الماتى ورتالىعىندا جول وپىرىلىپ, قۇتقارۋ قىزمەتىنىڭ كولىگى ءتۇسىپ كەتتى. وقيعا نازارباەۆ كوشەسىنىڭ بويىندا ورىن العان, دەپ حابارلايدى Egemen.kz
وقيعا ورىن العان جەردە تۇسىرىلگەن سۋرەتتەر Instagram الەۋمەتتىك جەلىسىندە پايدا بولدى. ۆيدەودان ارنايى تەحنيكانىڭ ارتقى جاعى جەراستىنا ءتۇسىپ كەتكەنىن بايقاۋعا بولادى.
قۇتقارۋ قىزمەتىنىڭ مالىمەتىنشە, 30 ساۋىردە 109 ەكيپاجى نازارباەۆ داڭعىلى 124 مەكەنجايىنداعى ءۇي بالكونى مەن قالقانىنا قاۋىپ تۋدىراتىن بۇتاقتاردى كەسۋ ءۇشىن شاقىرىلعان.
«شاقىرتۋ ورنىنا جەتكەندە, 109 قىزمەت كورسەتۋ بولىمىنە تيەسىلى اۆتو-گيدراۆليكالىق كوتەرگىشتىڭ وڭ جاق ارتقى دوڭگەلەگى جەر استىنا ءتۇسىپ كەتتى. ول جەر نەگىزىنەن جازدا سۋبۇرقاق رەتىندە پايدالانىلعان. وقىس وقيعاعا قاراماستان, اۆتوكولىك شۇڭقىردان شىعارىلىپ, قۇتقارۋشىلار ەكيپاجى اپات جاعدايىن تۋدىرعان بۇتاقتاردى كەسۋ جۇمىستارىن اياقتادى», دەدى ۆەدومستۆو وكىلدەرى.
وقيعا ورىن العان جەرگە پوليتسيا قىزمەتكەرلەرى مەن الماتى قالالىق جاسىل ەكونوميكا باسقارماسىنىڭ ماماندارى شاقىرىلعان.