وبلىستا جەڭىس مەرەكەسى قارساڭىندا 100 مايدانگەر جاڭا پاتەر الادى
بۇگىنگى جاستار 1941-1945 جىلدارى سوعىس بولعانىن, اتالارىنىڭ مايداندا ەرلىك كورسەتكەندەرىن ەستىپ, تاعزىم ەتىپ ءوستى. وبلىس اكىمى باقىتجان ساعىنتاەۆپەن كەزدەسكەن سۇلتانماحمۇت تورايعىروۆ اتىنداعى ۋنيۆەرسيتەتتىڭ ستۋدەنتتەرى وبلىس ورتالىعىنىڭ ءبىر كوشەسىن باتىر باۋىرجان اتالارىنىڭ ەسىمىمەن اتالعانىن قالايتىندارىن جەتكىزدى. بۇدان بۇرىندارى دا ەلى مەن جەرىن قورعاعان ءباھادۇر باتىرلار ءوتتى. بۇل كۇندەرى جاس ۇرپاقتىڭ ساناسىنا رۋح ءسىڭدىرىپ, پاتريوتتىق دەم بەرەتىن وتكەننىڭ وسى ءبىر جولى الىستان ەلەس بەرىپ جاڭعىرعانداي. ال, بيىل 65 جىل تولعالى وتىرعان ۇلى جەڭىس مەرەكەسىن اتاپ وتۋگە ازىرلىك جاساۋدا.
وبلىستىق ىشكى ساياسات باسقارماسىنىڭ باستىعى ايزادا قۇرمانوۆانىڭ ايۋتىنشا, الداعى 9 مامىردا جەڭىس مەرەكەسىن اتاپ ءوتۋگە دايىندىق قىزۋ جۇرگىزىلۋدە. ياعني, الەۋمەتتىك قورعاۋ بويىنشا شارالار, ولاردى جەڭىلدىكتەرمەن قامتاماسىز ەتۋ, تۇرمىس جاعدايلارىن جاقسارتۋ, اقپاراتتىق-ناسيحاتتىق, اسكەري-پاتريوتتىق جانە مەرەكەلىك شارالار وتكىزۋگە قاتىستى كەزەڭدەردەن تۇرادى. بۇل كۇندەرى وبلىستا “قايىرىمدىلىق” ايلىعى ءجۇرىپ جاتىر. بيىلعى جىلدىڭ قاڭتار ايىنان باستاپ وبلىس اۋماعىندا سوعىس ارداگەرلەرى ءۇشىن كوممۋنالدىق تولەمدەر وبلىس بيۋدجەتىنەن تولەنۋدە. تاعى ءبىر جاعىمدى جاڭالىق, ول-مەرەكە قارساڭىندا ارداگەرلەرگە جاڭا پاتەرلەر بەرىلەدى. ال, ءماسكەۋدە وتەتىن مەرەكەلىك شەرۋگە وبلىستان ەكى ارداگەر قاتىساتىن بولسا, استاناعا 10 ارداگەر جول جۇرەدى. ارداگەرلەرگە ارنايى كيىم ءۇلگىلەرى دە ازىرلەنۋدە. وبلىس اكىمى باقىتجان ساعىنتاەۆتىڭ باستاماسىمەن ارداگەرلەرگە ارنالعان “زامانداستار” كلۋبى, ارنايى باسقوسۋ, اڭگىمەلەسۋ ءۇيى اشىلدى.
جالپى العاندا, جەڭىس مەرەكەسىن لايىقتى تۇردە اتاپ وتۋگە رەسپۋبليكالىق جانە جەرگىلىكتى بيۋدجەتتەردى قوسقاندا بارلىعى 889 ميلليون تەڭگە جۇمسالماقشى. مىسالى, باياناۋىل اۋدانىندا بۇل باعىتقا ارنالىپ, 10,3 ميلليون تەڭگە ءبولىندى. وسىعان وراي اۋدان اكىمىنىڭ ورىنباسارى باقىت توقجىگىتوۆانىڭ ايتۋىنشا, سوعىس ارداگەرلەرىنە دەپ ەمدەلۋى بار, جول ءجۇرۋ شىعىندارى, ۇيلەرىن جوندەۋ سياقتى الەۋمەتتىك كومەكتىڭ 20-عا جۋىق ءتۇرى قاراستىرىلعان كورىنەدى. ءار ارداگەرگە 20 مىڭ تەڭگەدەن اقشالاي سىيلىق بەرىلەدى. وبلىستىق قورعانىس ىستەرى ءجونىندەگى باسقارمانىڭ باستىعى اسايىن الداجاروۆتىڭ ايتۋىنشا, اسكەري تەحنيكالاردىڭ قاتىسۋمەن بولاتىن وبلىس ورتالىعىندا وتەتىن بيىلعى مەرەكەلىك شەرۋ دە ەرەكشە بولماقشى. مۇراعات جانە قۇجاتناما باسقارماسىنىڭ باستىعى حالەل اكىمحانوۆ باسقاراتىن مۇراعاتشىلار دا بۇل كۇندەرى تىنىمسىز ەڭبەك ەتۋدە. باسقارما وكىلدەرى رەسەي جاعىنداعى ارحيۆتەردە بولىپ, سوعىستا قازا تاپقان پاۆلودارلىقتار تۋرالى مالىمەتتەر تاۋىپتى. بۇعان دەيىن وبلىستا “بوزداقتار” اتتى كىتاپ شىقتى. قازىر وسى كىتاپتىڭ زاڭدى جالعاسىنداي مايدانگەرلەر مەن تىڭ ەڭبەككەرلەرىنىڭ سوعىستان كەيىنگى ومىرلەرىن جازاتىن جاڭا كىتاپتىڭ دا جارىق كورۋى مۇمكىن. سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتە كورشىلەس ومبىدان كەلگەن عالىمداردىڭ جانە جەرگىلىكتى تاريحشىلاردىڭ قاتىسۋىمەن ء“فاشيزمدى جەڭۋدىڭ تاريحي ماڭىزى: پاۆلودارلىقتاردىڭ جەڭىسكە قوسقان ۇلەسى” اتتى حالىقارالىق عىلىمي ءتاجىريبەلىك كونفەرەنتسيا وتكىزىلدى. ال, وتكەن اپتادا رەسەي ەلشىلىگى تاراپىنان “سلاۆيان” مادەني ورتالىعىندا سوعىس ارداگەرلەرىنە, لەنينگرادتى قورعاۋشىلارعا رەسەيلىك مەرەكەلىك مەدالدار تاپسىرىلدى. وبلىس ورتالىعىنداعى داڭق ەسكەرتكىشىنىڭ جانىنان “زەردە” اتتى ەسكە الۋ قاراۋىلىن اشۋ سالتاناتى بولدى. مەكتەپ وقۋشىلارى 9 مامىر كۇنىنە دەيىن ماڭگىلىك الاۋ جاعىلعان وسى ەسكەرتكىش باسىندا قازا تاپقان مايدانگەرلەردى ەسكە الىپ, قۇرمەتتى قاراۋىل كەزەگىنە تۇرادى. وسى الاڭدا تۇرعان اتاقتى ت-34 ماركالى تانك قاسىنا دا قاراۋىل قويىلدى. بۇل كۇنى ەسكەرتكىش قاسىنا جينالعان سوعىس ارداگەرلەرىنىڭ قۇرمەتىنە قالاداعى كادەت كورپۋسىنىڭ ءتاربيەلەنۋشىلەرى ارنايى ساپ تۇزەپ شەرۋمەن ءوتتى.
فاريدا بىقاي, پاۆلودار