ىىم ەرلان تۇرعىمباەۆتىڭ باستاماسىمەن حالىقارالىق بالالاردى قورعاۋ كۇنىنە وراي «كامەلەتكە تولماعاندارعا قاتىستى قۇقىق بۇزۋشىلىقتارعا قارسى ءىس-قيمىل: پروبلەمالار مەن شەشۋ جولدارى» حالىقارالىق عىلىمي-پراكتيكالىق كونفەرەنتسياسىن وتكىزدى, دەپ حابارلايدى Egemen.kz.
بۇگىندە ەلدىڭ بولاشاعىنا قاتەر توندىرەتىن جانە جاستاردىڭ تولىققاندى دامۋى, ءاربىر تۇلعانىڭ قالىپتاسۋىندا سالدارى تەرەڭ قۇقىق بۇزۋشىلىق كۇن تارتىبىنەن تۇسپەي تۇر. وسى ورايدا بالالاردى وتباسىلىق-تۇرمىستىق جانە سەكسۋالدىق زورلىق-زومبىلىقتان قورعاۋ, قازىرگى زاماننىڭ شىندىعىنا سايكەس كامەلەتكە تولماعانداردىڭ قاۋىپسىزدىگى مەن قۇقىقتارىن قورعاۋدى قامتاماسىز ەتۋ تەتىكتەرىن جەتىلدىرۋدى ماقسات ەتكەن جيىندا سالا ماماندارى دەرەكتەرمەن ءبولىسىپ, تۇيتكىلدى ماسەلەلەردى شەشۋدىڭ جولدارىن تالقىلادى.
كونفەرەنتسيانى ىشكى ىستەر ءمينيسترى, پوليتسيا گەنەرال-لەيتەنانتى ە.تۇرعىمباەۆ اشتى. ول ءوز سوزىندە كامەلەتكە تولماعاندارعا قاتىستى قۇقىق بۇزۋشىلىقتاردىڭ الدىن الۋعا بايلانىستى وزەكتى ماسەلەلەرگە, سونداي-اق ولاردى شەشۋدەگى ءىىم قىزمەتىنىڭ نەگىزگى باعىتتارىنا نازار اۋداردى. قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى ءا.يسەكەشەۆ كونفەرەنتسيا قاتىسۋشىلارىنا ارناپ قۇتتىقتاۋ ءسوز سويلەدى.
القالى جيىندى «تالاپ» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ پەن ءىىم الماتى اكادەمياسىنىڭ باستىعى ايدار سايتبەكوۆ جۇرگىزدى.
كامەلەتكە تولماعاندارعا قاتىستى قۇقىق بۇزۋشىلىقتار ءۇشىن جاۋاپكەرشىلىكتى رەتتەيتىن زاڭنامانى جەتىلدىرۋمەن قاتار بالالاردى قورعاۋداعى ۆەدومستۆوارالىق ءتاسىل, كامەلەتكە تولماعانداردى ەكسترەميستىك ۇيىمدارعا تارتۋعا قارسى ءىس-قيمىل, بالالارعا قاتىستى زورلىق-زومبىلىقتى جويۋ ستراتەگيالارى, ومىرلىك داعدارىستىق جاعدايعا تاپ بولعان كامەلەتكە تولماعاندارعا پسيحولوگيالىق كومەك كورسەتۋ ەرەكشەلىكتەرىنە قاتىستى ماڭىزدى ماسەلەلەرگە وراي قاتىسۋشىلار ورتاعا وي تاستادى.
پارلامەنت سەناتىنىڭ دەپۋتاتى د.نۇرجىگىت, پارلامەنت ماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى د.زاكيەۆا, بالا قۇقىقتارى جونىندەگى ۋاكىل ا. ساين, ادام قۇقىقتارى جونىندەگى ۋاكىل ە. ءازىموۆا, بعم ۆيتسە-ءمينيسترى ب.اسىلوۆا, ءىىم اكىمشىلىك پوليتسيا كوميتەتىنىڭ توراعاسى م.بايمۇقاشەۆ ءسوز سويلەپ, دەرەكتەرمەن ءبولىستى. سونىمەن قاتار جيىنعا باس پروكۋراتۋرانىڭ, قازاقستان زاڭگەرلەر وداعىنىڭ, يۋنيسەف, كامەلەتكە تولماعاندار ىستەرى جونىندەگى مامانداندىرىلعان سوتتىڭ, الماتى قالاسى اكىمدىگىنىڭ وكىلدەرى, ەلىمىزدىڭ جەتەكشى عالىمدارى جانە رەسەي ءىىم باسقارۋ اكادەمياسى جانە تۇركيا پوليتسيا اكادەمياسى, رەسەي ءىىم شىعىس ءسىبىر ينستيتۋتىنىڭ بەلسەندى وكىلدەرى, ءىىم بارلىق اۋماقتىق پوليتسيا جانە قىلمىستىق-اتقارۋ جۇيەسى دەپارتامەنتتەرىنىڭ باسشىلارى دا قاتىستى.