قوعامدىق ءتارتىپتى ساقتاۋدىڭ جانە قىلمىسقا قارسى كۇرەستىڭ جاي-كۇيى قالاي جانە پوليتسيانىڭ جۇمىسىن جاقسارتۋدا نەندەي قولداۋلار قاجەت. وسى ماقساتتا كەشە پارلامەنت ءماجىلىسىنىڭ دەپۋتاتتارىنىڭ قاتىسۋىمەن ىشكى ىستەر مينيسترلىگىندە كوشپەلى وتىرىس بولىپ ءوتتى.
الدىمەن دەپۋتاتتارعا ءىىم اۋلاسىندا قويىلعان قۇرال-جابدىقتار مەن تەحنيكا تۇرلەرى كورسەتىلدى. ونى كورۋگە ءماجىلىس توراعاسى ورال مۇحامەدجانوۆ تا كەلدى. مۇندا ىشكى ىستەر ورگاندارىنىڭ قىزمەتىندە پايدالانىلاتىن ۇتقىر جەدەل باسقارۋ ورتالىعى, جىلجىمالى پوليتسيا پۋنكتى, بورتتى كومپيۋتەرى بار اۆتوپاترۋل, ۇتقىر كريميناليستيكالىق جانە جارىلعىش زەرتحانالار جانە وزگە دە تەحنيكا تۇرلەرى قويىلىپتى. الايدا, مۇنداي ۇتقىر تەحنيكالىق زەرتحانالار تەك ءىرى قالالاردا عانا بار ەكەن. تىكۇشاقتىڭ ءوزى ەلىمىز بويىنشا ۇشەۋ كورىنەدى. قارۋ-جاراق جانە وزگە دە جابدىقتاردىڭ ىشىندە وتاندىق ونىمدەر ءتىپتى جوق. ولاردىڭ دەنى رەسەيدە شىعارىلعان. ورتاعا شىققان پوليتسيا قىزمەتكەرلەرى جەكپە-جەك توبەلەسىنىڭ تاسىلدەرىن, قارۋدان قورعانۋدىڭ قويىلىمىن كورسەتتى. سونداي-اق, دەپۋتاتتار ءىىم مەن استانا قالاسىنىڭ ءىىد جەدەل باسقارۋ ورتالىقتارىنىڭ جۇمىسىمەن تانىستى.
كوشپەلى وتىرىستى ءماجىلىس ءتوراعاسىنىڭ ورىنباسارى ۆلاديمير بوبروۆ جۇرگىزىپ وتىردى. الدىمەن ىشكى ىستەر ءمينيسترى سەرىك بايماعانبەتوۆ بايانداما جاساپ, ەلىمىزدەگى كريمينوگەندىك احۋال مەن قوعامدىق ءتارتىپتى ساقتاۋدىڭ جاي-كۇيى تۋرالى جان-جاقتى اقپارات بەردى. ونىڭ مالىمەتىنە قاراعاندا, اۋىر, اسا اۋىر قىلمىس 7,2 جانە 2 پايىزعا قىسقارعان. تيىسىنشە, ۇرلىق, توناۋ قىلمىستارى ايتارلىقتاي وسكەن. مىسالى, توناۋ 22 پايىزعا, ال پاتەر ۇرلىعى 39,7 پايىزعا كوبەيگەن. 2010 جىلدىڭ ءبىرىنشى جارتىسىندا ىشكى ىستەر ورگاندارىندا تىركەلگەن قىلمىستار سانى 14 پايىزعا ءوسىپ, 29,3 مىڭعا جەتكەن. مينيستر مۇنى قىلمىستىق ىستەردى تىركەۋدىڭ جاقسارعاندىعىمەن ءتۇسىندىردى. وسى رەتتە ناشاقورلار سانى 53 مىڭعا جەتسە, سونىڭ 3,5 مىڭى جاسوسپىرىمدەر جانە 4 مىڭى ايەلدەر كورىنەدى. ناشاقورلىققا جانە ەسىرتكى بيزنەسىنە قارسى كۇرەستىڭ 2009-2011 جىلدارعا ارنالعان باعدارلاماسى بويىنشا “وڭتۇستىك” (شىمكەنت قالاسى) جانە “ورتالىق” (قاراعاندى قالاسى) ارنايى ءوڭىرارالىق ەسىرتكى بيزنەسىنە قارسى كۇرەس باسقارماسى قۇرىلعان. جىل باسىنان 2,5 مىڭنان استام ەسىرتكى قىلمىسى, ونىڭ ىشىندە ەسىرتكى ساتۋدىڭ 793 فاكتىسى انىقتالىپتى. 1 توننا ەسىرتكى, ونىڭ ىشىندە 27 كيلوگرامم گەروين تاركىلەنگەن.
بيىل ەلىمىز اۋماعىنا 196 مىڭ شەتەلدىك, تاعى 170 مىڭ تمد ازاماتتارى كەلسە, ولار تاراپىنان 540 قىلمىس جاسالعانى بەلگىلى بولدى. قىلمىستىڭ دەنىن ۇرلىق, ەسىرتكى ساۋداسى, توناۋ جانە كىسى ءولتىرۋ قۇراعان. 2009 جىلى جول-كولىك وقيعاسىنىڭ سانى 8,8 پايىزعا, زارداپ شەككەندەردىڭ سانى 10 پايىزعا, ال قازا بولعاندار سانى 13,5 پايىزعا قىسقارىپتى.
سونىمەن قاتار, مينيستر ءوز ۆەدومستۆوسى ىشىندەگى جەمقورلىق ارەكەتتەرگە دە توقتالدى. ماسەلەن, سەنىم تەلەفونى ارقىلى 507 شاعىم تۇسسە, سونى تەكسەرۋ ارقىلى 35 پوليتسيا قىزمەتكەرى تارتىپتىك جازاعا تارتىلعان. بيىل جەمقورلىق قىلمىس بويىنشا 507 فاكت انىقتالسا, وتكەن جىلى ول 169 بولعان ەكەن. وسىنىڭ كوپشىلىگى ىشكى قاۋىپسىزدىك قىزمەتى كومەگىمەن جۇزەگە اسىرىلىپتى. وسى ورايدا مينيستر قۇقىقتىق ساياسات تۇجىرىمداماسى اياسىندا بىرقاتار وكىلەتتىكتەردى وزگە ۆەدومستۆولارعا بەرۋ قاجەتتىگىنە ەرەكشە توقتالدى. بۇل ءوز كەزەگىندە پوليتسيا كۇشىن قىلمىستى اشۋعا باعىتتاۋعا مۇمكىندىك بەرەر ەدى.
دەپۋتاتتاردىڭ مينيسترگە قويعان سۇراقتارى دا از بولعان جوق. اسىرەسە, دەپۋتاتتاردى قىرعىزستانداعى قارۋ-جاراقتاردىڭ شەكارا اسىپ كەتپەۋى ماسەلەسى قاتتى الاڭداتىپ وتىر. سونداي-اق, زاڭنامالىق بازانىڭ جەتىلدىرىلۋى كەرەكتىگى جانە پوليتسيا قىزمەتكەرلەرى جالاقىسىنىڭ ءالى دە ماردىمسىز كۇيىندە قالىپ وتىرعانى دا ايتىلماي قالمادى.
اسقار تۇراپباي ۇلى.