تۇڭعىش پرەزيدەنت – ەلباسى نۇرسۇلتان نازارباەۆ وزىنە ەسكەرتكىش ورناتۋ سىندى سىيلىقتاردى مۇلدەم ۇناتپايدى. بۇل تۋرالى ەلباسىنىڭ ءباسپاسوز حاتشىسى ايدوس ۇكىباي ءمالىم ەتتى, دەپ حابارلايدى Egemen.kz.
«ەلباسى بۇل يدەيانى جانە وسىعان دەيىن كوتەرىلگەن وزگە دە باستامالاردى قولداعان جوق. وعان ەسكەرتكىش ورناتۋ, ساۋلەت نىسانىنىڭ اتاۋىن وزگەرتۋمەن بايلانىستى مۇنداي «سىيلىقتار», اسىرەسە بۇل «سىيلىقتار» جەرگىلىكتى شەنەۋنىكتەر ۇيىمداستىرسا مۇلدەم ۇنامايدى. نۇرسۇلتان ءابىش ۇلى مۇنداي كوڭىل اۋدارۋلاردىڭ قاجەت ەمەستىگىن سان مارتە مالىمدەگەن بولاتىن. كەيدە كەيبىر ادامدار ادەيى اقپاراتتىق شۋ تۋدىرعىسى كەلەتىندەي اسەر قالدىرادى. تاريحتا ول ءوز اتىن جاڭا جوباعا بەرۋگە كەلىسكەن ءبىر عانا جاعداي بولدى. بۇل – ۋنيۆەرسيتەت پەن زياتكەرلىك مەكتەپتەر», دەدى ەلباسىنىڭ ءباسپاسوز حاتشىسى.
سونىمەن قاتار ول استانا كۇنى, تۇڭعىش پرەزيدەنت كۇنى جانە وزگە دە اتاۋلى داتالار ەڭ الدىمەن ادامدار, ەلىمىزدىڭ ازاماتتارى ءۇشىن مەيرام ەكەنىنە باسا نازار اۋدارتتى.
«بيىل قازاقستان تاۋەلسىزدىگىنىڭ 30 جىلدىق مەرەيتويىن اتاپ وتەدى جانە دە بارلىعىمىز ءۇشىن باستى سىيلىق ەسكەرتكىشتەر نەمەسە اتاۋ وزگەرتۋ ەمەس, حالقىمىزدىڭ بىرلىگىن, تۇراقتىلىعىن, ءال-اۋقاتى مەن گۇلدەنۋىن ساقتاۋعا باعىتتالعان جۇيەلى ءىس-شارالاردى ساپالى جۇزەگە اسىرۋ بولۋى ءتيىس. نۇرسۇلتان نازارباەۆ اتاپ وتكەندەي, ونىڭ ەڭبەگىنىڭ ەڭ ۇزدىك ەسكەرتكىشى – بۇل جارقىن بولاشاققا ۇمتىلاتىن, ىلگەرى ويلاي بىلەتىن جاستار, بۇل زاماناۋي ەلورداسىمەن, ءوز وتانىن شىنايى سۇيەتىن ازاماتتارىمەن گۇلدەنىپ كەلە جاتقان قازاقستان», دەدى ايدوس ۇكىباي.
ەسكە سالا كەتەيىك, تۇرىكسوي-دىڭ باس حاتشىسى بيلال چاكىدجي «تۇركىستان – تۇركى الەمىنىڭ رۋحاني استاناسى: ارىپتەستىك ينتەگراتسياسى مەن كەلەشەگى» اتتى حالىقارالىق ونلاين-كونفەرەنتسيا بارىسىندا تۇركىستاندا ەلباسى ن.نازارباەۆقا ەسكەرتكىش ورناتۋ تۋرالى باستاما جاساعان ەدى.