ەلىمىزدەگى بالالار مەن جاسوسپىرىمدەردىڭ كىتاپ وقۋىن قولداۋ جىلى اياسىندا جانە جىر الىبى جامبىل جاباەۆتىڭ 175 جىلدىعىنا وراي, اقىننىڭ ولەڭدەرىن مانەرلەپ وقۋدان 15 ناۋرىز كۇنى باستالعان حالىقارالىق ونلاين-بايقاۋ ءوز مارەسىنە جەتتى, دەپ حابارلايدى Egemen.kz.
بارلىق قاتىسۋشىلاردىڭ بەينەجازبالارى جامبىل اتىنداعى قازاق مەملەكەتتىك فيلارمونياسىنىڭ الەۋمەتتىك جەلىدەگى رەسمي پاراقشاسىندا جاريالاندى.
19 مامىر كۇنى بايقاۋدىڭ قازىلار القاسى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ا.ابدۋاليەۆ, قازاقستان رەسپۋبليكاسى ۇلتتىق كىتاپحاناسىنىڭ ديرەكتورى ب.وسپانوۆا جانە جامبىل جاباەۆتىڭ ادەبي-مەموريالدى مۋزەيىنىڭ ديرەكتورى س.جامبىلوۆا بايقاۋعا قاتىسقان بالالاردىڭ ونەرىن باعالاپ, جەڭىمپازداردى انىقتادى. ءۇش ءتۇرلى جاس ساناتى بويىنشا ىرىكتەلگەن ۇمىتكەرلەردىڭ اراسىندا وزا شىققان وقۋشىلار ديپلومدارمەن جانە باعالى سىيلىقتارمەن ماراپاتتالدى. توپ جارعان جاسوسپىرىمدەر كەلەشەكتە جامبىل اتىنداعى قازاق مەملەكەتتىك فيلارمونياسىنىڭ ۇلكەن زالىندا وتەتىن گالا كونتسەرتىنە قاتىسادى دەپ جوسپارلانىپ وتىر. اتاپ ايتقاندا, ۇتىس سىيلىقتارىنا دومبىرا, كەڭسەلىك ورگانايزەرلەر مەن قويىنداپتەرلەر, سونىمەن قاتار, ارىپتەستىك قولداۋ كورسەتكەن قازاقستان رەسپۋبليكاسى ۇلتتىق كىتاپحاناسىنىڭ ۇجىمى اتىنان ون ءتورت بالاعا «ارنايى سىيلىق», الەۋمەتتىك جەلىدە جاريالانعان بەينەجازبالارىنىڭ ءلۇپىل سانىنا وراي بەس بالاعا قۇندى كىتاپتار قورىن تابىستادى. «تالابى ءبىر-بىرىنەن اسىپ تۇسەتىن بالالاردىڭ ونلاين-بايقاۋعا قاتىسۋعا دەگەن قۇلشىنىسىنىڭ ارتۋى بىزدەردى قاتتى قۋانتىپ وتىر. سەبەبى, قوعامنىڭ جانە جاستاردىڭ جامبىل جاباەۆتىڭ شىعارماشىلىعىنا دەگەن ىنتاسىن وياتىپ, قىزىعۋشىلىعىن ارتتىرۋ, جىر الىبىنىڭ باعا جەتپەس ۇلتتىق مۇراسى ارقىلى حالىقتىڭ رۋحاني دەڭگەيىن دامىتۋ بۇل بايقاۋدىڭ باستى ماقساتى بولىپ تابىلادى», دەيدى جامبىل اتىنداعى قازاق مەملەكەتتىك فيلارمونياسىنىڭ ديرەكتورى س.نۇرمولداەۆ. جامبىل اتىنداعى قازاق مەملەكەتتىك فيلارمونياسى وسى ونلاين-بايقاۋ ارقىلى جاسوسپىرىمدەردىڭ بويىنداعى ءپاتريوتيزمدى, رۋحاني-ادامگەرشىلىك ۇيلەسىمدىلىكتى دامىتۋدى, جاڭا تەحنولوگيالاردىڭ كومەگىمەن جاستاردىڭ كوركەمدىك تالعامىن تاربيەلەۋدى, كاسىبي ءداستۇرلى مۋزىكا الەمىنە جانە كوركەمسوز ونەرىنە باۋلۋدى ماقسات ەتەدى. سونىمەن قاتار حالىقارالىق ەڭبەك نارىعىندا بولاشاق ونەر وكىلدەرى مەن دارىندى ورىنداۋشىلاردىڭ باسەكەگە قابىلەتتىلىگىن قامتاماسىز ەتۋدى, ءار ەلدەردەگى مادەني-اعارتۋ مەكەمەلەرى مەن جاستارعا ءبىلىم بەرەتىن ۇجىمداردىڭ ءوزارا ارا-قاتىناسىن ءارى تاجىريبە الماسۋىن ۇيىمداستىرىپ, كەلەشەكتە بىرلەسكەن شىعارماشىلىق جۇمىستار جاساۋىنا ىقپال ەتۋدى كوزدەيدى. اتالعان ءىس-شارا قر مادەنيەت جانە سپورت مينيسترلىگىنىڭ تىكەلەي قولداۋىمەن جوعارى دەڭگەيىندە ءوتتى.