بۇگىندە وڭىردە تاراز قالاسىن اباتتاندىرۋ ماقساتىندا «تارازعا تارتۋ» جوباسى قولعا الىنىپ, بارلىق اۋدان اكىمدىكتەرى قالاداعى ءتيىستى ورىنداردى اباتتاندىرۋعا جاۋاپتى بولىپ بەكىتىلگەن. وسى ورايدا جامبىل وبلىسىنىڭ اكىمى بەردىبەك ساپارباەۆ تاراز قالاسىن ارالاپ, قالاداعى قۇرىلىس, جول جوندەۋ جانە اباتتاندىرۋ جۇمىستارىمەن تانىستى, دەپ حابارلايدى Egemen.kz.
اۋەلى وبلىس اكىمى جاۋعاش باتىر كوشەسىندە قايتا قالپىنا كەلتىرىلگەن امبەباپ سپورت الاڭشاسىنىڭ جۇمىسىن بارىپ كوردى. مەردىگەر «عيمارات ستروي Com» جاۋاپكەرشىلىگى شەكتەۋلى سەرىكتەستىگىنىڭ ديرەكتورى اسقار جەتپىسباەۆتىڭ ايتۋىنشا, سپورت الاڭى 20 كۇندە قايتا جاڭعىرتۋدان وتكەن. مۇندا كىشى فۋتبول, باسكەتبول جانە ۆولەيبول ويناۋ ءۇشىن بارلىق جاعداي جاسالعان.
«قالادا كوپ الاڭ قايتا جاڭعىرتىلدى. بىراق ونىڭ كوبى بوس تۇر. سول ءۇشىن سپورت باسقارماسى قالا تۇرعىندارىن, جاستار مەن جاسوسپىرىمدەردى سالاماتتى ءومىر سالتىن ۇستانۋعا شاقىرىپ, وسىنداي امبەباپ سپورت الاڭدارىندا جارىستار ۇيىمداستىرۋدى قولعا الۋى ءتيىس. كەستە جاساپ, بالالاردىڭ جازعى كانيكۋلدا ۋاقىتىن ءتيىمدى وتكىزۋگە كۇش سالۋ كەرەك. قاجەت بولسا, بوس تۇرعان مەكتەپتەردىڭ سپورت زالدارىن دا اشىپ, جاز ۋاقىتىندا جاستاردىڭ سپورتپەن شۇعىلدانۋى ءۇشىن ءتيىمدى پايدالانۋدى قاراستىرعان ءجون», دەدى ب.ساپارباەۆ.
بۇدان كەيىن وبلىس اكىمى بايزاق باتىر كوشەسىنىڭ بويىنداعى جول جوندەۋ جۇمىستارىمەن دە تانىستى. تاۋەلسىزدىكتىڭ 30 جىلدىعىنا وراي جۇزەگە اسىپ وتىرعان «تارازعا تارتۋ» جوباسى اياسىندا قازىبەك بي كوشەسىندەگى №131 جانە 133-كوپقاباتتى تۇرعىن ۇيلەردىڭ كوشە جاق بەتىندەگى گۇلباقتى اباتتاندىرۋ جۇمىسى جوسپارلانعان. ول اۋماقتى اباتتاندىرۋعا تالاس اۋدانى جاۋاپتى بولعاندىقتان, اتالعان اۋداننىڭ اكىمى قاناتبەك مادىبەك قۇرىلىس جۇمىستارىنىڭ باستالعالى جاتقانىن ايتىپ, جوبا-جوسپارىمەن ءبولىستى. وبلىس اكىمى سكۆەردى جاساعاننان كەيىن ونىڭ قاسىنداعى كوپقاباتتى تۇرعىن ۇيلەردىڭ كوشە جاق قاسبەتىن دە ارلەۋ كەرەك ەكەنىن جەتكىزدى. جامبىل پوليتەحنيكالىق جوعارى كوللەدجى الدىنداعى اللەياعا قاتىستى دا ۇسىنىس ايتىلدى. ال تۇڭعىش پرەزيدەنت اتىنداعى ساياباقتاعى جاساندى كول مەن امفيتەاتردى قالپىنا كەلتىرۋ جۇمىستارىن قورداي مەن شۋ اۋداندارى ءوز مويىندارىنا العان.
ب.ساپارباەۆ سونداي-اق ب.مومىش ۇلى كوشەسى بويىنداعى جول جوندەۋ جانە ب.مومىش ۇلى تۇيىعىنداعى جاڭا سكۆەردىڭ قۇرىلىس جۇمىسىمەن دە تانىستى. سكۆەردەگى قۇرىلىس جۇمىسىن «ناركەن» جاۋاپكەرشىلىگى شەكتەۋلى سەرىكتەستىگى جۇرگىزۋدە. سەرىكتەستىك ديرەكتورى داۋرەن نارجانوۆتىڭ ايتۋىنشا, مۇنداعى 300 مەتر اۋماق اباتتاندىرىلادى. سونداي-اق داڭقتى شوپان, ەكى مارتە سوتسياليستىك ەڭبەك ەرى اتانعان جازىلبەك قۋانىشباەۆقا ارناپ ەسكەرتكىش-تاقتا ورناتۋ بويىنشا ۇسىنىستار قارالىپ جاتقانىن جەتكىزدى. بەردىبەك ساپارباەۆ بۇل كوشەگە جازىلبەك قۋانىشباەۆتىڭ ەسىمىن بەرۋ تۋرالى باستاما كوتەردى. ويتكەنى باتىر ەسىمىمەن اتالاتىن ۇلكەن داڭعىلداعى ەكىنشى رەت قايتالانىپ تۇرعان كوشە تۇيىعىنىڭ ءوزى دە سوعان سۇرانىپ تۇرعانداي. قالا اكىمىنە ۇزىندىعى ەكى شاقىرىمنان اساتىن كوشەگە ەڭبەك ەرىنىڭ ەسىمىن بەرۋ ماسەلەسىن زەردەلەۋدى تاپسىردى.
سونداي-اق وبلىس اكىمى درەناجدى كانالىنىڭ, ايشا ءبيبى كوشەسىنىڭ جانە ۇشبۇلاق كانالىنىڭ اباتتاندىرۋ جۇمىسىمەن تانىسىپ, وعان جاۋاپتى وبلىس اكىمدىگىنىڭ باسقارمالارىنا قۇرىلىس جۇمىسىن جەدەل باستاۋدى جۇكتەدى. جۇمىس ساپارى بارىسىندا ب.ساپارباەۆ ء«شولدالا» شاعىن اۋدانىندا ءبىر كۇن بۇرىن اشىلعان الەۋمەتتىك دۇكەنىنە دە ارنايى ات باسىن بۇردى. كاسىپكەر پاتوس ءتاليپوۆتىڭ ايتۋىنشا, مۇنداعى باعا بازار باعاسىنان الدەقايدا تومەن ەكەن. ماسەلەن, ءسۇت ونىمدەرى نارىق باعاسىنان 40 تەڭگەگە تومەن وتكەرىلۋدە. ءبىر كۇندە مۇندا مىڭ تۇرعىن ساۋدا جاساپ ۇلگەرىپتى. «مۇنداعى باعا وزگە دۇكەندەر مەن ساۋدا ورتالىقتارىنداعى باعاعا قاراعاندا 15-20 پايىزعا تومەن. ءبىزدى وسى دۇكەننىڭ ارزانداتىلعان ازىق-ت ۇلىك باعاسى قۋانتىپ وتىر. ەڭ باستىسى – قالا سىرتىنداعى شالعاي شاعىن اۋدان حالقىنا وسىنداي الەۋمەتتىك دۇكەننىڭ اشىلعانى جاقسى بولىپ قالدى», دەيدى اتالعان شاعىن اۋدان تۇرعىنى باقىت وماروۆا.
«تارازعا تارتۋ» جوباسى اياسىندا وسىنداي جۇمىستار جۇرگىزىلۋدە. قالانىڭ ءتيىستى ورىندارىنىڭ اباتتاندىرىلۋىنا جاۋاپتى اۋدان اكىمدىكتەرى تاراپىنان دا جۇيەلى جۇمىستار ۇيىمداستىرىلۋدا. اتالعان جوبا شەڭبەرىندە تاراز قالاسىنىڭ ساۋلەتى كۇن ساناپ ارتىپ كەلەدى.