وڭىرىمىزدە جىل سايىن وقۋ جىلىنىڭ سوڭىندا رەسپۋبليكالىق جانە حالىقارالىق ءپان وليمپيادالارىندا جۇلدەگەر اتانعان جاس دارىندارمەن كەزدەسۋ وتەدى. بيىلعى كەزدەسۋگە وليمپيادالاردىڭ 52 جەڭىمپازى جانە «ەڭ ۇزدىك وليمپيادالىق مەكتەپ – 2021» ديپلومىنىڭ يەگەرلەرى – مامانداندىرىلعان مەكتەپ ديرەكتورلارى مەن مۇعالىمدەر قاتىستى.
وبلىستىق ءبىلىم باسقارماسىنىڭ مالىمەتىنشە, جالپى, وبلىستىڭ دارىندى وقۋشىلار قۇراما كومانداسى رەسپۋبليكالىق جانە حالىقارالىق وليمپيادالاردا بيىل 245 مەدال جەڭىپ العان. بۇل مەدالداردىڭ 37-ءسى حالىقارالىق, 208-ءى رەسپۋبليكالىق دەڭگەيدە وتكەن جارىستاردا بەرىلگەن.
رەسپۋبليكالىق وليمپيادانىڭ قورىتىندىلارى بويىنشا وبلىس قۇراماسى كوماندالىق ەكىنشى ورىندى يەلەنىپ, «ۇزدىك وليمپيادالىق كوماندا-2021» سەرتيفيكاتىمەن ماراپاتتالدى. وبلىس قۇراماسى 14 التىن, 14 كۇمىس جانە 23 قولا مەدال جەڭىپ الدى.
ال كەزدەسۋگە كەلگەن دارىندى بالالارعا ارنالعان مامانداندىرىلعان مەكتەپتەر مەن جالپى ورتا ءبىلىم بەرەتىن مەكتەپتەردىڭ 50 وقۋشىسىن وبلىس اكىمى ابىلقايىر سقاقوۆ العىس حاتتارمەن ماراپاتتاپ, ارقايسىسىنا 100 مىڭ تەڭگەلىك سەرتيفيكات تابىس ەتتى.
سونىمەن بىرگە ەلىمىزدەگى «100 ۇزدىك مەكتەپ» قاتارىندا كورىنگەن دارىندى بالالارعا ارنالعان №8 مەكتەپ-ليتسەيىنىڭ ديرەكتورى گاۋھار بابىقوۆا, «جاس دارىن» مامانداندىرىلعان مەكتەبىنىڭ ديرەكتورى گۇلنار جانعازى جانە №3 گيمنازيا مەكتەبىنىڭ ديرەكتورى قورلان قۇسبەكوۆا دا ماراپاتتالدى.
وتباسىندا ەكى-ءۇش بالادان وليمپيادا جۇلدەگەرلەرىن ءوسىرىپ تاربيەلەگەن, ەرەكشە ءبىلىم الۋى ءۇشىن قامقورلىق پەن قولداۋ كورسەتكەن جانات پەن اسەم دۇيسەمبەكوۆتەر, ۆاديم, تانزيليا بوچكارەۆتار, تالعات قۇسايىنوۆ پەن دينارا قۇرمانوۆالار سياقتى اتا-انالارعا دا ەرەكشە قۇرمەت كورسەتىلدى.
– ءبىزدىڭ مەكتەپ مۇعالىمدەرى و.كولداشەۆا, ت.رۋبتسوۆا, ل.ستادنيكوۆا, يۋ.ياكۋتوۆيچ, س.ۆاسينا ماتەماتيكا, حيميا, اعىلشىن ءتىلى, ينفورماتيكا پاندەرىنەن جىل سايىن وليمپيادا جۇلدەگەرلەرىن دايىندايدى. ەلىمىزدىڭ بولاشاعىنا ۇلەس قوساتىن دارىندى وقۋشىلارىمىز د.راحيمجانوۆ, ا.دراگانچۋك, ل.ۆلاديمير, ا.گوركوۆ, ا.شيشكين, د.نۇرتاەۆ, ءا.ماقاشەۆ سياقتى وقۋشىلارمەن ماقتانامىز. وسىنداي دارىندى بالا تاربيەلەپ وسىرگەن اتا-انالارعا العىس بىلدىرەمىز, – دەيدى ليتسەي ديرەكتورى گاۋھار باباقوۆا.
ال رەسپۋبليكالىق ءپان وليمپياداسىندا قازاق ءتىلى مەن ادەبيەتى ءپانى بويىنشا قاتىسىپ, ءبىرىنشى ورىندى جەڭىپ العان كوپسالالى دارىندى بالالارعا ارنالعان ليتسەي-ينتەرناتىنىڭ وقۋشىسى كارينا رابە سىناقتاردى ونلاين رەجىمدە تاپسىرىپ, وليمپيادالىق سايىستاردىڭ جاڭا فورماتىن مەڭگەرگەنىن ايتتى.
وبلىس ورتالىعىنداعى قالا مەكتەپتەرىنىڭ وقۋشىلارى اسەم دوسمۇحامبەت, الينا كۋزيات, عۇمار ەرنۇر, نۇربولات ارۋجان, مارتەنس ميلا, ۆيكتوريا بوچكارەۆا, ديانا ۆاكۋلينا, بوگدان بورەتسكي, ارۋجان جانات, ومار زاكيروۆ «التىن مەدال» يەگەرلەرى اتاندى.
– مەن دە قالالىق, وبلىستىق جانە رەسپۋبليكالىق ءپان وليمپيادالارىنىڭ جەڭىمپازى اتاندىم. ۇلكەن ىزدەنىس, بىلىمگە تالپىنۋ بەركلي كاليفورنيا ۋنيۆەرسيتەتىنە وقۋعا تۇسۋگە جول اشتى. سىزدەرگە دە ۇلكەن جولدا ءسات-ساپار بولسىن! – دەيدى كەزدەسۋگە قاتىسۋشىلاردى قۇتتىقتاعان وبلىس ورتالىعىنداعى №39 مەكتەپتىڭ 2009 جىلعى تۇلەگى باۋىرجان شايحين.
باۋىرجانمەن بىرگە كەنجەكول اۋىلى مەكتەبىنىڭ تۇلەگى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوكتورانتى اقجان ەگىنباەۆا دا وقۋشىلارعا ءوز تىلەگىن ارنادى.
– وليمپيادا – جەكە تۇلعا مەن زياتكەرلىك مۇمكىندىكتەردى دامىتۋعا ارنالعان قۋاتتى رەسۋرس. بۇل سىزدەرگە رۋحاني كۇش پەن قابىلەتتەرىڭىزگە سەنىمدىلىك بەرەدى, – دەدى.
حالىقارالىق جانە رەسپۋبليكالىق وليمپيادالاردىڭ جەڭىمپازى انتون دراگانچۋكتىڭ ايتۋىنشا, پاۆلودارلىق جاس فيزيكتەر قۇراماسى وكىلدەرىنىڭ دارىندى بالالارعا ارنالعان №8 ليتسەيدىڭ مۇعالىمى اناتولي بيليداسىز جەتىستىككە جەتۋى مۇمكىن ەمەس.
– ەلىمىزدىڭ ۇلتتىق قۇراماسىنا ءار وڭىردەن ەڭ ۇزدىك 20 فيزيك جينالدى. باقىلاۋ تەستىنىڭ ناتيجەسى بويىنشا 8 وقۋشى تاڭدالدى. بيىل وسى قاتاردا ءبىزدىڭ ليتسەيدىڭ ءۇش وقۋشىسى بولدى. بىزدەر نازارباەۆ زياتكەرلىك مەكتەپتەرى مەن رەسپۋبليكالىق فيزيكا-ماتەماتيكا مەكتەپتەرى سياقتى بەلگىلى وقۋ ورىندارىنىڭ وقۋشىلارىنان دا ۇزدىك اتاندىق. ارينە, بۇل جەڭىسىمىز ءۇشىن اناتولي بيليداعا راحمەت! – دەيدى ا.دراگانچۋك.
سونداي-اق دارىندى بالالارعا ارنالعان اباي اتىنداعى گيمنازيا مەكتەبىنىڭ وقۋشىلارى ءپان وليمپيادالارىندا 40-تان اسا رەسپۋبليكالىق, 50-دەن اسا وبلىستىق دەڭگەيدەگى جۇلدەلەرگە يە بولدى.
مەكتەپ ديرەكتورى سالتانات شاباجانوۆانىڭ ايتۋىنشا, 10-سىنىپ وقۋشىسى ايجان كەنجەباەۆا بيىل حالىقارالىق وليمپيادالاردا ەكى كۇمىس, ءۇش قولا مەدال يەگەرى اتانعان. مەكتەپتە وقۋشىلار ءۇشىن Gymnasium LIVE, Daryn, My first Lab جوبالارى جۇرگىزىلۋدە.
پاۆلودار وبلىسى