بۇگىندە جامبىل وبلىسىندا تۇلەكتەردىڭ تۋعان جەرگە تۋ تىگىپ, اۋىلدىقتارعا كومەكتەسۋ ءداستۇرى قالىپتاسقان. بۇل باستامانى ءار جىلعى تۇلەكتەر دە قولداپ, اۋىلدى كوركەيتۋگە كۇش سالۋدا, دەپ حابارلايدى Egemen.kz.
بيىل مەكتەپ بىتىرگەندەرىنە 20 جىل تولىپ وتىرعان بايزاق اۋدانى, كوپتەرەك اۋىلدىق وكرۋگىنە قاراستى كەڭەس اۋىلىنىڭ 1984 جىلى تۋعان ازاماتتارى دا اتالعان باستامانى ءىلىپ əكەتىپ, اۋىلداعى قايرات كالەنوۆتىڭ وتباسىنا ءۇي سالىپ بەردى.
كەڭەستىك تۇرعىنداردىڭ قۋانىشىنا اۋدان اكىمىنىڭ ورىنباسارى ءداۋىر داۋلەتوۆ ورتاقتاسىپ, باسپانالى بولعان وتباسىن قۇتتىقتادى. ول ءوز سوزىندە وڭىردە باستاۋ العان «اسارلاتىپ ءۇي سالۋ» جوباسىنىڭ ءمانى مەن مازمۇنىنا توقتالدى. مۇنداي يگى ءىستىڭ ەل ىشىندە قايتا جاندانىپ, باسپاناعا مۇقتاج كىسىلەرگە, جەتىم مەن جەسىرگە, از قامتىلعان جانە تۇرمىس جاعدايى تومەن وتباسىلارعا شاراپاتى تيە باستاعانى – ەلدىگىمىزدىڭ بەلگىسى ەكەنىن اتاپ ءوتتى. سونداي-اق, اۋىل ازاماتتارىنىڭ بۇل ىسىنە ءداۋىر داۋلەتوۆ اۋدان باسشىلىعى اتىنان ريزاشىلىعىن جەتكىزىپ, اۋدان اكىمىنىڭ العىس حاتىن تاپسىردى. كەڭەس اۋىلىنىڭ جاستارى وسىنداي قايىرىمى مول, يگى ءىستى قاتارىنان ەكىنشى جىل جالعاستىرىپ كەلەدى.