باتىس قازاقستان وبلىسى پاندەميا دەڭگەيى جونىنەن «سارى ايماققا» وتكەنىمەن, كۇن سايىن ۆيرۋس جۇقتىرۋشىلار سانى وتكەن جىلعى ەڭ قيىن كەزەڭمەن بىردەي بولىپ تۇر. سوندىقتان كۇزگە قاراي جاعداي كۇردەلەنە ءتۇسۋى مۇمكىن.
– بيىل وڭىردە ءدارى-دارمەكپەن قامتۋ جولعا قويىلدى, كەرەكتى قۇرال-جابدىق تا بار. جاڭادان ءمودۋلدى ينفەكتسيالىق اۋرۋحانا ىسكە قوسىلدى. وسى شارالاردىڭ ناتيجەسىندە ءبىز كوروناۆيرۋسپەن جەدەل ءارى ناتيجەلى كۇرەسىپ وتىرمىز. بىراق جاعداي جاقسى ەمەس. ەگەر حالىق سانىنا شاعاتىن بولساق, بىزدەگى احۋال نۇر-سۇلتان مەن الماتى سەكىلدى ءىرى مەگاپوليستارمەن سالىستىرعاندا جاقسى ەمەس. اۋىر ناۋقاستار, قايتىس بولعاندار سانى ازايماي وتىر. سوندىقتان بوساڭسۋعا ءالى ەرتە, – دەدى ءوڭىر باسشىسى عالي ەسقاليەۆ كوروناۆيرۋسقا قارسى قۇرىلعان شتاب وتىرىسىندا.
ماۋسىمنىڭ 6-سى كۇنگى مالىمەتكە قاراعاندا, باتىس قازاقستان وبلىسىندا ىندەت باستالعالى بەرى 23 010 ادامنان كوروناۆيرۋس تابىلعان ەكەن. سونىڭ ىشىندە 341 ادام قايتىس بولدى. دارىگەرلەر 17 978 ادامنىڭ جازىلىپ, قاتارعا قوسىلعانىن ايتادى.
– اۋرۋحاناعا تۇسكەن ناۋقاستاردىڭ 61%-ىندا دەرت اسقىنعان فورمادا ءوتتى. بيىلعى اۋرۋدىڭ ەڭ كۇشەيگەن كەزى مامىر ايىنا سايكەس كەلدى. قايتىس بولعانداردىڭ 2 پايىزى عانا ناقتى كوروناۆيرۋستان كوز جۇمسا, قالعانى بۇرىننان كەلە جاتقان سوزىلمالى دەرتتەرىنىڭ اسقىنۋىنان دۇنيە سالدى, – دەيدى وبلىستىق جۇقپالى اۋرۋلار اۋرۋحاناسىنىڭ ديرەكتورى ءناديا احمەتوۆا.
ماماندار سىرقاتتاردىڭ كوبىنە ۇيدەن ەمدەلىپ, دارىگەرگە دەر كەزىندە قارالماي, اۋرۋىن اسقىندىرىپ الاتىنىن ايتادى. سوڭعى كۇندەرى covid-19-دىڭ اسا قاۋىپتى جاڭا ءتۇرى كورشىلەس رەسەيدىڭ سامارا مەن ساراتوۆ وبلىستارىنان دا شىعا باستاعان. ءۇندىستاندا كوپ ادامنىڭ ولىمىنە سەبەپكەر بولىپ, «قارا كۇيە» اتالعان كوروناۆيرۋستىڭ بۇل ءتۇرى وتە قاۋىپتى.
ءوڭىردىڭ باس مەملەكەتتىك سانيتارلىق دارىگەرى مۇحامعالي ارىسپاەۆتىڭ «باتىس قازاقستان وبلىسى اۋماعىنداعى كارانتيندىك شەكتەۋ شارالارى جانە Ashyq جوباسىن ەنگىزۋ تۋرالى» جاڭا قاۋلىسى 2 ماۋسىمنان باستاپ كۇشىنە ەنگەن بولاتىن. جاڭا قاۋلىعا سايكەس, وڭىردەگى Ashyq جوباسىنا قاتىساتىن الەۋمەتتىك-ەكونوميكالىق نىسانداردىڭ جاڭاشا جۇمىس كەستەسى بەكىتىلدى. ماسەلەن, قوعامدىق تاماقتانۋ ورىندارى, جازعى الاڭدار, بانكەت زالدارى ەندى تاڭعى 07.00-دەن تۇنگى 02.00-گە دەيىن اشىق بولادى. تەك ونداعى ادام سانى «قىزىل», «سارى» نەمەسە «جاسىل ايماق» بولعانىنا بايلانىستى 50, 60 جانە 70 ادامعا دەيىن وزگەرىپ وتىرادى. بۇرىنعىشا ويىن-ساۋىق, ۇجىمدىق, وتباسىلىق, ەستەلىك ءىس-شارالاردى, ونىڭ ىشىندە جەكە ۇيدە بانكەت, ۇيلەنۋ تويى, مەرەيتوي سەكىلدى ادام كوپ جينالاتىن وزگە دە ءىس-شارالاردى وتكىزۋگە جانە ولارعا قاتىسۋعا تىيىم سالىنعان.
سانيتار دارىگەر مەملەكەتتىك ورگاندار مەن كۆازيمەملەكەتتىك سەكتور ۇيىمدارى قىزمەتكەرلەرىنىڭ جانە جەكە كاسىپكەرلىك قىزمەتكەرلەرىنىڭ كەمىندە 50%-ىن قاشىقتان جۇمىس ىستەۋگە اۋىستىرۋدى ۇسىنىپ وتىر. بىراق CوVID-19-عا قارسى ۆاكتسينانىڭ تولىق كۋرسىن العان جانە سوڭعى 6 اي ىشىندە COVID-19-بەن اۋىرىپ جازىلعان بارلىق قىزمەتكەر قالىپتى رەجىمدە جۇمىس ىستەي بەرەدى.
وڭىردە Ashyq جوباسىمەن جۇمىس ىستەۋشى مەكەمە-كاسىپورىندار كوبەيىپ كەلەدى. سوڭعى دەرەك بويىنشا 6 كينوتەاتر, 18 فيتنەس-كلۋب, 5 كونتسەرت زالى, 19 ساۋنا مەن باسسەين, كوپتەگەن كومپيۋتەرلىك كلۋبتار, بارلىعى 481 نىسان وسىنداي جۇمىس رەجىمىنە كوشكەن.
– Ashyq جوباسىمەن جۇمىس ىستەپ جاتقان نىساندار كوبەيدى. بىراق كەلۋشىلەردى قاتاڭ قاداعالاپ, سانيتارلىق تالاپتاردىڭ ساقتالۋىنا نازار اۋدارۋ كەرەك. ماسەلەن, «قىزىل» جانە «سارى» دارەجەسى بار, ياعني كوپشىلىكتەن وقشاۋلانۋى ءتيىس 185 ادامنىڭ قوعامدىق ورىنداردا جۇرگەنى انىقتالدى. ورال قالاسىندا ۆيرۋس تاراتۋشى 72 ادام, اقساي قالاسىندا 9 ادام ەمىن-ەركىن قىدىرىپ جۇرگەن, – دەيدى باس سانيتار دارىگەر.
سانيتارلىق-ەپيدەميولوگيالىق تالاپتاردى بۇزعان ادامدارعا اكىمشىلىك شارا قولدانىلادى.
وڭىردە كوروناۆيرۋسقا قارسى ۆاكتسينالاۋ ءىسى دە جۇيەلى ءجۇرىپ جاتىر. جاقىندا وبلىسقا رەسەيلىك «سپۋتنيك V» ۆاكتسيناسىنىڭ 27 500 دوزاسى جەتكىزىلدى. وسى كەزگە دەيىن 69 387 باتىسقازاقستاندىق بۇل ەكپەنىڭ ءبىرىنشى بولىگىن الىپ ۇلگەرگەن. ال تولىق كومپونەنت العان ادام سانى 33 مىڭعا جۋىقتاعان. جالپى وبلىسقا وسى كەزگە دەيىن 173 060 دوزا ۆاكتسينا جەتكىزىلگەن.
باتىس قازاقستان وبلىسى