باتىس قازاقستاندا مامىر بلوك-بەكەتپەن باستالادى

وڭىردە مامىر ايىنىڭ 1-ىنەن باستاپ تۇرعىنداردىڭ ەركىن ءجۇرىپ-تۇرۋى قاتاڭ شەكتەلىپ, بلوك-بەكەتتەر ورناتىلاتىن بولدى.

ىندەت باستالعالى بەرى وبلىستا كوروناۆيرۋستىق ينفەكتسيا 19 030 رەت تىركەلگەن. ال 2021 جىلى قاڭتار ايىندا – 1837, اقپان ايىندا – 1950, ناۋرىز ايىندا – 2138, ءساۋىر ايىندا – 3884 جاعداي ەسەپكە الىنعان ەكەن. كورىپ وتىرعانىمىزداي, ۆيرۋس جۇقتىرعاندار سانى ايدان ايعا كوبەيىپ, ءساۋىر ايىندا ءتىپتى ءورشىپ كەتكەن.

– 1-28 ءساۋىر ارالىعىندا 2144 ادام تۇماۋ بەلگىلەرىمەن دارىگەرگە قارالىپ, ولاردان كوروناۆيرۋس انىقتالدى. بۇل ناۋقاستارمەن جاقىن قارىم-قاتىناستا بولعان ادامداردى تەكسەرۋ كەزىندە تاعى 1098 ادامنىڭ ۆيرۋس جۇقتىرعانى بەلگىلى بولدى, – دەيدى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.

26 ءساۋىر كۇنگى ناتيجەلەر بويىنشا ءبورلى, بايتەرەك, قازتالوۆ, تەرەكتى, جاڭاقالا, شىڭعىرلاۋ اۋداندارى جانە ورال قالاسى ەڭ قاۋىپتى قىزىل ايماقتا قالىپ وتىر.

ۆيرۋس جۇقتىرعانداردىڭ ەڭ كوبى, ياعني 35,2%-ى – جۇمىس ىستەيتىن ادامدار ەكەن. بىراق باسقا توپتار دا از ەمەس. سوڭعى ءبىر اي ىشىندە 975 زەينەتكەر, 908 جۇمىسسىز, 293 وقۋشى, 75 مەديتسينا قىزمەتكەرى, 89 مۇعالىم, بالاباقشاعا بارمايتىن 69 بالا, بالاباقشاعا باراتىن 28 بالا, 18 تاربيەشى, 53 ستۋدەنت اۋىرعان.

وقۋ جىلى باستالعالى COVID-19 مەكتەپتە ءداستۇرلى فورماتتا وقيتىن 480 وقۋشىدا, قاشىقتان وقيتىن 442 وقۋشىدا انىقتالعان. مۇنىڭ 293-ءى 4 توقساندا, ياعني 1 ساۋىردەن باستاپ جۇقتىرعان. بۇگىندە قالا جانە اۋدان سانيتار دارىگەرلەرىنىڭ قاۋلىسىمەن 40 مەكتەپتەگى 69 سىنىپتا وفلاين وقۋ توقتاتىلسا, 6 مەكتەپ تولىعىمەن قاشىقتان وقۋعا كوشتى. 7 بالاباقشادا 7 توپ, جوو-دا 1 توپ, 2 كوللەدجدە 2 توپ كارانتينگە جابىلعان.

وڭىردە سانيتارلىق-دەزينفەكتسيالىق رەجيم تالاپتارىن بۇزۋ فاكتىلەرىن قاداعالايتىن مونيتورينگتىك توپتار 1 ساۋىردەن بەرى 634 مارتە رەيد جۇرگىزىپ, 3422 نىساندى تەكسەرگەن ەكەن. ناتيجەسىندە 34 نىساندا تالاپ بۇزۋشىلىقتار انىقتالعان. ولارعا 130 حاتتاما تولتىرىلىپ, 8 284 280 تەڭگەگە ايىپپۇل سالىندى.

باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆ 2021 جىلدىڭ باسىنان بەرى COVID-19-دان وڭىردە 107 ادام قايتىس بولعانىن ايتىپ وتىر. ونىڭ ىشىندە قاڭتاردا – 28, اقپاندا – 15, ناۋرىزدا – 30, ساۋىردە – 32 ادام دۇنيە سالعان. قايتىس بولعانداردىڭ 58-ءى – ايەل ادامدار, 49-ى – ەر ازاماتتار ەكەن. ناۋقاستاردىڭ باسىم كوپشىلىگى, ياعني 94-ءى – قالادا قايتىس بولعان.

قازىرگى تاڭدا 19 ناۋقاس كارانتيندىك ستاتسيوناردا, 603 ادام ينفەكتسيالىق ستاتسيوناردا ەم الىپ جاتىر ەكەن. 40 ناۋقاس رەانيماتسيا بولىمىندە.

وبلىستا كوروناۆيرۋسقا قارسى ەكپە جۇرگىزۋ ءىسى 1 ساۋىردە باستالعان. ارمان قاليبەكوۆتىڭ ايتۋىنشا, وسى ۋاقىتقا دەيىن وبلىسقا ۆاكتسينانىڭ 62 700 دوزاسى كەلىپ تۇسكەن. قازىردىڭ وزىندە 32 937 ادام ەكپەنىڭ العاشقى دوزاسىن, 8 408 ادام ەكىنشى دوزاسىن الىپ ۇلگەرگەن.

وتكەن سارسەنبىدەن باستاپ ورال قالاسىندا ءموبيلدى ەكپە بەكەتتەرى تۇرعىنداردى جاپپاي ۆاكتسينالاۋ ىسىنە كىرىسكەن. ياعني جىلجىمالى مەديتسينالىق كەشەندەر وبلىس ورتالىعىنىڭ ءىرى-ءىرى ساۋدا ورتالىقتارى جانىندا تۇرىپ, كەز كەلگەن ادامعا ءوز قالاۋى بويىنشا ەكپە سالادى. ول ءۇشىن كەلۋشىنىڭ جەكە كۋالىگى بولسا جەتكىلىكتى. ەكپە العان ادام 30 مينۋت دارىگەر باقىلاۋىندا بولادى. ول وتاندىق نەمەسە رەسەيلىك ۆاكتسينا الاتىنىن ءوزى تاڭدايدى.

جوعارىدا ايتقانىمىزداي, 1 مامىردان باستاپ ورال قالاسى, سونداي-اق اقجايىق, بايتەرەك, ءبورلى, قازتالوۆ, تەرەكتى جانە شىڭعىرلاۋ اۋداندارىنا كىرەبەرىسكە, بارلىعى 7 ورىنعا بلوك-بەكەت ورناتىلادى. بۇل بەكەتتەردەن حالىقتىڭ تىنىس-تىرشىلىگىن قامتاماسىز ەتەتىن ۇيىم-مەكەمە قىزمەتكەرلەرى, مەديتسينالىق ۇيىمداردا ەم الۋشىلار, جۇك تاسىمالداۋشىلار جانە ترانزيتتىك جولاۋشىلار, ۆاحتا جۇمىسشىلارى جانە ولاردى تاسىمالدايتىن كولىكتەر كەدەرگىسىز وتە الادى. سونداي-اق كوكتەمگى دالا جۇمىستارىمەن شۇعىلدانۋشىلار دا بۇل ساناتقا كىرەدى.

باتىس قازاقستان وبلىستىق باس مەملەكەتتىك سانيتار دارىگەرىنىڭ ورىنباسارى نۇرلىبەك مۇستاەۆتىڭ ايتۋىنشا, اۋرۋ كورسەتكىشى تومەندەپ, جاعداي تۇزەلەر بولسا, ءبىر اپتا ىشىندە بەكەتتەردى الىپ تاستاۋ ماسەلەسى قايتا قارالادى.