قاسيەتتى رامازان ايىندا سارىسۋ اۋدانى جاڭاتاس قالاسىنىڭ تاكسي جۇرگىزۋشىلەرى كوپكە ۇلگى بولاتىن ساۋاپتى ءىس باستادى. جاڭاتاس پەن تاراز قالالارىنىڭ اراسىندا جەكە كولىگىمەن ادام تاسىپ, ناپاقاسىن تاۋىپ جۇرگەن ءبىر توپ جۇرگىزۋشى قاسيەتتى جۇما كۇندەرى تۇرعىنداردى تەگىن تاسۋ تۋرالى باستاما كوتەرگەن.
ءسويتىپ, ءبىرىنشى بولىپ بۇل باستامانى وزدەرى جۇزەگە اسىرىپ وتىر. «تۇراقتى جۇمىسىمىز بولماعان سوڭ, جاڭاتاس قالاسىنان تاراز قالاسىنا تۇرعىنداردى تاسىمالداپ ناپاقا تابامىز. كۇندەلىكتى تابىسىمىز دا اسا كوپ ەمەس. جاڭاتاستان تارازعا دەيىن ءبىر ادامعا 2 مىڭ تەڭگە جولاقى الامىز. بۇگىندە بۇل باعانى 2500 تەڭگەگە كوتەردىك. سەبەبى جانارماي باعاسى 20 تەڭگەگە قىمباتتاپ كەتتى. سوعان قاراماستان, رامازان ايىندا تۇرعىنداردى تەگىن تاسىمالداۋعا بەل بايلادىق. ءاربىر جۇما كۇنى تاڭعى جەتىدەن باستاپ جاڭاتاستاعى مەشىتتىڭ جانىنان وبلىس ورتالىعىنا باراتىن تۇرعىنداردى تەگىن جەتكىزەمىز. كەرى قايتقاندا دا تەگىن الىپ قايتامىز», دەيدى تاكسي جۇرگىزۋشى راۋان دۇيسەنبيەۆ.
قاسيەتتى ايدا ساۋاپقا كەنەلگىسى كەلگەن جاڭاتاستىق 7 تاكسي جۇرگىزۋشىسى وسىنداي يگى باستامانى باستاپ كەتتى. كولىك جۇرگىزۋشىلەرى ەندى بۇل باستامانى ەستافەتا رەتىندە وزگە دە باعىتتارعا جولاۋشى تاسىمالدايتىن ازاماتتارعا جولداعىسى كەلەتىنىن ايتادى. بۇل رەتتە مۇنداي يگى ىسكە جاڭاتاس قالاسىنىڭ جاستارى دا قولداۋ بىلدىرۋدە.
«تاراز قالاسى مەن اۋدان ورتالىعى اراسىندا كۇنىنە 100-گە جۋىق ادام تاكسيمەن قاتىنايدى ەكەن. سوندىقتان دا تاكسي جۇرگىزۋشىلەرى وسى ايدا قايىرىمدى ءىس جاساۋعا بەل بۋىپتى. مۇنداي يگى ىسكە وزگە دە كولىگى بار ازاماتتار نيەت تانىتىپ وتىر. اتالعان باستامانى ءبىز الەۋمەتتىك جەلى ارقىلى اۋدان تۇرعىندارىنا حابارلادىق. ناتيجەسىندە, بۇل باستامانى قولدايتىنداردىڭ قاتارى ارتۋدا. سونداي-اق بۇگىندە كارانتين تالاپتارىنا بايلانىستى كوپ ادامنىڭ باسىن قوسىپ, اۋىزاشار بەرۋگە بولمايدى. سوندىقتان دا اۋدان تۇرعىندارى كۇندە بىزگە قارجى جيناپ بەرەدى. ول قارجىعا ءبىز كۇندەلىكتى 80 ادامعا تەگىن تاماق تاراتىپ ءجۇرمىز», دەيدى سارىسۋ اۋداندىق جاستار رەسۋرستىق ورتالىعىنىڭ ينسپەكتورى باۋىرجان بالعاباي.
جامبىل وبلىسى