اقمولا وبلىسىندا مەشىتتەن ساداقا سالىنعان جاشىكتى ۇرلاۋ ارەكەتى ءساتسىز اياقتالدى, دەپ حابارلايدى Egemen.kz Polisia.kz سايتىنا سىلتەمە جاساپ.
2021 جىلدىڭ 25 ساۋىرىندە شورتاندى اۋدانىنىڭ پوليتسيا ءبولىمىنىڭ كەزەكشى بولىمىنە جەرگىلىكتى تۇرعىننىڭ عيماراتتا ساداقا جينالعان جاشىكتى ۇرلاۋ ارەكەتى جاسالعانى تۋرالى حابار كەلىپ تۇسكەن. وقيعا ورنىنا كەلگەن پوليتسيا قىزمەتكەرلەرى بەلگىسىز ادامنىڭ تەرەزەنى سىندىرۋ ارقىلى ادامداردىڭ ەرىكتى قايىرىمدىلىق قورابىن ۇرلاۋعا تىرىسقانىن انىقتادى.
پوليتسيا قىزمەتكەرلەرى مەشىتتە جانە ەلدى مەكەننىڭ پەريمەترى بويىنشا ورناتىلعان بەينەباقىلاۋ كامەرالارىنىڭ جازبالارىن زەرتتەپ, سونداي-اق جەدەل-تەرگەۋ ءىس-ارەكەتتەرى ارقىلى كۇدىكتىنىڭ جەكە باسىن انىقتادى. ول شورتاندى كەنتىنىڭ 44 جاستاعى تۇرعىنى بولىپ شىقتى.
كۇدىكتى مەشىتكە كىرىپ, جاشىكتەگى ق ۇلىپتى اشا الماعانى, قىلمىستىق ويىنان باس تارتقانى بەلگىلى بولدى. قازىرگى ۋاقىتتا اتالعان فاكتى بويىنشا 24-باپتىڭ 3-بولىگى – 188-بابىنىڭ 3-بولىگى (ۇرلىققا وقتالۋ) بويىنشا سوتقا دەيىنگى تەرگەۋ باستالدى. كۇدىكتىگە قاتىستى «كەلۋ مىندەتتەمەسى» ماجبۇرلەۋ شاراسى تاڭدالدى.