ەلورداداعى قازاق گۋمانيتارلىق زاڭ ۋنيۆەرسيتەتىندە قازاقستان جاستار كونگرەسى مەن قازاقستان حالقى اسسامبلەياسى بىرلەسىپ قولعا العان “جاستار – قازاقستان حالقى بىرلىگى ءۇشىن” دەگەن تاقىرىپتا جالپىۇلتتىق فورۋم ءوز جۇمىسىن باستادى.
ءبىلىم جانە عىلىم مينيسترلىگىنىڭ قولداۋىمەن ۇيىمداستىرىلعان بۇل شارانىڭ نەگىزگى وزەگى – جاستاردىڭ بويىنا رۋحاني-ادامگەرشىلىك قۇندىلىقتاردى مىقتاپ ءسىڭىرۋ ارقىلى ءپاتريوتيزمدى نىعايتۋ. كەشە, ياعني فورۋمنىڭ العاشقى كۇنى “ۇرپاقتار ساباقتاستىعى” دەگەن اتپەن جاستاردىڭ ەلىمىزدىڭ بەلدى ساياسات جانە مادەنيەت قايراتكەرلەرىمەن, زيالى قاۋىم وكىلدەرىمەن كەزدەسۋى ءوتتى. كەزدەسۋگە كورنەكتى اقىن, قوعام قايراتكەرى مۇحتار شاحانوۆ, پارلامەنت سەناتى مەن ءماجىلىسىنىڭ دەپۋتاتتارى عاريفوللا ەسىم مەن بەكبولات تىلەۋحان, ۇلتتىق عارىش اگەنتتىگى توراعاسىنىڭ ورىنباسارى مەيىربەك مولدابەكوۆ, پروفەسسور رۇستەم وماروۆ قاتىستى.
باسقوسۋ كەزىندە ۇرپاقتار ساباقتاستىعىن ساقتاۋ, رۋحاني-ادامگەرشىلىك قۇندىلىقتار, ءبىلىم, ومىرلىك فيلوسوفيا, قازاق حالقىنىڭ مادەني, تىلدىك ەرەكشەلىكتەرى ءتوڭىرەگىندە پىكىر الماسىلدى. ماسەلەن, عاريفوللا ەسىم ۇرپاقتار ساباقتاستىعى دەگەن ماسەلەنىڭ ايرىقشى ماڭىزعا يە ەكەندىگىنە توقتالدى. ء“بىز – 20 عاسىردىڭ ادامدارىمىز. سول عاسىردا ءوسىپ, سول عاسىردا تاربيەلەنىپ شىقتىق. ال سەندەر 21 عاسىردىڭ ۇرپاعىسىڭدار. ءبىز سەندەرگە ءوز عاسىرىمىزدىڭ تەرەزەسىنەن قاراپ تۇرمىز. سوندىقتان, ەلىمىزدىڭ, ونىڭ بولاشاعىنىڭ قانداي بولماعى, قانداي ارناعا تۇسەتىنى سەندەردىڭ قولدارىڭدا. بۇل جەردە ۇرپاقتار ساباقتاستىعى دەگەن دە ۇلكەن ءرول اتقارادى. ەگەر, ۇرپاقتار ساباقتاستىعى ۇزىلسە, ءبىز مۇلدە باسقا ارناعا كەتىپ قالامىز”, دەگەن ويىن جەتكىزدى سەنات دەپۋتاتى.
بۇل كۇنى فورۋمعا قاتىسۋشىلار “قۇرىلتاي الاڭى” دەپ اتالعان سۇحبات الاڭدارىندا دا حالىقتىڭ كەلەشەگىمەن بىتە قايناساتىن كۇردەلى ماسەلەلەر توڭىرەگىندەگى ويلارىمەن بولىسۋگە مۇمكىندىك الدى.
ءلايلا ەدىلقىزى.