شىعىس قازاقستاندا كوروناۆيرۋس ينفەكتسياسىنىڭ تارالۋى بالەندەي ازايعان جوق. سوڭعى تاۋلىكتە وبلىس بويىنشا ۆيرۋس 80 ادامنان انىقتالعان. ونىڭ كوبى وسكەمەن, سەمەيدەن شىقسا, اۋداندار اراسىندا ۇلان مەن اياگوز ءتىزىمدى باستادى. دەسە دە باس سانيتارلىق دارىگەردىڭ قاۋلىسىمەن وبلىس «جاسىل ايماققا» ءوتتى. ال وسكەمەن, سەمەي جانە اياگوز قالالارى ازىرشە «سارى ايماقتا» قالىپ وتىر.
«جاسىل ايماق» ەكەنبىز دەپ جايباراقات جۇرۋگە استە بولمايدى. دەندەگەن دەرت تاناۋدىڭ استىندا عانا. ونىڭ ۇستىنە, شىعىس قازاقستان تۋريستىك-رەكرەاتسيالىق ايماق بولعاندىقتان, الا جازداي ساياحاتشىلاردىڭ لەگى ۇزىلمەيدى. ياعني الەمدى جالماعان جامان اۋرۋدىڭ تارالۋ مۇمكىندىگى دە كوبەيە تۇسپەك. وندايدا ءار ادام سانالى تۇردە ساقتانا تۇسكەنى ابزال. تۋريستىك اۋماقتاردا ساقتىقتى كۇشەيتىپ, قاۋىپتىڭ الدىن الۋ ءۇشىن مەملەكەت تاراپىنان دا شارالار قولعا الىنعان. ايتا كەتسەك, 23 مامىردا شىعىس قازاقستان وبلىسىنىڭ باس مەملەكەتتىك سانيتارلىق دارىگەرى «بۇقتىرما سۋ قويماسىنىڭ, الاكولدىڭ جانە راحمان قاينارى ءساناتوريىنىڭ تۋريستىك-رەكرەاتسيالىق ايماقتارىندا COVID-19 كوروناۆيرۋس ينفەكتسياسى اۋرۋىنىڭ اكەلىنۋى مەن تارالۋىنىڭ الدىن الۋ جونىندەگى شارالار تۋرالى» №7 قاۋلىعا قول قويدى.
قاۋلىدا ايتىلعانداي, 1 ماۋسىمنان باستاپ تۋريستىك-رەكرەاتسيالىق ايماقتاردا كۇشەيتىلگەن سانيتارلىق دەزينفەكتسيالىق رەجىمدى, تەرمومەتريانى, بەتپەردەلىك ءتارتىپتى جانە الەۋمەتتىك قاشىقتىقتى ساقتاي وتىرىپ, ادامداردى ورنالاستىرۋ جانە دەمالۋ ورىندارىن جازعى تۋريستىك ماۋسىمعا دايىنداۋعا رۇقسات بەرىلدى. الايدا نىسانداردىڭ قىزمەتىن قايتا باستاۋ ءۇشىن بەكىتىلگەن بىرقاتار ەرەجە بار. بىرىنشىدەن, دەمالىس ورىندارىنىڭ يەلەرىنە InfoKazakhstan.kz سايتىنان ەلەكتروندى فورماتتا بەرىلەتىن «سانيتارلىق نورمالارعا سايكەستىك اكتىسى» قاجەت. سونىمەن قاتار شەكتەۋ شارالارى جاعدايىندا جازعى تۋريستىك ماۋسىمدى اشۋعا بەرىلەتىن «دايىندىعى تۋرالى اكتى» جانە بار.
باس سانيتارلىق دارىگەر بەكىتكەندەي, دەمالىس ورىندارىندا Ashyq جوباسىن دا ىسكە قوسۋ قاجەت. ماسەلەن, مەنشىك يەلەرى دەمالىس بازاسىنا كەلگەن مەيماندى «جاسىل/كوك» ستاتۋسقا تەكسەرىپ وتىرسا عانا, جۇمىستارىن جالعاستىرۋعا رۇقسات بەرىلەدى. اتاپ ايتساق, بۇقتىرما سۋ قويماسىنىڭ, الاكولدىڭ, راحمان قاينارىنىڭ اۋماعىنداعى قىزمەت كورسەتۋ نىساندارىندا Ashyq جوباسىن ەنگىزىپ, كەلۋشىلەردى ءجىتى قاداعالاپ وتىرعان ءجون.
شىعىس قازاقستانداعى دەمالۋ, ساۋىقتىرۋ ورىندارىندا تىنىعىپ قايتامىن دەگەن ازاماتقا, بەرىلگەن كۇنىنەن باستاپ ءۇش تاۋلىكتەن (72 ساعات) اسپايتىن تەرىس ناتيجەسى بار پتر ادىسىمەن تەكسەرىلگەن زەرتحانالىق قۇجات قاجەت. ودان بولەك, COVID-19 كوروناۆيرۋس ينفەكتسياسىنا قارسى ۆاكتسينالاۋدىڭ تولىق كۋرسىن العانىن راستايتىن قۇجاتتىڭ بولۋى شارت. ەسكەرتە كەتەرلىگى, «سارى/قىزىل» ستاتۋسى بار جەكە تۇلعالارعا تۋريستىك-رەكرەاتسيالىق ايماقتارعا كەلۋگە تىيىم سالىنادى.
– ارينە, اۋدان ەكونوميكاسى ءۇشىن ساياحاتشىلاردىڭ كەلىپ جاتقانى جاقسى. الايدا ءبىز تۇرعىنداردىڭ دەنساۋلىعىن ءبىرىنشى ورىنعا قويۋىمىز كەرەك. بۇل ءۇشىن وبلىستىق باس سانيتارلىق دارىگەر بەكىتىپ بەرگەن قاۋلى نەگىزىندە جۇمىس اتقارۋىمىز كەرەك. اۋدانداعى دەمالىس بازالارى كەلۋشىلەردى بەلگىلەنگەن ەرەجەگە ساي قابىلداپ قانا قىزمەت كورسەتە الادى. بۇعان حالىق تۇسىنىستىكپەن قاراسا ەكەن دەيمىز. اتقارىلىپ جاتقان شارانىڭ ءبارى ءسىز بەن ءبىزدىڭ قاۋىپسىزدىگىمىز ءۇشىن, – دەيدى التاي اۋدانىنىڭ اكىمى قاليحان بايعونىسوۆ.
«تارتىپكە باعىنعان قۇل ەمەس». بەكىتىلگەن ەرەجەنى ءبىر كىسىدەي ساقتاۋىمىز كەرەك. ايتقانداي, سانيتارلىق تالاپتاردىڭ ورىندالۋىن ارنايى جاساقتالعان مونيتورلىق توپ كۇندەلىكتى قاداعالاپ وتىرادى. ەرەجە ەسكەرىلمەگەن جاعدايدا, بەلگىلى مولشەردە ايىپپۇل سالۋ كوزدەلگەن. حالىق وسىنى دا ەستەن شىعارماعاندارى ابزال.
ءبىر جاعىنان ءوڭىر «جاسىل ايماققا» ءوتىپ, بىرقاتار شەكتەۋگە وزگەرىستەر ەندى. وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى قانات تۇرديەۆتىڭ ايتۋىنشا, «جاسىل ايماققا» جاتاتىن قالالار مەن ەلدى مەكەندەردە ەرتەڭنەن باستاپ مەيرامحانالار, ءدامحانالار مەن جازعى الاڭدار تۇنگى ساعات 02:00-گە دەيىن جۇمىس ىستەۋگە رۇقسات بەرىلدى. ەلۋدەن ارتىق ادام قاتىسپاعان جاعدايدا, ەسكە الۋ تۇسكى استارىن وتكىزۋگە دە رۇقسات ەتىلەدى. سونداي-اق مەشىت, شىركەۋ, سيناگوگا سىندى ءدىني نىسانداردا ءىس-شارالار وتكىزۋگە رۇقسات ەتىلەدى. بىراق قاتىسۋشىلاردىڭ سانى 100 ادامنان اسپاۋى ءتيىس. «جاسىل ايماقتاعى» ەلدى مەكەندەر ءۇشىن بيليارد, بوۋلينگ, ويىن كلۋبتارى, بالالار ويىن-ساۋىق ورتالىقتارى, سونىڭ ىشىندە جابىق بولمەلەردەگى اتتراكتسيوندار جۇمىسىن قايتا باستايدى.
ەستەرىڭىزگە تاعى ءبىر مارتە سالا كەتسەك, وسكەمەن, سەمەي جانە اياگوز اۋداندارى «سارى ايماقتا». سوندىقتان جوعارىدا اتالعان جەڭىلدىكتەردىڭ بۇل وڭىرلەرگە قاتىسى جوق. دەمەك مۇنداعى جابىق ءۇي-جايلارىنداعى ءىس-شارالار مەن ەسكە الۋ تۇسكى استارىنا ءالى دە تىيىم سالىنعان. بيليارد, بوۋلينگ, ويىن كلۋبتارى مەن بالالار ورتالىقتارى دا ءالى جۇمىس ىستەي المايدى. ال Ashyq جوباسى ەنگىزىلگەن نىساندار بەلگىلەنگەن رەجىمدە جۇمىس ىستەۋگە قۇقىلى.
شىعىس قازاقستان وبلىسى