وسىدان تۋرا 4 جىل بۇرىن – 2017 جىلعى 10 ماۋسىمدا ەلوردادا EXPO-2017 Astana حالىقارالىق مامانداندىرىلعان كورمەسى اشىلعان بولاتىن. EXPO تەك تاريح قويناۋىنا كەتكەن ەلەۋلى ءبىر كەزەڭ عانا ەمەس, بۇگىندە جۇمىسىن ءساتتى جالعاستىرىپ جاتقان ورتالىق, دەپ حابارلايدى Egemen.kz
«EXPO-2017» كورمەسى – تاۋەلسىز قازاقستان تاريحىنداعى ەڭ ماڭىزدى ءارى ەل ابىرويىن اسقاقتاتقان ايرىقشا جەتىستىكتەردىڭ ءبىرى بولدى. «بولاشاق ەنەرگياسى» تاقىرىبىندا وتكەن كورمە – جالپى EXPO تاريحىنداعى ەڭ ءساتتى وتكەن مامانداندىرىلعان كورمەلەردىڭ ءبىرى.
2017 جىلعى 10 قىركۇيەكتە «EXPO-2017»-ءنىڭ جابىلۋ سالتاناتىندا قازاقستاننىڭ تۇڭعىش پرەزيدەنتى – ەلباسى ن.نازارباەۆ كورمە ەلىمىزدىڭ ەكونوميكاسىنىڭ ودان ءارى دامۋىنا سەرپىن بەرگەنىن اتاپ ءوتتى. سارالاپ قاراساڭىز, كورمەنى وتكىزۋدەگى تۇپكى ماقسات ورىندالدى, ەلىمىزدىڭ الەمدىك ارەناداعى ءيميدجى نىعايا ءتۇستى جانە كورمە ۇلتتىق برەند قالىپتاستىردى. كورمەنىڭ اياقتالۋى باسقا دا جاڭا جوبالاردىڭ باستالۋىنا سەبەپ بولدى. EXPO الاڭىنداعى كورمە نىساندارى ءارى قاراي قىزمەتىن جالعاستىرا بەردى.
كورمە اياقتالعان سوڭ موسكۆا-سيتي (ماسكەۋ), La Défense (پاريج), Canary Wharf (لوندون) جانە Downtown Core (سينگاپۋر) سياقتى الەمنىڭ جەتەكشى ىسكەرلىك ورتالىقتاردىڭ ۇلگىسى بويىنشا نىسانداردى كورمەدەن كەيىن پايدالانۋ تۇجىرىمداماسى ازىرلەنىپ, بەكىتىلدى. نەگىزى EXPO اۋماعىنداعى رەسۋرستار كورمەدەن سوڭ ەل مەن حالىققا پايدالى بولۋ جاعى كورمە ينفراقۇرىلىمىن جوبالاۋ كەزەڭىندە-اق قامتىلعان بولاتىن. بۇل ماقساتتا كەشەن اۋماعىندا سەرپىندى جوبالاردى ىسكە اسىرۋ ءۇشىن جاڭا يننوۆاتسيالىق ەكوجۇيە قالىپتاستىرىلدى.
بۇگىندە «QazExpoCongress» ۇلتتىق كومپانياسىنىڭ ستراتەگياسىنا سايكەس كومپانيا بىرتىندەپ ءوز شىعىنىن ءوزى وتەيتىن بولادى. بۇعان نىسانداردى كوممەرتسيالاندىرۋ, كورمە ءىس-شارالارىن وتكىزۋ جانە پايدالانۋ شىعىندارىن قىسقارتۋ ارقىلى قول جەتكىزىلەدى.
EXPO كورمەسى ارقىلى ەلىمىزدە ىسكەرلىك ەكوجۇيە قالىپتاستى. بۇگىندە EXPO اۋماعى «استانا» حالىقارالىق قارجى ورتالىعى, حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى, «Astana Hub» IT-ستارتاپتار حالىقارالىق تەحنوپاركى جانە Astana IT University سياقتى يننوۆاتسيالىق جوبالار شوعىرلانعان ەلوردانىڭ ىسكەرلىك ورتالىعىنا اينالدى. EXPO كەشەنى عىلىم, اقپاراتتىق تەحنولوگيا مەن ەكونوميكانى دامىتۋدىڭ ورتالىعى عانا ەمەس, سونىمەن قاتار ويىن-ساۋىق يندۋسترياسىنا اينالدى. NUR ALEM بولاشاق ەنەرگياسى مۇراجايى جانە كونگرەسس ورتالىعى ماڭىزدى عىلىمي جانە مادەني مۇرا بولىپ, سوڭعى 4 جىل ىشىندە ەل مەن ەلوردا حالقى ءۇشىن ەڭ جارقىن جانە ماڭىزدى ءىس-شارالار وتەتىن ورىنعا اينالدى.
بيىل EXPO حالىقارالىق كورمە ورتالىعىندا Automechanika Astana, ULTTYQ ÓNIM, KIOSH-2021, IndustryWeek سىندى ءىرى حالىقارالىق ءىس-شارالاردى وتكىزۋ جوسپارلانىپ وتىر. سونداي-اق «Smart City Expo Nur-Sultan» اقىلدى قالالاردىڭ حالىقارالىق IT-كونگرەسىن وتكىزۋ جوسپاردا بار.
EXPO-2017 Astana كورمەسى ءبىر مەزەتتىك, جىلت ەتكەن وقيعا ەمەس, ومىرشەڭ جوبا ەكەنىن ۋاقىتتىڭ ءوزى دالەلدەدى. ول تاريحتى, بۇگىن مەن بولاشاقتى بايلانىستىراتىن ورتالىققا اينالدى. بۇگىندە EXPO كەشەنى تىڭ يدەيالار مەن ينۆەستيتسيالاردى, سونداي-اق ەلىمىزدىڭ اقىلدى ادامدارىن ءبىر جەرگە شوعىرلاندىراتىن, ەلوردا قوناقتارى مەن تۇرعىندارىن قۋانتاتىن وزىندىك ءومىر ىرعاعى مەن ەرەكشە رۋحى بار ەكوجۇيەگە اينالدى.
EXPO اياسىندا قازاقستان دۋبايدا وتەتىن دۇنيەجۇزىلىك EXPO-2020 كورمەسىنە وراي ەلگە پايدالى بولاتىن قۇندى تاجىريبەگە يە بولدى. قازاقستان دۋبايعا EXPO-2017 Astana كورمەسىندە حالىقارالىق كورمەلەر بيۋروسىنىڭ تۋىن تابىس ەتكەن بولاتىن. قازاقستان 2021 جىلعى 1 قازاننان 2022 جىلعى 31 ناۋرىزعا دەيىن وتەتىن ءىس-شاراعا قاتىسۋعا بەلسەندى دايىندالۋدا. «اقىل-ويدى بىرىكتىرىپ, بولاشاقتى قۇرۋ» ۇرانىمەن وتەتىن كورمەگە ءبىزدىڭ ەلىمىز باي تاريحى مەن مادەنيەتىن, سونداي-اق ەلدىڭ تۋريستىك الەۋەتىن, تەحنولوگيالىق جانە ينۆەستيتسيالىق مۇمكىندىكتەرىن ۇسىنادى.