يندۋستريالاندىرۋ ناتيجەسىندە ەلىمىزدە تەمىرجول كولىگىن جاساۋ كلاستەرى قۇرىلعانى بەلگىلى. بۇگىندە قازاقستاندا لوكوموتيۆتەر, ەلەكتروۆوزدار, جۇك جانە جولاۋشىلار ۆاگوندارى, تەرموس ۆاگوندار, تۇتاس تاپتامالى دوڭعالاقتار, باعىتتامالى بۇرمالاردىڭ بانداجدارى ءوندىرىسى جولعا قويىلعان.
بۇل رەتتە وتاندىق تەمىرجول تاسىمالداۋشىلارىنىڭ قاجەتتىگىن وتەۋ ءۇشىن بىرقاتار ماڭىزدى جوبالار جۇزەگە اسىرىلدى. ماسەلەن, لوكوموتيۆ قۇراستىرۋ زاۋىتى زاماناۋي مانەۆرلىك تەپلوۆوزداردى شىعارا باستادى. ونىڭ ءونىمى ىشكى نارىققا دا, ەكسپورتقا دا باعىتتالعان. جۇك جانە جولاۋشى ەلەكتروۆوزدارىن شىعاراتىن ەلەكتروۆوز قۇراستىرۋ زاۋىتى دا ىشكى جانە سىرتقى نارىقتاردىڭ سۇرانىسىن وتەۋدە.
«زيكستو» اق جۇك ۆاگوندارىن وندىرۋمەن ءارى جوندەۋمەن اينالىسادى. كومپانيا وسى جىلدىڭ قاڭتار-مامىر ارالىعىندا 298 ۆاگون ءوندىردى. قازاقستان ۆاگون كومپانياسى دا جۇك ۆاگوندارىن شىعارادى. بۇل كاسىپورىن قاڭتار-مامىر ايلارىندا 250 ۆاگون وندىرگەن. «تۇلپار» ۆاگون قۇراستىرۋ زاۋىتى جىلىنا جولاۋشىلارعا ارنالعان 150 ۆاگون شىعارۋعا قاۋقارلى.
سونداي-اق «پرومماشكومپلەكت» كاسىپورىنى جىلىنا 300 مىڭ دوڭعالاق جۇبىنان تۇراتىن تۇتاس تاپتامالى دوڭعالاقتاردى وندىرەدى. بۇدان بولەك, سool Infinity جشس يننوۆاتسيالىق يزوتەرميالىق ۆاگونداردى شىعارادى. كومپانيا ونىمدەرى نەگىزىنەن ەكسپورتقا باعىتتالعان.
جوعارىدا اتالعان كاسىپورىنداردىڭ جوسپارىنا سۇيەنسەك, بيىلعى جىل جەمىستى بولۋعا ءتيىس. بۇل رەتتە ءتورت زاۋىتتىڭ ءونىمى (لوكوموتيۆ قۇراستىرۋ زاۋىتى, ەلەكتروۆوز قۇراستىرۋ زاۋىتى, «پرومماشكومپلەكت», Cool Infinity جشس) تمد اۋماعىندا كەڭىنەن تانىمال.