ءاربىر سۋرەتتىڭ ءوز تاعدىرى بار. سۋرەتشى ونى ويدان ويىپ, قىردان قىرقىپ كەنەپ بەتىنە توگە سالمايدى. شىعارما جۇرەك كوزىنەن وتپەي وقىرمانعا جول تارتپاۋى قاجەت. اسقاق تۋىندىعا انىقتامانى ۋاقىت بەرەتىنىن ەسكەرسەك, شەبەردىڭ ەڭبەگى شەتتە قالمايتىنى انىق. ماسەلەن, ورىستىڭ داڭقتى سۋرەتشىسى يليا رەپيننىڭ «موناحينيا» پورترەتىنىڭ ومىرگە كەلۋى سەكىلدى. العاشىندا قاتارداعى سۋرەتتىڭ ءبىرى كورىنگەنىمەن, ارتىنان اۆتوردى ابىروي بيىگىنە جەتەلەدى.
قارا جاۋلىق جامىلعان قىز پورترەتتەن بىزگە ويلانا قاراپ تۇرعانداي. سابيدەي سۇيكىمدى كورىنەدى. وبراز كلاسسيكالىق ۇلگىدە بەرىلگەن. سول داۋىردەگى وقىرمانعا ەتەنە تانىس كەيىپكەر رەتىندە دە ەرەكشە. مۇمكىن, بۇل تۋىندى ي.رەپيننىڭ ايەلىنىڭ جيەنى ليۋدميلا شەۆتسوۆا-سپورانىڭ ەستەلىكتەرى بولماسا, ونەرتانۋشىلار اراسىندا قىزىعۋشىلىق تۋدىرماس پا ەدى.
پورترەتتەگى عاجايىپ كەيىپكەر كىم دەسەڭىز, سۋرەتشىنىڭ قايىن اپكەسى سوفيا. ءسىڭلىسىنىڭ ۇيىنە قوناققا كەلگەندە كۇيەۋبالاسى كورىپ عاشىق بولىپ قالادى. بىراق تاعدىردىڭ جازۋىمەن ۆەرا رەپينگە قوسىلعان سۋرەتشى مۋزاسىنىڭ پورترەتىن جازۋدان قاشپايدى. ەڭ قىزىعى, سوفيا يليانىڭ تۋعان اعاسى ۆاسيليگە تۇرمىسقا شىعادى. ول مارين تەاترىنىڭ وركەسترىندە قىزمەت ەتەتىن. سوعان قاراعاندا سوفيا سۋرەتتەن گورى, مۋزىكاعا اۋەس بولعان سەكىلدى. بۇلاي دەيتىنىمىز, سىلقىم سوفيا پورترەتىن جازعىزاردا قىلقالام شەبەرىنىڭ ابدەن ىعىرىن شىعارعان ەكەن.
العاشىندا ءساندى دە سالتاناتتى كويلەك كيىپ كەلەدى. ايتسە دە اۆتور سۇلۋدىڭ بۇل وبرازىن جاقتىرمايدى. كەلەسىدە الدىندا قاسقايىپ جەڭىل ءارى اشىق كويلەكپەن وتىرادى. ودان كەيىن شاشىن جوعارى ءتۇيىپ, قىسقا ەتەكتى كويلەك كيىپ كەلەدى. شىنايى ونەرگە بويلاي الماعانى ءۇشىن سۋرەتشى سوفيامەن ابدەن جانجالداسادى. ءتىپتى ونىڭ انتەك ارەكەتىنە قاتتى قىنجىلادى. ءسويتىپ وسىنداي جاعىمسىز قىلىعى ءۇشىن قايىن اپاسىنان تاپقىرلىقپەن كەك الۋدى كوزدەيدى. اقىرى ەركە دە سۇلۋ سوفيانى جابىق كيىم كيىندىرىپ, تازا كۇيىندە بەينەلەيدى.
نەگىزىندە سوفيا ومىرىندە جابىق كيىم كيگەن جان ەمەس. زەرتتەۋشىلەر سۋرەتتىڭ قۇپياسىن كوپ ۇزاماي تاۋىپ الدى. اۆتور بوياۋدىڭ باستاپقى قاباتىن تازارتپاعان ەكەن, بۇل كەيىپكەردىڭ شىن كيىمىن ەگجەي-تەگجەيلى زەرتتەۋگە مۇمكىندىك بەردى.
مىنە, وسىلايشا سانقوي سوفيا مىنەزى جىبەكتەي قىزعا اينالىپ شىعا كەلدى. اۋەلدە كەيىپكەر مەن وقىرمان پورترەتتىڭ قۇپياسىن تۇسىنبەگەنىمەن, ۋاقىت وتە شىندىقتىڭ بەتى اشىلعان سوڭ سۇيسىنە تاماشالادى. ومىردەن جان راحاتىن ىزدەگەن ورىس قىزىنىڭ يماني كەيپىن سومداعان اۆتوردىڭ تۋىندىسى راسىمەن كەرەمەتكە تولى. سۇلۋ سۋرەتشىنىڭ كوزىمەن وسىلاي بەرىلدى.