانيا جۇمىس ىستەگەن ۋاقىتتان بەرى جالعاسىپ كەلەدى. جاراقاتتانۋشىلىقتىڭ جالپى دەڭگەيى ءتومەندەدى, الايدا, وندىرىستە ءالى دە بولسا جازاتايىم جايتتەر كەزدەسىپ قالاتىندىقتان كومپانيا مەنەدجمەنتى وعان قاناعاتتانىپ وتىرعان جوق.
“قازتسينكتە” ەڭبەك ۇيىمداستىرۋدىڭ ساپالىق جاڭا دەڭگەيىنە قول جەتكىزۋ ءۇشىن ءادىستىڭ وركەنيەتتى تۇرلەرىن, قاۋىپسىزدىك ءجۇيەسىندەگى جوبالاردى ۇنەمى ىزدەپ, جاساپ, ىسكە ەنگىزىپ وتىرادى. 2009 جىلدىڭ قىركۇيەگىندە “قازتسينك” جشس-ءنىڭ “قىزمەتكەرلەر قاۋىپسىزدىگى” دەپ اتالاتىن ارنايى اۋقىمدى جوباسىن جۇزەگە اسىرۋ باستالدى. ول جوبا ەسكىرگەن تەحنولوگيادان باستاپ تاستالعان تەمەكى تۇقىلىنا دەيىنگى كەز كەلگەن دەڭگەيدەگى ءتاۋەكەلدەر سەبەبىن انىقتاۋعا جانە ولاردى جويۋعا ارنالعان. جوبا جەتەكشىسى – كومپانيانىڭ ءبىرىنشى ۆيتسە-پرەزيدەنتى يۋليا پوپوۆيچ.
جالپى, كومپانيانىڭ قاۋىپسىزدىك جۇيەسى كوپ قۇرامداس جانە وعان مۇمكىن بولاتىن بارلىق باعىتتار بويىنشا جۇمىستار كىرەدى. ول ءۇشىن بىرنەشە شاعىن جوبالار مەن جۇيەلەر وندىرىسكە ەنگىزىلگەن. ىسكە دەگەن مۇنداي كوزقاراس كاسىپورىننىڭ جاعدايعا نەعۇرلىم ىلكىمدى دە كەشەندى ىقپال ەتۋىنە مۇمكىندىك بەرەدى. جيىندا وبلىس اكىمىنىڭ ورىنباسارى ە.ساليموۆ ءسوز الىپ “قازتسينكتىڭ” ەكى بالاباقشا, التى تەننيس كورتىن سالعانىنا العىس ايتتى.
ەڭبەك قاۋىپسىزدىگى ءجۇيەسىن جاقسارتۋ ۇدەرىسىنە “قازتسينكتىڭ” بارلىق دەڭگەيدەگى باسشىلارى اتسالىسۋدا. سونىمەن قاتار, بۇگىن بۇل جوبانى جۇزەگە اسىرۋدان سىرت قالعان ءبىر دە ءبىر كومپانيا قىزمەتكەرى جوق دەۋگە بولادى. وعان تاڭقالاتىن دا ەشتەڭە جوق, ويتكەنى, تاقىرىپ تا, مۇددە دە ورتاق.
بۇگىننىڭ وزىندە جوبانى ءجۇزەگە اسىرۋدىڭ جاڭا ءھام وزگەشە ءادىستەرىن قولدانۋدىڭ وڭدى ءناتيجەلەرىن بەرە باستاعانىن سەنىمدى تۇردە ايتۋعا بولادى.
“قىزمەتكەرلەر قاۋىپسىزدىگى” جوباسى قىزمەتى باعىتتارىنىڭ تىزبەسى جۇمىستىڭ جۇرىمدىلىگىنە قاراي ۇزدىكسىز وسە تۇسپەك. بىراق, كومپانيا باسشىلىعىنىڭ پىكىرىنە قاراعاندا ول – كۇشتى دە, قاراجاتتى دا, ۋاقىتتى دا ۇنەمدەۋدە تارتىنشاقتانۋعا بولمايتىن جاعداي.
وڭداسىن ەلۋباي, وسكەمەن.