قىزدارىمىز ەرلەدى! ولار ازيا چەمپيوناتىندا ءبىرىنشى ورىندى ەنشىلەدى

دۋبايداعى دودادا ەرىك العا­بەك جاتتىقتىراتىن قازاقستان قىزدار قۇراماسىنىڭ 9 بوكسشىسى فينالعا شىعىپ, 8 جەرلەسىمىز ازيا چەمپيونى دەگەن مارتەبەلى اتاققا يە بولدى. وكىنىشكە قاراي, 57 كيلودا بىلتىر ەل چەم­پيونى اتانعان قوستانايلىق ۆلا­دي­سلاۆا كۋحتا التىن مەدال ءۇشىن وتكەن جەكپە-جەكتە وزبەك­ستان­دىق قارسىلاسى سيتورا تۇردى­بەكوۆاعا 0:5 ەسەبىمەن جول بەرىپ, كۇمىس جۇلدەگە يە بولدى. بۇل – كۋحتانىڭ قۇرلىقتىق تۋرنيردە جەڭىپ العان العاشقى جۇلدەسى. بۇعان دەيىن جاسوسپىرىمدەر اراسىندا سىنعا تۇسكەن ول 2015 جىلى وتكەن الەم چەمپيوناتىنىڭ قولا جۇل­دەسىن ولجالاعان بولاتىن. ەرەسەك­تەر دۋىنا جاڭادان قو­سىل­عان ۆلاديسلاۆا ءۇشىن ازيا بىرىن­شىلىگىنىڭ كۇمىس جۇلدەسى جامان ناتيجە ەمەس.

ال 2012 جىلعى لوندون وليم­پيا­داسىنىڭ 75 كيلو سالماقتا قولا جۇلدەگەرى, 2010 جىلعى الەم­نىڭ جانە ازيانىڭ كۇمىس جۇل­دەگەرى مارينا ۆولنوۆا اراعا 11 جىل سالىپ, سارى قۇرلىقتىڭ قولا جۇلدەسىنە قول جەتكىزدى. وليمپيا ويىندارىنان كەيىن تۇرمىسقا شىعىپ, سپورتتان ءبىراز ۋاقىت قول ءۇزىپ قالعان ۆولنوۆا 2019 جىلى ۇلكەن رينگكە قايتا ورالعان ەدى. وتانداسىمىز جارتىلاي فينالدا وزبەكستان وكىلى ماۆلۋدا ماۋلەنوۆادان ايلاسىن اسىرا المادى.

فينالدىق جەكپە-جەكتەرگە توق­تالار بولساق, قازاقستان قۇرا­ما­سىنان ءبىرىنشى بولىپ رينگ­كە 48 كيلو سالماقتاعى الۋا بال­قىبەكوۆا شىعىپ, ەل قور­جىنىنا العاشقى التىن جۇلدەنى سالدى. فينالدا وزبەكستاندىق بوكس­شى گۋلاسال سۋلتوناليەۆامەن جۇ­دىرىقتاسقان قانداسىمىز ايقىن باسىمدىقپەن جەڭىپ, ازيا چەمپيونى اتاندى. وزبەك قىزى بال­قىبەكوۆاعا جاقسى تانىس. ويت­­كەنى ەكەۋى 2019 جىلى ۇلان-ۋدە­دە (رەسەي) الەم چەمپيو­نا­تى­­نىڭ العاشقى اينالىمىن­دا كەز­دەسىپ, سول ايقاستا سۋلتو­نا­ليە­ۆا جەڭىسكە جەتىپ ەدى. مىنە, ارا­عا ەكى جىل سالىپ الۋا وزبەك­ستاند­ىق بوكسشىدا كەتكەن ەسەسىن قايتاردى.

جالپى, بۇل – جەڭىل سالماقتا­عى بوكسشىمىزدىڭ ءۇشىنشى ازيا چەمپيوناتى. 2017 جانە 2019 جىل­دارى ۇيىمداستىرىلعان سارى قۇر­لىق دوداسىنا قاتىسقانىمەن, بالقىبەكوۆاعا جۇلدەلى ورىنداردان كورىنۋ بۇيىرماعان ەدى. ءسويتىپ, ازيا بىرىنشىلىگىندەگى ءۇشىنشى مۇمكىندىگىندە ءوز دەگەنىنە جەتىپ, التىننان القا تاقتى.

كوپ كەشىكپەي قىزدار اراسىن­دا قازاقستاننىڭ 10 دۇركىن جە­ڭىم­پازى نازىم قىزايباي رينگكە كوتەرىلدى. جارتىلاي فينالدا شري-لانكا وكىلىن ءۇش رەت نوك­داۋنعا ءتۇسىرىپ, جەكپە-جەك­تى ۋاقىتىنان بۇرىن اياقتاعان نازىم في­نال­دا الەمنىڭ التى دۇر­­كىن چەم­پيونى, وليمپيا ويىن­دارى­نىڭ قولا جۇلدەگەرى ايگى­لى ۇن­دىس­تان­دىق مەري كوممەن جۇ­دى­رىق­­تاس­تى. جارتىلاي في­نال­دى ەرتە اياقتاپ, كۇشىن في­نال­عا ساق­تا­­عان قان­داسىمىز اق­تىق سىن­دا ايا­­نىپ قالمادى. قار­سى­لاسى­نىڭ اتا­­عى جەر جارىپ تۇر­عانى­مەن, 38 جاس­قا تاياعان مەري كوم قى­زاي­­­­باي­عا قارسى ەشقانداي قارسى شا­­را قولدانا المادى. وتان­دا­سى­مىز جىلدامدىعىنىڭ ارقا­سىندا قارسىلاسىنىڭ الدىن وراپ, تورە­شىلەردىڭ باسىم داۋى­سى­مەن جەڭىس­كە جەتتى. ەكى بوكس­شى بۇعان دە­يىن 2016 جىلى قىتاي­داعى لي­تسەن­­­زيا­لىق تۋرنيردە جو­لى­عىپ, مە­ري كومنىڭ مەرەيى ۇستەم بولعان ەدى.

تاعى ءبىر ايتا كەتەرلىگى, بۇل – نازىم قىزايبايدىڭ جاڭا سال­ماقتاعى العاشقى ءىرى جەڭىسى جانە العاشقى التىن جۇلدەسى. ەكى مارتە الەم چەمپيوناتىندا اتوي سالعان قانداسىمىز بۇعان دەيىن 48 كيلو سالماقتا ونەر كورسەتكەن ەدى.

ال 54 كيلو سالماقتا كۇش سى­ناسقان دينا جولامان ال­عاشىند­ا فينالدان تىس قالعان بولا­تىن. ويتكەنى جارتىلاي في­نال­داعى جەكپە-جەكتە تورە­شىلەر ۇندىستاندىق ساكشي 2:3 ەسەبىمەن جەڭىسكە جەتتى دەپ شە­شىم شىعارعان ەدى. الايدا قازاق­ستاندىق تاراپ شاعىم ءتۇسى­رىپ, كەزدەسۋ ناتيجەسى قايتا قا­رال­دى. كەيىننەن تورەشى­لەر شەش­ى­مىن وزگەرتىپ, جەڭىستى قازاق­ستان­دىق بوكسشىعا بەردى. ازيا چەم­­پيوناتىن قولا جۇلدەمەن قورى­تىندىلايىن دەپ تۇرعان جەر­لەسىمىز فينالدان ءبىر-اق شى­عىپ, التىن ءۇشىن بولعان ايقاس­تا وزبەكستاندىق سيتورا شوگ­دا­روۆا­نى جەڭدى. ءسويتىپ, دينا جولا­مان دا ازيا چەمپيونى اتاندى.

60 كيلو سالماقتاعى  تاجىري­بەلى بوكس­شىمىز ريمما ۆولوسەن­كو چەم­پيوندىق اتاققا مەر­زىمى­نەن بۇرىن قول جەتكىزدى. يندونە­زيا­لىق قار­سىلاسى حۋسۆاتۋن حاسان­مەن جۇ­دىرىقتاسقان ۆولوسەنكو بار ما­سەلەنى العاشقى راۋندتا-اق شەشىپ تاستادى. وتانداسىمىزدىڭ اۋىر سوققىسىنان كەيىن حۋسۆاتۋن ءبىرىنشى راۋندتا ەكى رەت نوكداۋنعا تۇسكەن سوڭ, تورەشىلەر جەكپە-جەكتى ءارى قاراي جالعاستىرۋدىڭ قاجەتى جوق دەپ شەشتى. 

ەل قورجىنىنا بەسىنشى التىن جۇلدەنى ميلانا سافرونوۆا (64 كگ) سالدى. 2019 جىلعى الەم جانە ازيا بىرىنشىلىكتەرىنىڭ قولا جۇلدەگەرى اتانعان جەرلەسىمىز في­نالدا تاعى ءبىر ۇندىستاندىق بوكسشى – ءلالبۋاتسايحيدى تورە­شىلەردىڭ باسىم داۋىسىمەن ۇتتى. 

فينالدا وزبەكستاندىق قار­سىلاسى ناۆباحور حاميدوۆانى ايقىن باسىمدىقپەن جەڭگەن ۆالەنتينا حالزوۆا (69 كگ) التىنشى التىننىڭ يەگەرى اتاندى. ءبىر قىزىعى, بۇل حالزوۆانىڭ ازيا بىرىنشىلىگىندەگى العاشقى جەك­پە-جەگى ەدى. سەبەبى سوقىر جە­رەبە وتانداسىمىزعا بىردەن في­نالدا ايقاسۋعا مۇمكىندىك بەر­دى. جالپى, بوكس تاريحىندا ءبىر جەك­پە-جەك وتكىزىپ-اق چەمپيون اتانۋ – وتە سيرەك كەزدەسەتىن جاع­داي. مۇنىڭ سەبەبىن بۇل جولعى چەم­پيوناتقا قىتاي, كورەيا, تايلاند, جاپونيا بوكسشىلارىنىڭ پان­دەميانىڭ سالدارىنان كەل­مەۋى­مەن دەپ تۇسىندىرۋگە بولادى.

اۋىر سالماقتاعى وتانداسىمىز فاريزا شولتاي (81 كگ) دا فينالدا وزبەكستاندىق جاس بوكسشى سوحيبا رۋزمەتوۆامەن جۇدىرىقتاستى. وسىدان ءبىر اي بۇرىن پولشانىڭ كەلتسە قالاسىندا ءوز مارەسىنە جەتكەن بوكستان جاستار اراسىنداعى الەم بىرىنشىلىگىنىڭ قولا جۇلدەسىن ولجالاعان رۋزمەتوۆا تاجىريبەلى بوكسشىمىزعا ەش قارسىلىق كورسەتە المادى. 2019 جىلى تاي­لاندتاعى ازيا چەمپيوناتىندا قولا مەدال العان وتانداسىمىز اراعا ەكى جىل سالىپ, ازيا چەم­پيو­ناتىندا توپ جاردى.

بيىلعى ازيا بىرىنشىلىگىندەگى سەگىزىنشى التىن جۇلدەنى ەل قور­جى­نىنا ءلاززات كۇنگەيباەۆا (+81 كگ) سالدى. ۇلتتىق قۇراما­نىڭ ەڭ تاجىريبەلى بوكسشىسى حا­لىق­ارالىق جارىستاردا جانە الەم چەمپيوناتتارىندا اتوي سا­لىپ جۇرگەنىمەن, ازيا بيى­گىن ەندى عانا باعىندىردى. بۇعان دە­يىن كۇن­گەيباەۆا ءۇش رەت سارى قۇر­لىق­تىڭ قولا (2015, 2017, 2019), ءبىر مارتە (2012) كۇمىس جۇلدەسىنە يە بولعان ەدى. جەر­لەسىمىز فينالدا ءۇندىستان وكىلى انۋپامانى تورەشىلەردىڭ شەشىمى بويىنشا جەڭدى.

وسىلايشا, بوكستان قازاق­ستان­نىڭ ايەلدەر قۇراماسى بىرىك­كەن اراب امىرلىكتەرىندەگى جارىس­تى 8 التىن, 1 كۇمىس جانە 1 قولا مەدالمەن قورىتىن­دىلادى. وسى ناتيجەمەن جالپىكوماندالىق ەسەپتە ءبىرىنشى ورىندى يەلەندىك. التى بوكسشىسى فينالعا شىققان وزبەكستان قۇراماسىنىڭ تەك ءبىر وكىلىنە عانا التىن جۇلدە بۇ­يىر­دى. قالعان بەس بوكسشىسى قار­سىلاستارىنا جول بەرىپ, كۇمىس جۇلدەنى قاناعات تۇتتى. ءسوي­تىپ, وزبەكستان قۇراماسى 1 ال­تىن, 5 كۇمىس, 2 قولامەن جال­پى ەسەپتە ەكىنشى ورىنعا تابان تىرەدى. ءۇشىن­شى ورىندا – ءۇندىستان قۇ­را­ماسى. ولار 1 التىن, 3 كۇمىس جانە 6 قولانى قور­جىن­عا سالدى. بۇل جارىستا 10 مەم­لەكەتتىڭ وكىلىنە جەڭىس تۇعى­رىنا كوتەرىلۋ باقىتى بۇيىردى.

وسىعان دەيىن ۇيىمداس­تىرىل­عان قىزدار اراسىنداعى ازيا بىرىنشىلىگىندە قازاقستاننىڭ گيمنى 4 رەتتەن ارتىق شىر­قال­عان ەمەس. ەڭ ەلەۋلى تابىسقا ءبىز وسىدان 11 جىل بۇرىن قول جەتكىزگەن ەدىك. 2010 جىلى ەلوردادا وتكەن بايراقتى باسەكەدە جاينا شەكەربەكوۆا (54 كگ), سايدا حاسەنوۆا (64 كگ), داريعا شاكىموۆا (75 كگ) جانە مارينا ۆولنوۆا (+81 كگ) باس جۇلدەنى ولجالاعان بولاتىن.