الماتىدا «جاستارعا جول» قوعامدىق قورى Independ.kz جاڭا اقپاراتتىق پورتالىن تانىستىرۋ ماقساتىندا ءباسپاسوز ءماسليحاتىن وتكىزدى.
قوعامدى دامىتۋعا ۇلەس قوسۋدى ماقسات ەتكەن جاڭا تاۋەلسىز اقپاراتتىق پورتالدى مەملەكەتتىڭ قولداۋىنسىز «جاستارعا جول» قوعامدىق قورى ازىرلەنگەن. پورتالدى ىسكە قوسۋ بارىسىندا نەگىزگى باسىمدىق ەكولوگيا, يننوۆاتسيالىق «جاسىل تەحنولوگيالار», ازاماتتىق قۇقىقتى, كاسىپكەرلەر قۇقىعىن قورعاۋ, بۇۇ باس اسسامبلەياسىندا قابىلدانعان قوعامنىڭ تۇراقتى دامۋ ماقساتىنداعى ماسەلەلەرگە قاتىستى اقپاراتتىق ونىمدەرگە بەرىلىپ وتىر.
جاستار كومانداسىنان قۇرىلعان ۇجىم اتالعان پورتال جۇمىسىن جاڭا باعىتتا, جاڭا ۇستانىمدار نەگىزىندە جۇزەگە اسىراتىن بولادى. اگەنتتىكتىڭ باس رەداكتورى رافاەل گاسانوۆ اتاپ وتكەندەي, تاۋەلسىز پورتال اقپاراتتاردىڭ بارىنشا شىنايىلىعىن قامتاماسىز ەتەدى. مەملەكەت, قوعام جانە بيزنەس اراسىنداعى ارىپتەستىككە نەگىزدەلگەن اگەنتتىك جۇمىسى رەسمي قۇجاتتاردى, زاڭنامالارعا ەنگىزىلگەن تولىقتىرۋلار مەن تۇزەتۋلەر, سونىمەن بىرگە ماقساتتى باعدارلامالاردى قوعام وكىلدەرىنە تولىققاندى جەتكىزۋگە ىقپال ەتۋدى كوزدەيدى. قوعامنىڭ دامۋى, ازاماتتاردىڭ, اسىرەسە جاستاردىڭ الەۋمەتتىك ماسەلەلەرىن شەشۋگە باعىتتالعان ماڭىزدى ماسەلەلەرگە دە بارىنشا كوڭىل بولىنەدى.
بۇۇ-نىڭ قازاقستانداعى وكىلى ۆلاستيميل سامەك جاستار باستاماسىمەن اشىلعان پورتال جۇمىسىنىڭ ماڭىزدىلىعىن اتاپ وتسە, پارلامەنت ءماجىلىسىنىڭ دەپۋتاتى ەلدوس اباقانوۆ اگەنتتىكتىڭ «حالىق ۇنىنە قۇلاق اساتىن مەملەكەت» تۇجىرىمداماسىن دامىتۋعا ىقپال ەتەتىندىگىنە توقتالىپ, الداعى ۋاقىتتا پورتال جۇمىسىنا بەلسەندى قاتىسۋعا ۋادە بەردى. ال قوعام قايراتكەرى مارياننا گۋرينا قازاقستاندىق بەلسەندى جاستار باستاماسىمەن اشىلعان اقپاراتتىق اگەنتتىك قوعامداعى وزەكتى ماسەلەلەردى كاسىبي ءارى ءتيىمدى شەشۋگە ىقپال ەتەدى دەگەن سەنىم ءبىلدىردى.
عالامتور بۇگىندە زاماناۋي قوعام اقپاراتتارىن جەدەل الۋعا ىقپال ەتەدى. الايدا مۇندا جالعان, تەكسەرىلمەگەن اقپاراتتاردىڭ تارالۋى – قوعامدى الاڭداتىپ وتىرعان كوكەيكەستى ماسەلە. وسى ورايدا پورتال جۇمىسى شىنايى اقپارات پەن ءسوز ەركىندىگىنىڭ جاڭا الاڭىنا اينالماق.
الماتى