قاراعاندى گارنيزونىنىڭ اسكەري پوليتسيا كاپيتانى زاڭعار الكەنوۆ بىلتىر جاڭاارقا اۋدانىنداعى اتاسۋ كەنتى مەن قاراعاندى قالاسى اراسىنداعى 200 شاقىرىمدىق قاشىقتىقتى جۇگىرىپ ءوتىپ, جۇرتتى تاڭعالدىرعان بولاتىن.
بيىل جەلاياق وفيتسەر جەزقازعان – جاڭاارقا باعىتى بويىنشا 320 شاقىرىمدى 44 ساعات
59 مينۋت جانە 13 سەكۋندتا جۇگىرىپ ءوتتى. ۋلترامارافوندى ول 27 مامىردا جەزقازعان قالاسىنان باستاپ, ارادا ەكى كۇن وتكەندە ءوزىنىڭ تۋعان جەرى جاڭاارقا اۋدانىندا جوسپارلانعان ۋاقىتتان ءۇش ساعات بۇرىن اياقتادى. ايتا كەتەتىن ءبىر جايت, جۇگىرۋ ناۆيگاتسيالىق پلاتفورمانىڭ كومەگىمەن قاداعالاندى.
زاڭعار الكەنوۆتىڭ بۇل جەتىستىگى قازاقستاننىڭ «رەكوردتار كىتابىنا» ەنگىزىلەتىن بولادى. بۇل تۋراسىندا اتالعان ۇيىمنىڭ وكىلى باقىتجان تاستۇلەكوۆ مالىمدەدى. «ۋلترامارافونشىنىڭ رەكوردى كىتاپقا 2021 جىلدىڭ قاراشا ايىندا ەنگىزىلەتىن بولادى», دەپ اتاپ ءوتتى ول.
توزىمدىلىك پەن تاباندىلىقتىڭ ەرەن ۇلگىسىن تانىتقان قايسار ازاماتقا جەرلەستەرى لايىقتى سىي-قۇرمەت كورسەتتى. ءتىپتى, دەمەۋشىلەردىڭ وعان Hyundai Accent اۆتوكولىگىن تارتۋ ەتكەنىن دە ايتا كەتكەن ءلازىم.
– بارىنەن بۇرىن جەرلەستەرىمنىڭ قارسى العانى, ولاردىڭ مەنىڭ جەتىستىگىمە قۋانعانى قاتتى اسەر ەتتى. مەن ءۇشىن ءار مارافون – مىقتىلىعىمدى تەكسەرۋدىڭ توتە جولى. ارينە, بۇل جولعى جۇگىرۋ ماعان وڭايعا تۇسكەن جوق. اسىرەسە سوڭعى كۇنى قاتتى ىستىق بولىپ, جۇگىرۋدى قيىنداتىپ جىبەردى. دەگەنمەن, ماقساتىما جەتىپ, قاشىقتىقتى مەرزىمىنەن بۇرىن اياقتاعانىما قۋانىشتىمىن, – دەيدى ز.الكەنوۆ.
ۋلترامارافونشىنىڭ الداعى جوسپارى دا اۋقىمدى. دەنساۋلىق پەن دايىندىق ويداعىداي بولسا, ول كەلەسى جىلى قاراعاندى مەن الماتى اراسىن جۇگىرىپ وتپەكشى.
زاڭعار الكەنوۆ كەزىندە بوز كىلەمنىڭ شاڭىن قاققان بالۋان بولدى. ول قازاق كۇرەسىنەن سپورت شەبەرى, دزيۋدودان سپورت شەبەرلىگىنەن ۇمىتكەر. وسىدان توعىز جىل بۇرىن جاراقات الۋىنا بايلانىستى كىلەممەن قوشتاستى دا, كۇرەستى ۋلترامارافونعا, ياعني ۇزاق قاشىقتىققا جۇگىرۋگە ايىرباستاعان.